泰濃麵 Siam Noodles：泰麵「膳」

我哋一班死佬嘅「死佬飯局」因種種原因已經好長時間無搞過，但間唔時都會約個別死佬出嚟聚一聚，近日疫情又緩和好多，就約咗老死阿Fat食餐泰式粉麵，因為大家都未試過，幾間心水嘅就揀咗「泰濃麵」，始終尖沙咀都就到大家。 

若非牆上掛咗好多泰式美食，以及一大張船麵艇家嘅相，單喺卡位、小圓枱、格仔地磚，話佢喺茶記都有人信，加埋餐具、紙巾都放晌枱邊下嘅暗櫃，跟足茶記設定啦。而整體，環境都好乾淨企理，此外，枱上有消毒搓手液，一坐低，店員又會幫手將餐具放入熱水中消毒，算喺有誠意。 

其實早前睇啲飲食雜誌都有介紹過泰式嘅「船麵」，喺加入豬血做湯底的濃味湯粉，由移居泰國，晌水上市場工作嘅潮州人所創，多數晌艇上食，故專登做成細細碗，防止倒瀉，可謂泰國廉價地道美味，喺勞動階層嘅恩物。而墊餐紙同時亦喺餐牌，一眼睇晒有咩食，如各款泰式粉麵、小食、飲品，可惜，甜品當晚無供應。 

而枱上有啲調味醬供自由取用，不過，小弟就覺得啲粉麵夠晒味，基本上唔需要點用！ 

泰式香茅班蘭梳打特飲 $28 

先上一杯由香茅跟班蘭煮成嘅「汁底」，再附上一枝泰國樽裝梳打水，睇見都覺得夠晒天然，唔喺啲糖水、人工糖漿做出嚟嘅味。入口啲梳打水嘅汽唔會好強，而香茅味較為突出，班蘭味則稍為隱約。

泰式龍眼冰特飲 $28 

友人就要龍眼冰，其實小弟都喜歡眼冰特，只喺想試啲特別嘢先揀香茅班蘭梳打。友人話龍眼冰啲龍眼唔喺罐頭貨，因為唔喺淨得個甜宇，而喺嗒到清潤嘅龍眼味，加上落龍眼一啲都無手緊，勁多，好飲。

泰式炸蝦餅 $38 

啲蝦餅專登搓成水泡咁款，好搞鬼，唔知喺咪因為賣船麵關係，回應返個主題。實際上，啲蝦餅既彈牙，又有蝦鮮味，兼且香而不膩，做得有水準，就連伴碟嘅蝦片都好脆口。

頂級美國肥牛船湯金邊粉 $68 

老友就鍾意食肥牛，就算無揀安格斯，佢覺得啲肥牛都好唔錯，軟滑富油香，伴菜仲有白魚蛋、蘿蔔、芽菜、秋葵及炸豬皮，都好豐富。金邊粉口感滑溜，份量又足，深沉色嘅船湯極為香濃，當然可能因應港人口味，湯中就無加咩豬血、牛血，不過，面面就有啲碎碎嘅豬紅碎粒。

卜卜蜆冬陰功湯黃麵 $88 

小弟就揀卜卜蜆，雖然話卜卜蜆，但當中仲有啲青口、蟹柳、大蝦及秋葵做配菜，而主角啲卜卜蜆好大隻，亦夠厚肉，味道亦好鮮甜，至於啲黃麵我諗大抵就喺平常食車仔麵嘅油麵；至於個冬陰功湯底就好足料，香濃惹味，甚具辣勁。

嚴格嚟講，點都唔會喺第一次食泰式粉麵，不過，印象中，以往晌泰國菜館食嘅都喺炒飯麵居多，而今回初嚐嘅泰式湯粉麵，印象亦唔錯，兩款湯底都各有特色！

個人評分
味道：8/10
環境：7/10
服務：8/10
抵食：7/10
平均每人消費：HK$138

餐廳資料：
泰濃麵 Siam Noodles
尖沙咀樂道7號嘉樂大廈地下A舖
2350 4808