丼丼屋 Dondonya：「丼」年今日

疫情緩和，戲院開番，所以，趁啲免費電子戲票就快到期，「拿拿淋」過嚟青衣城UA快快手用咗去。兩公婆睇完戲，就順道晌青衣城搵城，眼見二期嗰邊啲餐廳好多人排，所以，過返嚟一期睇睇，因為選擇又多啲。最後揀咗「丼丼屋」，因為老婆話好耐無食過啲日式丼，其次，睇見門口無乜人排，小弟就唔喺好鍾意為一餐而排餐懞。

室內環境一派簡潔嘅和風裝修，淺木色系嘅枱櫈，少少日本農村相掛晌牆上作點綴。基本嘅防疫都有做，不過，四人枱中間棟塊大膠板當為兩張二人枱，呢啲都喺走法律罅嘅做法，實際防疫效用唔大，因為，坐晌我哋隔離兩位後生仔就大聲講大聲笑，仲咳咗幾聲，如果佢哋其中一個喺隱形患者，恐怕小弟中簽率非常高。

餐牌只喺一張白底黑字中英對照嘅餐牌，可以講喺無咩設計，有別一貫日本餐廳嗰種嚴謹、認真。

不過，晌入門口時，見到門旁有個人氣排行榜，嗰時，我哋已諗定好食乜。

蜜桃茶（免費）

餐牌左上角，已寫到明有免費果茶奉送，所以，我哋都無再特別點嘢飲。初初送上兩杯「奶茶」嚟，以為送錯，原來就喺所指嘅免費果茶，成杯凍奶茶咁款，但一入口就認得出，又幾香蜜桃味喎！

名古屋鳥開親子丼 $83

喺我哋嘅概念上，親子丼等同滑蛋雞肉飯，但眼前呢碗我就會叫佢為窩蛋雞肉飯，原本喺老婆所點嘅丼飯，但佢唔食生蛋，結果，隻「窩蛋」就過戶咗俾我。除咗變「窩蛋」之外，雞肉亦唔多，大概4、5嚿左右，整體味道都還可以，雞肉都嫩滑，喺有少少鹹。事後再上網查查，「鳥開」喺名古屋一家有名氣嘅雞肉料理專門店，其招牌嘅親子丼就喺滑蛋以外，再多加一隻生雞多，所以，你都唔可以話佢哋俾錯，喺小弟見識少而。

滑蛋吉列豬扒丼 $98

我就鍾情吉列豬扒，貪其香口嘢，確實，睇賣相整件吉列豬扒都炸得好金黃，唔會好油淋淋咁，而且，啲滑蛋亦炒得好對辦，飯量又十足。

先試吓啲豬扒，果然外層極之甘香鬆脆，絕無油膩感，而肉質則軟腍且鬆化，做得具水準。

飯粒拌上滑蛋，之後再加埋老婆醒我嘅生蛋，所以，每口飯都寧舍香，然後，飯粒嘅質感覺得唔多似珍珠米，欠缺平常食日本米嗰種黏糯感。

事後，老婆話我哋好多年前都試過「丼丼屋」嘅旺角店，但小弟真喺無乜印象，更惶論食過乜，只好講句當年今日。

個人評分
味道：7/10
環境：7/10
服務：7/10
抵食：8/10
平均每人消費：HK$100

餐廳資料：
丼丼屋 Dondonya
青衣青敬路33號青衣城2樓212號舖
3904 1613