南山軒 Nan Shan Hin Private Kitchen：單車友「南山」秘竇

不嬲都有行開山嘅習慣，但唔喺為打卡而行山，所以，路線都揀得好隨意，有時，就算喺屋企附近行個短山都會。近依半年，多咗項活動，就喺跟啲老友踩單車，其實本身都鍾意踩，只喺以往無乜伴一齊玩。早前，屯馬線開通咗，老友就先去探路，隔多幾星期後先一齊踩番轉，由大埔出發，北上到上水再過打橫過去元朗，到達元朗正好喺食晏時間，老友已計劃好嚟「南山軒」。

點解嚟呢度？因為夠自由，夜晚嚟就會見人食小炒、私房菜，但日頭嘅話，就同茶記無異，睇個格局你都見，所以，毫無拘束。而重點喺我哋啲單車喺可以推埋入去裡面，就唔怕被人偷單車啦，所以，有唔少熟架步嘅單車客都會鼠入嚟食嘢。

上面都講過喺茶記格，所以，午市食物主要都喺啲碟頭炒粉飯麵。

順便就影埋佢哋嘅小菜餐牌，等有興趣嘅朋友可以當個參考。

例湯

飯餐包湯、包熱飲，先嚟個例湯，好就唔叫好，差亦唔喺差，都喺啲瓜瓜菜菜煲豬肉、豬骨，都喺啲粗粗哋大製作，味道不過不失嗰種，叫做有啖湯入口。

時菜豬潤肉片湯飯 $50

老友想食啲濕濕哋嘅嘢，所以，最正路就喺揀湯飯，啲湯飯好似啲大鍋米線咁大碗，豬潤多、肉片多，唔使講，飯都好多。疫情仍在，大家各自食，味道就無問喺點，但見老友清晒成碗，應該差唔得去邊。

咖喱牛腩飯 $52

另一位老友就揀咖喱，惹味吖嘛，同樣，又喺餸多，飯更多，有成兩碗飯。邊食聽友人讚個咖喱唔錯，雖然喺港式咖喱，咖喱味有少少單薄，但啲牛腩大件又鬆化，加上好多蔬菜配料，整體嚟講都OK。

乾炒牛肉麵 $52

乾牛河就食得多，見有乾牛麵，又即管試吓，睇樣炒得幾香，食落個味道唔錯，炒得夠鑊氣、香口，啲麵條有豉油皇炒麵嘅感覺，牛肉亦好軟腍，份量十足。唯一較大問題喺好油膩，睇外觀「立立令」都覺得油油哋，食到尾碟底真喺瀉剩一攤油。餐飲要奶茶，漏咗影，但都講兩句，呢度嘅奶茶OK啦，唔算滑，但茶底夠香。

「南山軒」雖然喺由村屋改造，但就唔喺賣環境，而食物多元化，又夠晒大碟，絕對喺填肚之選，所以，當日都見唔少喺街坊客。但講到食物質素，單以碟頭飯嚟講，叫做不過不失咁啦，但勝在可以擺單車，方便到我哋呢啲假日單車友。

個人評分
味道：6/10
環境：6/10
服務：6/10
抵食：7/10
平均每人消費：HK$52

餐廳資料：
南山軒 Nan Shan Hin Private Kitchen
元朗黃屋村178號
2160 3188