原本喺想訂12月16日晏晝，但店家話呢個星期只做12月17日、18日（星期四、五）兩日，喺做聖誕節午餐，5道菜，定價$129，已包加一，之後學院會放假，直到新曆年後先開返。所以，趁有機會，12月18日都OK，菜單如下：
不過，到訪當日，在門口仲貼多一張聖誕節午餐，只做12月25日、26日（星期五、六）兩日，同樣喺5道菜，定價$150，已包加一，菜式跟我今次食到嘅有分別。
一入門口，裝修成一間咖啡店模樣，無詳細過問，我估喺教學之用，因為，佢哋除上述時間開放供應午餐，其次就只有晚上開放有做餐飲生意。
防疫都做得好足，職員第一時間會要求客人量體溫，消毒雙手。之後，再由職員帶路，屈個彎就入到餐廳裡面，地方唔喺好大，加上由於限聚令關係，全場只安排到8張枱共16個位。裝修簡約，但亦算幾骨子，加上偌大嘅落地玻璃窗，喺欠咗少少陽光，外面仲有啲露天位，不過，就未有開放。
而晌餐廳內，透過一面大玻璃，喺可以直接睇到廚房運作，由外籍導師指導，做菜就交由一班年輕學員作「煮」，真真正正嘅「學生餐」，透過實戰去體驗一下餐廳嘅運作！而部份學員就「客串」侍應崗位，裡裡外外各司其職，適逢聖誕，更着起聖誕老人裝應吓節。
Classic Prawn Cocktail with Melba Toast 菜單全英文，加少少註解，不過，甫坐低，學員都會作一個簡單嘅介紹。前菜、甜品都喺二揀一，我同老婆兩個人，唔需要煩，就正正兩樣都試到。呢個「雞尾蝦」真喺打響頭炮，首先賣相好精緻，甚有高級西餐廳做菜嘅影子，主角嘅牛油蝦，好清爽，肉質彈牙，而下面青瓜薄片捲住嘅喺牛油果、意大利乾蕃茄、蝦肉……等等做成嘅沙律，配上酸香帶微辣嘅醬汁，非常醒胃；再配搭烤脆咗嘅薄麵包片，以及以火槍燒過嘅牛油生菜，都反映好多細節位好用心。
Melon with Parma Ham 睇個菜式名，相信好多人都知會喺咩，不過，嚟到會有驚喜，其實，睇菜牌嘅描述，都會再了解更多，因為唔單止有巴馬火腿伴蜜瓜，仲有哈蜜瓜雪葩及炸芝士球。巴馬火腿未至於好油潤，但鹹香十足，襯以清甜嘅蜜瓜，非常搭配；而炸芝士球超脆口，芝士味好濃郁軟綿，又一啲都唔油；最後先至食個哈蜜瓜雪葩，可有清清味蕾之效。
Lobster Bisque 有出去食開西餐都知，一客龍蝦湯單點賣到$70、$80，甚至更貴，而一般西式套餐都好少供應龍蝦湯，大多數都喺乜乜忌廉湯之類，除非喺晚市賣到3、4百以上嘅套餐。故此，百零蚊嘅午餐大俾到龍蝦湯實在喺賺突。難得嘅喺，個湯嘅蝦味非常突出，好濃郁，又夠熱辣，質感啱啱好，唔會太厚，亦唔會太稀，真喺好好飲。
Christmas Turkey with all the Trimmings 主菜3揀1，我就揀個夠貼節日氣氛嘅煎火雞，火雞胸、雞腿都經過慢煮，然後再煎香，所以，入口一啲都唔嚡，相反，都幾嫩滑，配上小紅莓汁，感覺好唔錯，而且，有一小件「pigs in blankets」，仲以為喺乜，其實喺香腸煙肉卷，甚具油香。
A Vegetarian Christmas 餐廳都照顧到素食人士，所以，老婆就揀咗呢一款素主菜，賣相有啲似聖誕肉批，但其食材喺烤烘過嘅果仁、白甘筍、醃漬過嘅紅菜頭，再加入素菜汁所做，同樣伴上小紅莓汁佐食。雖然明知喺素食材，但食落真喺幾有「肉感」，有陣陣香料味，而且，多種食材產生出多層口感，喺一道頗有趣嘅菜式。
Roasted potatoes, Carrots and Turnip puree and Brussel sprouts 主菜喺配有薯菜，不過，好得意，我哋兩人份嘅薯菜另碟上，再由侍應夾上碟，包括烤薯仔、甘筍蘿蔔蓉（我初時以為喺蕃薯蓉）及炒小椰菜。啲薯仔烤得外層脆口，好有薯口木味，甘筍蓉亦打得軟滑，小椰菜好爽口。
Lemon Tea餐牌無列明，其實喺有包餐飲，但免費嘅就只限檸水、檸茶，想飲咖啡嘅則需另加$20，此外，就無其他選擇。
Christmas Pudding with Brandy Sauce 接近尾聲，喺上甜品嘅時候，呢一款聖誕布甸絕對喺傳統，食過嘅朋友就知喺一道烘焙嘅甜點，內裡混入大量雜乾果，簡單加入麵粉焗成嘅蛋糕已非常好食，熨熱香甜，味道芬芳，再淋上白蘭地汁，簡直喺完美嘅結合！
Sherry Trifle 另一款甜點真喺唔知乜嚟，睇餐牌嘅介紹，有好多嘢，如生果、海綿蛋糕、雲呢嗱吉士、甜奶油，好期待。以傳統雞尾酒杯盛載，放咗幾粒紅桑莓，賣相好靚。單睇面頭嘅甜奶油嘅粒粒黑點，就知用雲呢嗱籽做，唔喺用香精油，喺誠意，而下面喺紅莓果肉夾雜海綿蛋糕，酸香鮮活，好好食。事後，睇到佢個聖誕餐牌，有個中文譯名：英式奶油水果杯。
Mulled Wine and Minced Pie 由於賀聖誕關係，最尾再送上暖暖嘅紅酒及迷你豬肉批，前者喺加咗啲玉桂及八角去煮，飲起嚟更容易入口，又滲出陣陣香料味，感覺真喺幾唔錯；而豬肉批就唔喺好多驚喜，叫OK啦。
用餐過程中，外藉導師不時會出嚟問吓客人嘅意見，而學員晌招呼方面雖然有少少生手，但都感受到佢哋都好盡力做，亦好殷勤有禮。順帶一提，每一環菜式，都會同步出菜，例如，前菜嘅蝦沙律及巴馬火腿配蜜瓜，都如一般高級西餐咁，一同上枱，絕無前後腳。而且，上菜嘅流程好順，即喺一道菜接一道菜，唔急，亦唔會隔得太耐。總之，無論食材嘅配搭及用料，服務嘅態度及流程，都予人稱心之感，真喺有着高級西餐廳嘅水平，但只喺百零蚊大眾化嘅價錢！
個人評分
味道：9/10
環境：7/10
服務：8/10
抵食：9/10
平均每人消費：HK$129
味道：9/10
環境：7/10
服務：8/10
抵食：9/10
平均每人消費：HK$129
餐廳資料：
香港西廚學院 Hong Kong Culinary Academy
葵涌敬祖路6號祖堯村祖堯坊C座一樓
2156 0612
香港西廚學院 Hong Kong Culinary Academy
葵涌敬祖路6號祖堯村祖堯坊C座一樓
2156 0612
沒有留言:
發佈留言