2020年9月16日星期三

Homeland:「Home」有成竹

友人晌大角咀一頭工作,講到嗰邊嘅轉變,佢話非常之大且快,我都認同,因為年初都嚟過呢頭食飯,都眼見有好多新樓落成或建築中。講吓講吓就講到食,佢話有家新餐廳「Homeland」剛開業,水準唔錯,定價算相宜,是夜趁住家飯休息,屋企無飯開,就過嚟同朋友聚一聚食餐便飯。

2020年9月13日星期日

皇玥餅藝 Imperial Patisserie:匠人手藝

近幾年,傳統嘅蓮蓉月餅越嚟越少食,唔喺唔鍾意食,不過,一來自己好少買,二來親友送贈嘅多數都喺啲奶皇月。如要數到奶皇月,打着奶皇月餅始創人葉永華大師傅監製嘅「皇玥」,點都睇高一線嘅。

2020年9月6日星期日

賓墟餐廳 Bun Hui Restaurant:投「賓」菠蘿油

呢排啲天氣勁唔穩定,依一刻落大雨,一個鐘後,可以陽光普照,但轉頭。又再倒狗屎,所以,本來星期六、日喺行山日,但因此都唔敢約人。是日晌屋企食完晏晝飯,見出猛大陽,但一支公快閃由美孚經山路上長坑村、再經金山郊野公園過去鷹巢山,然後落返去李鄭屋村。出咗身汗,勞動完畢,出返青山道隨意搵間茶記「賓墟餐廳」嘆個下午茶,兼涼涼冷氣抖一抖。

奇華餅家 Kee Wah Bakery:份外「奇」待

唔夠一個月就喺中秋節,依家啲月餅攻勢晌中秋前兩、三個月就已經進行,經過地鐵,透過報紙,以及網媒,真喺日日都見唔少。由於疫情關係,親友間少咗往來,而有啲親友就以禮問候,藉中秋,送上點點心意。最近,就分別試咗「奇華餅家」嘅兩款出品,新品「迷你無花果果仁月」當然喺第次試,由於無花果、果仁都喺老婆喜愛嘅食材,所以,佢對呢款月餅份外期待。

2020年9月5日星期六

君好宴會廳 Betterment Banquet Hall:我的星期六美孚早餐 ~ 祝君安好

嘆茶唔喺我倆公婆常備嘅節目,因為一大班人飲茶夠為高興,又可以試多啲點心。查實呢間新開無耐嘅「君好」都想試試,不過,疫情關係,一直延遲開檔,講開呢個位,其實好難做,由小弟十多年前初嚟美孚報到,個鋪位由「盈暉海鮮酒家」轉為「凱旋門宴會廳」,之後再轉手為「百樂門宴會廳」,跟住轉為「鳳城皇宴」,都做唔掂,年初就轉為「君好宴會廳」。

2020年9月2日星期三

熱點 Hot Point:All Day DimSum

以前飲茶食點心就要晌朝早去酒樓先嘆到,都唔記得何時,啲酒樓就加設夜茶,即喺晚市都食到點心,但近呢10年左右,點心專門店就越開越多,成行成市,真喺由日頭到夜晚都可以食嘆到點心。疫情緩和咗好多,但仍然唔可以掉以輕心,所以,約食飯都只喺約番啲相熟嘅一個、半個。今回友人話點心癮起,就約出嚟幫襯吓啲點心專門店。最近,試咗一家晌太子新開無耐嘅點心專門店「熱點」,整體感覺唔錯,就同大家分享吓。

2020年8月29日星期六

發記士多 Fat Kee Store:搵食妙「發」

又喺星期六嘅行山日,無辦法啦,封場搞到波無得踢,行山就喺另一大「勞動」嘅興趣。今次唔再晌附近行,趁好天氣,跟朋友走遠啲去到粉嶺沙頭角,行鹿頸一帶,但都揀條輕鬆啲嘅,由鹿頸行到去谷埔附近,再折返,平路多,丁點山路,計埋啲打卡時間來回大概2.5小時,算好輕鬆,沿途都有點靚海景。最後,返到近鹿頸附近,揀咗晌「發記士多」打躉嘆抖兼食晏,貪佢人少啲,又對到海景。

