港原味 Hong Kong Taste：有「原」再會

上次幫襯Homeland時，已發覺呢家茶餐廳「港原味」，一來個名幾特別，二來從門口望入去，見到幾多本土牆畫，好多都好有集體回憶。所以，今晚趁有事過嚟大角咀辦理，又得一個人，所以，就晌度簡單食餐晚飯先再打道回府。

入到嚟，有時間可以慢慢睇番啲牆畫，真喺畫得好有心機，所有畫作都喺反映昔日本地唔同場景，對於小弟呢啲年紀嘅人，份外有共鳴感。而餐廳嘅枱櫈編排，亦比一般茶記無咗逼夾。

餐牌好大本，好多頁吓，好在有啲外賣單張攞，貼出嚟就一眼睇晒，又清清楚楚。如大多數茶記咁，乜餐物餐、碟頭飯、小炒、二人四人套餐……等等，甚至連全日早餐都有，亦可留意吓幾款招牌菜。

足料靚湯 +$8

小弟今次會揀啲小炒食，而每款餐都會包熱飲，此外，加$8仲可配多一客足料靚湯，好難講划唔划算，因為出面唔少茶記都包湯包嘢飲。不過，單講個湯，小湯盅奉上，外觀加咗分先，撈一羹，喺蓮藕綠豆湯，真喺勁足料，而且，蓮藕味濃，呢「8蚊雞」抵俾。

芝麻西檸雞 $73

今次得一個，唔使就老婆口味，所以，專登揀呢道西檸雞，因為佢好唔鍾意食，成日話啲汁好假。呢道嘅西檸雞色澤明顯比出面常見嘅深，但睇到落咗唔少檸檬去煮，所以，個汁嘅檸味好清香自然，酸酸甜甜，撈飯都正呀！兼且夠杰身，故每件雞肉都掛滿汁，再者，啲雞肉頗嫩滑，外層仍保持脆口感，炸、炒都出色。

熱奶茶

熱茶記嘅穩膽之選，印象中，晌茶記飲奶茶，都甚少出事，至多喺未夠絲滑，但一般濃郁度、芳香度都唔差得去邊。「港原味」嘅奶茶，亦喺沖得有一手，茶味芳香醇厚，最鍾意都喺啲厚身嘅瓦杯。

大角咀陸續有新樓落成，亦睇到呢區不斷變化，但茶記相信都喺大多港人嘅至愛，因為真喺菜式選擇多，價錢又大眾化。

個人評分
味道：8/10
環境：7/10
服務：8/10
抵食：8/10
平均每人消費：HK$81

餐廳資料：
港原味 Hong Kong Taste
大角咀福澤街18號利奧坊地下G701號舖
5476 8300