明峙維家 Sweet Cake：「峙」癒甜點

香港嘅飲食就喺咁怪現象，炒起一樣時，就會一窩瘋去做，就好似台灣古早味蛋糕咁，印象中大概一年前炒起咗，就突然間出現咗好多賣古早蛋糕嘅店鋪，開到成行成市，家家都話正宗，務求飲到頭啖湯就頭啖湯，食盡條水就食盡佢。失禮講句，小弟晌香港就未試過喇，今次都喺同老婆行完短山，落到深水埗買電子配件，偶然經過「明峙維家」，想試試先打算買一件。

如好多古早蛋糕店咁，家家都製作出好多款式，擺晒晌櫥窗度吸客，加上現場即烘焙所散發嘅氣味，喺幾吸引人嘅。啲古早蛋糕除標榜現製，仲刻意講明無添加、無色素、無防腐劑，亦喺啲人幫襯嘅原因之一。

除原味，仲有6款口味，價錢由$50-$70，亦有寫到幾個出爐時間，不過，就唔知喺唔喺款款口味都喺嗰幾個出爐時間，定個別口味晌某啲時間出爐。最後，老婆揀咗抹茶口味（$60），作為晚飯後甜點。

橙色嘅紙盒睇起嚟好醒神，印住「一份懷戀的味道」，其實我又唔喺咁有感，哈哈！而側邊仲印住溫馨提示，當天10小時食用最佳，否則，雪櫃冷藏，可擺3日。

拎件蛋糕出嚟睇睇，雖然成60蚊，但其實又幾大件，而且，嗰陣綠茶味，錯！喺抹茶味幾濃，聞都聞得到，店主強調咗幾次佢哋喺用宇治抹茶嚟做，茶味特別幽香而濃郁。不過，賣相就差少少，裂紋多。

之前睇過啲飲食雜誌，介紹啲古早味蛋糕時，就話喺經過低溫慢火烘培而成，賣相要挺，無凹無裂，表皮要薄，底皮無燶，口感應該鬆軟而帶點濕潤，唔應該太乾身，有濃厚蛋香，咁先叫好。而呢個「抹茶」口味，賣相喺差咗少少，但面皮薄，無燶邊燶底，睇糕身，質感綿密，入口又真喺鬆軟而帶點濕濕，唔會好乾，抹茶味亦果然好強勁，當然，蛋味就較難嗒得出嚟。不過，個人偏愛，都喺中間加一層紅豆餡多過放啲杏仁碎條上面。

夾埋姨仔一齊食，一次過都處理唔晒成條，留一半當第二日早餐，第二朝再食，又真喺OK喎，跟之前一晚食都唔喺差好遠，當然我哋搵個密實盒再加個保鮮袋袋好先放入雪櫃啦。

個人評分
味道：8/10
環境：7/10
服務：8/10
抵食：7/10
平均每人消費：HK$30

餐廳資料：
明峙維家 Sweet Cake
深水埗元州街82號地下B號舖
9366 7599