2020年8月25日星期二

The Coffee Academics:包場早餐

曾經食過「The Coffee Academics」嘅蛋糕,覺得甚具質素,不過,佢哋嘅其他產品就未試過。由於早前做咗個網上問劵,獲贈一張$50現金券,是日早上就專誠嚟到試試咖啡,再加個鬆餅,作為一頓輕怡早餐。

2020年8月22日星期六

百份百餐廳 Cafe 100%:綠州茶餐

晌美孚,有條山路可以一直行到上「華景山莊」,唔算難行,我同老婆都行過好幾次,次次上到「華景」呢個搵食沙漠,都話嚟呢間全個「華景」嘅唯一食店「百份百餐廳 」嘆個下午茶,有住晌「華景」嘅朋友就話感恩有「百份百餐廳」呢個綠州。卒之,朝早晌屋企專登整咗份頗豐富嘅全日早餐,晏晝就跳咗午餐,到2:30pm就行個短山上到嚟嘆下午茶。

2020年8月21日星期五

天仁茗茶 TenRen's Tea:茶飲小確幸

本身都幾鍾意台式飲品,尤其啲花果茶、珍珠奶茶,不過,平常就唔會刻意買嚟飲,通常喺去開台式餐廳食嘢,或特別原因先會買。今次都有啲特別原因,就喺晌「中電」嘅會員活動中換咗杯珍珠奶茶,故此,趁食晏時間專登行過嚟換咗杯返公司飲,搭啲芝麻餅當下午茶,鬆一鬆。話時話,原本閣鱗街有間「天仁茗茶」,但近來無咗,搬咗去極隱蔽嘉咸街嘅「My Central」,好難搵吓,總之落去香港站分店啦。

2020年8月19日星期三

美心 MX;無窮「肉」望

公司有包伙食,提供免費午飯俾同事,今日就特別原因,包伙食嗰邊是日暫停,所以,食番餐出面嘅外賣,但「筆直」有限,唔喺有大食大,故此,大多數都只可以揀吓快餐店之類,而揀「MX」都無特別原因,隨意而已。

2020年8月15日星期六

紅茶冰室 Red Tea Cafe:大展「紅」圖

近排天氣好唔穩定,一時落大雨,轉頭又出晒太陽,好似馬來西亞、新加坡咁,今日,就趁難得天氣報告講到明,全日陽光普照,就同老婆食完早餐就行轉山,由美孚經幾段山路,行到入大圍,全程輕鬆行2.5小時左右,基本上喺零難度。而中午到達大圍,就晌火車站附近嘅「紅茶冰室」食個晏仔,貪其就腳,食完就可以過對面搭火車走。

2020年8月14日星期五

Tapa Room:西班牙滋味直送

本來計劃好晒今年四月計劃去西班牙一趟,但因新冠疫情係,當然要被逼取消啦,機票還好可以退,但住宿就要扣起啲手續費,幸而叫做金錢損失唔太大,但花咗好多心機安排就叫做白白浪費。一直對西班牙之旅都好期待,最近知道Tapa Room推出咗個外賣直送嘅「Vacation Box」(https://www.tapa-room.com/products/tapa-room-delivery-box),之前,亦已試過佢哋嘅出品,有信心,出國唔成,就晌屋企搞番個西班牙美食之夜,等個肚仔去住旅行先。

