輕時光 Take Your Time：健康本「昔」

晌友人嘅IG睇到呢一間主打乳酪（比起「優格」，小弟較喜歡本土嘅叫法「乳酪」）、健康、全水果製作嘅輕飲店「輕時光」，又位處中環，所以，趁出開街搞搞銀行嘢，就過嚟望望，反正順道而已。嚟之前都睇過友人IG詳文，所以，都知道由「蓮香樓」側邊條大斜路轉上去，正正「九如坊」街口角落位，故此，唔難搵。 

鋪面以粉色系為主調，兩邊卻有好多壁畫彩繪，明顯喺走小清新路線。而走入店內，裝潢簡約，更晌唔同角落放置唔同嘅盆栽或乾花作點綴，洋溢出一份自然感。

而晌門口鋪上薄荷綠階紙皮石嘅石櫈，睇得見一組窗戶都可以打開，打開後感覺感覺會更感開揚，絕對喺一流嘅文青打卡位。其實，餐廳嘅選址都有心思，因為「九如坊」條路闊落又唔算多車，再走入少少好有種類似「大坑」嘅小社區感覺。

上文就講過店家主打乳酪、鮮果飲品，依家就介紹吓有咩選擇，包括：優格果昔、優格蓋茶、水果乳酸飲料、超級水果茶、水果冰茶昔、咖啡、純茶、抹茶……等8大類飲品系列，以及鮮切水果嘅優格水果杯，所以，選擇嘅真不少。 從啲單張所見，佢哋仲強調全水果製作，自家熬煮桂花冰糖，更不含化學添味劑，健康之餘，更多份安心。

晌等候期間，更見到佢哋有賣兩款自家製純手工嘅保健即沖飲品：「薑汁紅棗桂圓膏」及「陳皮川貝燉檸檬」，順便拎張單張睇睇，又幾多功效，問過店員，每樽賣$168，一向無賣開呢類產品唔知喺平定貴，但一來喺自家製、無添加，二來喺純手工製作，健康無價嘛！

芒果紅火龍果優格果昔（中杯） $38

小弟對佢哋嘅優格果昔特別興趣，而芒果喺我嘅「飛弗」口味，而且，其中一款更夾埋紅火龍果，更加吸引我。淡黃色色調嘅果昔，泛起一片片粉紅、一片片鮮白，份外好睇。以為只喺得少少紅火龍果，拎到返公司時，已經泛起得更具層次。入口先喺濃郁嘅芒果清甜味，再嚟喺幽幽嘅乳酪酸香，而紅火龍果嘅味道會稍為隱約，整體口感非常之順滑，感覺好天然。

雜莓優格蓋茶（桂花烏龍）$38

優格蓋茶可以自選茶底：桂花烏龍或茉莉綠茶，友人選前者，而以低脂乳酪代替鮮牛乳打成奶蓋，賣相同樣吸晴，而且，份量可不少，店員更溫提，拎返個膠杯嚟再光顧，有減$2優惠。友人話先啜一啜面頭嘅乳酪奶蓋，質感綿密，微微酸香，好醒神；再向下啜一口雜莓桂花烏龍，既有雜莓嘅鮮果香味，又有陣陣桂花烏龍嘅清爽茶味，所以，好有驚喜，而最後再兩攪勻，味道更複雜多變，非常好飲。

再睇番啲單張，原來店家先晌天后開店，依家再擴展到中環，茶飲店開到成行成市，但加入健康嘅低脂乳酪，加上出品確喺有質素，相信晌依家咁困難嘅日子，一樣企得住。

個人評分
味道：9/10
環境：7/10
服務：8/10
抵食：8/10
平均每人消費：HK$38

餐廳資料：
輕時光 Take Your Time
中環威靈頓街166號地下後座
5722 7865