尚小館：嚐‧小館

今日過嚟長沙灣，任務喺同親戚有啲交收，兼順便落福榮街一帶買嘢，任務完成後，又要搵地方食晏，沿路向青山道方向行，偶然經過呢間「尚小館」，仲記得之前睇過食友嘅食評讚過呢間賣上海嘢小店，啱啦，都好耐無食過滬菜嘞。

餐廳都屬小店規模，地方唔大，但想做多點生意就自不然有少少逼，不過，環境都算整潔企理。見此時客人唔太多，加上有啲隔板間住，自行搵個自閉位躲埋一角，食得安心啲。雖然睇嚟客唔多，其實，好多外賣客。 

影餐牌時有啲反光，好彩攞咗張外賣單張，有涼拌小食、小菜、飯麵年糕、點心、飲品、客飯餐、粉麵餐、飲品及一張廚師推介菜單，定價都好相宜，始終，幫襯嘅都喺附近嘅街坊多。順帶一提，雖然餐廳人手少，但殷勤嘅服務搭夠。 

醉雞菜飯 $46

醉雞一大碟，菜飯又一大碗，先講啲雞，咁啱咁好彩，俾咗個脾位我，我見餐牌要脾位喺應該貴啲。而啲雞肉真喺好嫩滑，有鮮甜嘅雞味，散發出淡淡酒香，恰到好處，雞皮亦好爽口，最好喺無乜皮下脂肪嘛！

菜飯唔止就咁搵啲菜碎撈飯，而喺啲菜粒處理過，令到啲飯有微微鹹香味，又有啲油潤感，飯粒分明，入口感覺更好。

豆漿（免費）

所有客飯餐、粉麵餐都奉送豆漿，亦可以加錢轉其他嘢飲，但選擇唔多，都喺汽水、熱蜂蜜柚子茶（+$3），或轉凍奶茶（+$5）。豆漿嘅豆味好濃郁，涼涼哋唔會太凍，飲得咖啡、奶茶多，都要飲吓啲健康嘢，加上喺免費跟餐送。

睇見餐牌都仲有唔少小食、特別菜式都幾感興趣，一個人真喺食唔到幾多嘢，有機會再嚟就試吓其他嘢。

個人評分
味道：9/10
環境：6/10
服務：7/10
抵食：9/10
平均每人消費：HK$46

餐廳資料：
尚小館
長沙灣福榮街571號地舖
5139 0817