2020年8月11日星期二

Kebabchi:卡巴轉轉肉

抗疫疲勞?自問應該唔算,因為公有包伙食關係,所以,日日都喺住家式嘅兩餸飯,不過,偶爾午飯都想食得特別少少。最近,就有食友介紹我呢一家主打土耳其卡巴嘅小店「Kebabchi」。雖然,晌中環食餐晏平唔得去邊,快餐店普普通通嘅飯盒一般都四十零蚊起跳,但「Kebabchi」嘅午餐就要近六十蚊起跳,老實講,感覺確喺唔平。

2020年8月9日星期日

薄餅博士 PHD:「超等」薄餅

美孚區有Pizza Hut,亦有PHD,兩家都喺外賣店,無堂食,有訂開呢兩家薄餅都知,兩家同屬一個集團,大致上質素差唔多,不過後者就平啲,有時優惠又多啲。星期日晚,老婆想休息吓唔想煮,小弟行完山亦唔夠時間準備,所以,是晚就過嚟PHD買薄餅。不過,蠢咗,誤信個店員話等20min,結果等咗40min,否則,落咗單再去逛超市買嘢,返轉頭先拎薄餅就變相唔使等太耐。

凱柏冰室 K&P Cafe:「凱」景茶記

之前都講過,天氣熱都無阻我哋行山嘅熱情,但當然,揀嘅路線就唔可以太進取,所以,今次嘅路線較輕鬆,平路多,而最後會落到荃灣海濱一帶。行得山,就乘機嘆個下午茶先走,就沿海濱行到西鐵嘅新場「海之戀商場」時,見到呢一家「凱柏冰室」,對住海濱,感覺唔錯,就「以貌取人」走咗入去幫襯吓。

2020年8月8日星期六

太平洋咖啡 Pacific Coffee Company:我的星期六美孚早餐 ~ 熱烈擁「泡」

早前晌疫情未爆第三波之時,趁行完山過咗嚟「饒宗頤文化館」嘅「悅滿軒」食咗個下午茶,由上路行落嚟時發覺原來仲有家咖啡店「Pacific Coffee」開晌度(但佢門口會寫住「Workshop Cafe」),住咁耐美孚都無為意,平常去「Pacific Coffee」通常都喺去曼克頓山嘅分店,夠大夠舒服。不過,近來疫情反彈,等老婆安心啲,就當行個短山,上嚟饒宗頤分店試試。

2020年8月4日星期二

MX:鹹牛茶餐

好耐之前,晌同區嘅大快活食咗個熱狗餐(熱狗配紅豆冰),之後見美心都有,仲要平兩蚊添,所以,趁行完山過嚟幫襯吓,況且,呢間美心都好耐無幫襯過喇。

2020年8月3日星期一

滿滿食堂 Man Man Canteen:日式食堂 • 港式早餐

因為晏咗起身,趕唔切整早餐,故此兩公婆各有各食,所以,先返到中環睇睇時間,有時間就堂食,無時間就買返公司食。最後,時間都OK,就食埋先返公司,而今次所試嘅餐廳喺位處地庫嘅「滿滿食堂」,主線喺日式平民食堂,但早餐就絕對喺港式,經過見啲早餐幾好,又唔貴,故今次就幫襯吓。

2020年7月29日星期三

J.Co Donuts & Coffee:「冬」張西望

「J.Co Donuts & Coffee」呢個主打冬甩嘅品牌,大概年半前已經試過,不過,嗰次都喺小組搞聚會,有組員買嚟一大盒共享。最近,行經租庇利街,發現原本中環都開咗家分店,仲見有個配套優惠,趕及限時前幫襯,就趁食晏時間落去買,買嚟晌公司當食個下午茶,試一試。

2020年7月28日星期二

MM Cafe & Lounge:寧靜早餐

行經呢間鋪嘅人都知,佢喺韓星李英愛所開嘅護膚品店,因為鋪外掛咗唔少李英愛嘅相片,然而,店家亦有兼營咖啡店,提供早、午餐,因公事需要早啲返到嚟公司,就索性試一試呢度嘅早餐,然後,再返工。

2020年7月24日星期五

翰林茶館 Han Lin Tea Room:味道 • 份量 • 一額「翰」!

因為有要事一早過嚟尖沙咀海港城一趟,所以,事先搵咗個地方可以食早餐,打打躉,又想試吓啲未去過嘅餐廳,故此,揀咗由台灣過嚟嘅「翰林茶館」。

2020年7月18日星期六

紅城粉麵 Red City Restaurant:麵檔茶餐

平常去食下午茶都喺星期六、日行完山之後,喺呢啲時間先叫有啲閒情逸致,今次都差唔多,不過,就唔喺晌九龍區或新界區,而喺落番嚟中環轉港鐵返九龍,順道晌中環嘆個下午茶而已。路經「紅城粉麵」,真喺好隨意就入咗去。

2020年7月12日星期日

悅滿軒 House of Joy:閒情歲「悅」

又喺星期六與朋友行吓山嘅日子,雖然天氣確喺熱,所以,都唔敢揀啲太高難度嘅嚟行,都喺行吓城門、金山一帶,一來熟路,二來長短易控制啲。今回就更專燈順路過埋嚟「饒宗頤文化館」裡面嘅「悅滿軒」嘆下午茶,初時聽到個店名,仲以為喺食中菜添。多年前都曾經嚟過,不過,當時就叫「銀杏館」,嗰次嚟都喺食下午茶。

2020年7月8日星期三

稻埕飯店 Dào Chéng Taiwanese Restaurant:「埕」有獨鍾

疫情緩和,都諗住搞番次死佬飯局,點知又嚟個第三波,大棚人嘅聚會就唔好喇,唯有約番相熟嘅死佬短聚一下。就算出嚟食飯,大家小心翼翼,都會揀啲安心嘅餐廳,就好似今晚到訪嘅台灣菜館「稻埕」,就讓人安心喇。

2020年7月7日星期二

Pickabowl:值得「bowl」獎

兩個月多前嚟到D2 Place嘅「走肉蔬食研究所」食晏時,路經時已留意到呢一家健康餐廳「Pickabowl」,除因為門面夠醒目外,主打健康嘅夏威夷蓋飯亦喺吸引小弟望多兩眼嘅原因之一。今回就乘交收之便,約咗晌附近住嘅表姨甥女嚟呢度食飯。

2020年6月27日星期六

Crostini Bakery & Cafe:寧缺「麥」濫

好耐無兩公婆出嚟睇戲喇,一來疫情緩和咗,就打算支持吓電影業;二來有啲戲真喺值得入戲院睇,畫面、音響都好過晌電視或電腦睇,所以,今次就專登過咗嚟青衣城嘅UA睇「福島50死士」,啲逼真感好強,真喺好似發生晌眼前咁,原來,福島核事故無釀成全日本出事都喺有啲「附碌」。睇完戲就梗要搵地方食晏,「Crostini Bakery & Cafe」喺心水之一。

2020年6月25日星期四

阮蘭坊 Pho Nguyen Lan:圖個「坊」便

又喺一年一度上嚟鑽石山墳場掃墓嘅日子,唔會揀清明嚟,反而揀先人嘅死忌日,一來呢度晌清明嘅人潮真喺多得好恐怖,二來先人嘅忌日正正喺農曆公眾假,就番大家又實唔使返工,所以,就會揀呢日嚟。掃完墓,一齊食晏亦喺慣例,行過嚟慈雲山中心搵食,舊年幫襯過嘅「安平麵店」原來已經摺咗。而今次本來打算試「中心點」食點心,嘩!人多到呢……所以,「求其」揀咗隔離嘅「阮蘭坊」,食吓越南嘢。

2020年6月24日星期三

十和田 Towada Sushi:「鮮」入為主

以前嚟Mikki主要都喺落「一田」,但就真喺好專登先會過嚟,依家有咗啟德站,過嚟Mikki就直接同近咗好多,唔使再由黃大仙站或鑽石山站駁小巴過嚟。趁過開嚟新蒲崗啲廠廈攞嘢,順便到「一田」買少少醬料,又順便食埋個飯先走,點指兵兵,隨意入咗「十和田」。

2020年6月17日星期三

Oasis Bar & Grill:美食綠洲

由於疫情開係,無同啲親友聚舊好耐喇,雖然,依家限聚方面放寬咗好多,但小心起見,仲未有啲家族大聚會。不過,較為老死嘅表哥,就約咗佢聚一聚,對上一次相聚已喺舊年11月嘅事,仲記得嗰次約佢喺晌尖沙咀嘅一家酒吧餐廳,今回再約,都喺揀咗一家酒吧餐廳「Oasis Bar & Grill」,喺友人試過嘅極力推介,原來,更喺一家新開無耐嘅餐廳。

2020年6月13日星期六

膳坊 Grand Cafe:從「膳」如流

是日單車郊遊日,同班老死由大埔踩到入羅湖,朝早10:30am出發,迤住踩,踩到4:00pm返到嚟大埔。之前一文就介紹過「鴻淘士多‧羅太豆花」嘅豆漿、豆花放題,當喺是日輕怡午餐。既然完晒今日行程,就當然要食份下午茶餐補補體力。由地膽帶路,穿天橋過到嚟運頭塘商場,嚟到「膳坊」,初時睇個名以為喺中餐館,原來都喺茶記,哈哈!

鴻淘士多‧羅太豆花:最佳攤抖「豆」口

死佬中有啲單車熱血狂熱份子,天氣有幾熱都照出車,小弟今日掹車邊跟埋佢哋踩單車,路線由大埔、太和、粉嶺、上水,一直踩到去羅湖,真喺隔條河就上到深圳,仲晌埋大水管度打卡。唔好以為好遠,原來個半鐘左右就搞掂。回程時,老友話點都要到「鴻淘豆品廠」打一打躉,參觀豆品廠?原來,佢哋另設零售,一個價任飲豆漿,任食豆腐花,兼可以抖抖回吓氣。

2020年6月10日星期三

福岡漢堡扒 Fukuoka Hambageu:捧「福」而回

老婆返學,是夜得一支公,因為過開嚟尖沙咀換禮品,所以,就順道食埋飯先返歸。由於老婆飲食偏素,既然得一個人就唔使咁多顧慮,自不然揀啲多肉嘅菜式。經過厚福街,睇到呢間「 福岡漢堡扒 」幾人氣咁,就投佢一票,入去試試。

2020年6月6日星期六

Brick Lane Gallery:味力「Brick」人

由於小弟都幾鍾意去旅行,窮遊見識吓呢個世界,所以,有儲開飛行里數嘅習慣,但就絕對唔會為儲里數去刻意消費。不過,有啲推廣優惠,而計落好有數嘅,就會考慮吓。最近,「Asia Miles x OpenRice」推出個「里賞餐饗週」,除Openrice本身訂座系統有里數獎,享用指定精選餐單又有額外100里,跟手用埋「運通國泰航空尊尚信用卡」埋單再送500里,咁碌呢張卡本身都有里數。晌咁多餐廳中,揀咗主打英國菜嘅「Bricklane Gallery」,一來喺未試過,二來見佢啲風評唔錯,仲有個重點喺起錶消費唔高嘛。

2020年5月31日星期日

巴打冰室 Buddy Cafe:「兄」描淡寫

球場又未開番,暫時都喺靠行山當做運動,今次又喺快閃行動,因為,天氣時好時快,跟天文台嘅預測有好大落差,所以,就費時約定,見當朝天氣好,就即約啲老死晏晝行一轉。呢一次由洪哥帶路,從大圍出發,經城門下水塘、城門郊野公園、金山郊野公園,再落番葵涌,非常有挑戰性。慣例,搵間茶記抖抖,兼食番個茶餐,「巴打冰室」喺隨意撞上,總之就隨遇而安啦。

2020年5月24日星期日

黃金冰室 Golden Cafe:不「金」示弱

近來天氣有啲唔穩定,一早約定行山隨時因天雨而泡湯,所以,費事麻煩都無點約人行山。而今次見天氣放番晴,就快閃約咗同區街坊兼老友「夏總」,走一轉由美孚經上長坑村、金山獻郊野公園、鷹巢山,再落返去李鄭屋村。出完一身汗,最正喺涼涼冷氣,嘆個下午茶,地點,就喺李鄭屋附近嘅「黃金冰室」。

2020年5月23日星期六

走肉蔬食研究所 My Meat Run Laboratory:大「素」據年代

其實,上次老婆嘅生日飯都常帶佢嚟試,不過,種種原因就打消咗。今回就因為要落去荔枝角攞手機,所以,就順道會一會呢間「 研究所」,研究研究一下佢哋嘅素食喺點。因為星期六都唔喺返工日,諗住嚟食個晏,但估唔到都比預期多人,不過,咪睇門口企咗好多人,佢哋唔喺等位,只喺望緊有咩揀,因為呢度有少少快餐營運模式,晌出面收銀落單、俾錢,之後等攞嘢食。

2020年5月16日星期六

新城餐廳 New City Restaurant:一「城」不變

疫情放緩,開始多番啲行山,雖然天氣亦開始熱起嚟,不時正午都高達三十幾度,但都唔會影響幾個相熟嘅行山發燒友,不過,我哋就會盡量揀啲多樹蔭,唔太難行嘅路徑,是日就由朋友帶路,由城門水塘經條私房秘道,經下城門水塘、香粉寮到達大圍,出番大路就喺美田邨,友人嚟過美田商場內嘅「新城快餐廳」,覺得OK,就近近哋晌度食個下午菜,順道攤抖吓。

正點心:「正」治不正確

早一個星期前,因事同老婆出到尖沙咀,所以,午餐就專登同佢去食壽司;呢個周六,無咩特別事,唔會點出街,但晏晝都專登落咗去食點心當午餐,因為又喺好耐無食過喇,老婆嘅點心癮起,故此,就去咗區內嘅「正點心」。雖然,知道呢間嘢都開咗一段日子,但今趟喺第一次光顧。

2020年5月13日星期三

喜膳燒 Happy Q:今「燒」多珍重

因為近期疫情稍緩,限聚令都放寛咗少少,所以,約咗夏總呢個死佬聚一聚,老實講,自一月尾至今,都無乜點約過啲朋友。就算今次,都只喺得兩個死佬嘅飯局,始終疫情一日未完全消失,都仍需要小心啲,尤其保持個人衛生。「喜膳燒」兩年幾前嚟過,印象甚佳,所以,有信心帶夏總嚟試,佢為人食嘢都有少少咀刁架。

2020年5月9日星期六

元気寿司 Genki Sushi:壽司「元」味道

是日星期六,陪老婆返公司攞數,出開尖沙咀,就順便食埋晏。自一月尾至今,都真喺無試過兩公婆晌美孚區以外嘅地方一齊食嘢。而日本嘢亦好耐無食過,所以,近近哋嚟到「元氣」,平平哋食番餐廻轉壽司。

2020年5月5日星期二

松山素食 Chung Shan Veggie:「松」心所欲

中環搵食一向都唔平,就算晌快餐店,除一啲特價飯之外,基本起錶價都喺四十以上。但最近先留意到食友嘅食評,原來上環有家素食店「松山素食」,外賣嘅飯盒都只喺三十零蚊,而且,食友仲話份量十足。青綠色門面好易認,雖然叫晌上環,但小店位處都算挨近中環尾,晌中環返工嘅我,都覺得值得走遠少少過嚟試吓。

2020年5月2日星期六

意樂餐廳 Cafe de Itamomo:我的星期六美孚早餐 ~ 籠「樂」我心

晌美孚區,試過食早餐大大細細嘅餐廳都有近30家,所以,造就咗呢個「我的星期六美孚早餐」系列嘅食評,而當中小弟覺得性價比相對較高嘅喺「意樂」、「MaCafe」及「翠河」。時隔幾個月,疫情緩和咗,就再同老婆落嚟食早餐,當然,就揀咗心水之一嘅「意樂」啦。

2020年5月1日星期五

唐記包點 Tong Kee Bao Dim:「蒸」心選擇

之前,曾寫過一篇美孚港鐵站內「唐包點」嘅蒸飯,而同區晌近街市一邊,亦有間地鋪嘅「唐記包點」,我老婆喺佢支持者,不時都會幫襯,因為,只有佢有「蔬菜香菇包」(相反,「唐包點」奇怪地喺無呢款素包)。呢晚,又買咗兩個包嚟過過口癮。

2020年4月30日星期四

百尚屋 101 Tasty House:貴試小食餐

雖然仍有限聚令,但保持一定嘅社交距離,又做好防疫措施,基本上一啲戶外活動我就覺得絕無問題。今趟就友人吹雞,搞咗趟欣澳、愉景灣郊遊樂,仲晌愉景灣食咗個黃昏「下午茶」。對愉景灣唔熟,都唔知有咩好食,而且,好多有海景睇嘅餐廳都已經坐滿人,仲喺無視限聚令保持1.5M距離,所以,晌番主廣場嗰邊,試咗家小食店「百尚屋」。

2020年4月25日星期六

大快活 Fairwood:快活下午茶

上次就一支公落街買餸兼行公園,晌「銀龍」食咗個好流嘅菠蘿油,今次兩公婆行完公園,老婆口痕就話不如食個下午茶,就揀嚟咗「盈暉薈」嘅「大快活」,因為一嚟等陣會晌隔離嘅「百佳」入貨,二嚟就喺呢間「大快活」地方超大,卻喺特別少人,疫情之下,坐得更安心。

2020年4月21日星期二

鴻福堂 Hung Fook Tong:推心置「福」

「鴻福堂」最多幫襯喺佢啲飲品,尤其喺火麻仁,依家真喺唔多地方可以飲到。其他清潤嘅飲品,都可以晌超市搵到,仲不時做優惠,比起飲汽水、咖啡,自然相對健康好多。不過,今次就唔喺講嘢飲,而喺講湯品。

2020年4月16日星期四

東海堂 Arome Bake‧ Drink:包.三餐

一連3日早餐都喺「東海堂」麵包,雖然,走和風嘅「東海堂」一向嘅出品都唔差,但小弟絕對唔算喺佢哋嘅「死粉」。哈哈!今次咁捧場,都只不過因為家中嘅餅券就快到期,換麵包當早餐就好似最划算而已。

2020年4月12日星期日

大街:比比「街」是

早輪好興潮式嘅皺皮石磨腸粉,以石磨磨出香滑米漿,即叫即蒸,加上餡料多選擇,一下子好似遍地開花咁,唔少地區都有。最近,美孚都開咗一家「大街」(一邊喺賣石磨腸粉,另一邊喺賣港式小食),呢個鋪位由「萬事達小食」轉到「林昌記」,再轉手到依家嘅「大街」,又唔知可以做得幾耐!

銀龍粉麵茶餐廳 Ngan Lung Restaurant:「仙遊」菠蘿包

由於疫情仲未完全穩定落嚟,始終由歐美入境嘅人士仍然唔少,加上本土就不時見啲無公德、又自私嘅人周圍走,增加播毒風險,所以,呢兩、三個月真喺停晒啲社交活動,連行山都暫停埋,故此,最常做嘅就喺行公園。雖然話喺行公園咋,荔枝角公園又大又好行,是日就趁機落嚟公園曬曬太陽之外,順便到「銀龍」食個菠蘿油,嘆杯奶茶。