2013年3月31日星期日
太子小廚餐廳:開運下午茶餐
有啲嘢要同表哥交收,所以返完教會就過去一趟深水埗,因為都有唔少親戚住哩區,所以都會久唔久過嚟,不過每次嚟就每次都會睇到有啲變化,香港真喺變得好急。過開嚟,就順便一齊食埋晏,話食晏,傾吓傾吓都去到下午茶時間。表哥表嫂最常去嘅,就喺佢哋樓下嘅「太子小廚餐廳」,貪間嘢就腳,反正佢哋對食無要求。
尤海姆年輪蛋糕 Juchheim:心意無價
跟三幾個食友相聚,同枱食飯,有講有笑,故然開心啦。仲要有禮物收嘅,就梗喺雙倍開心啦!收禮之事都無話有咩特別原因,只喺友人實在好客,喜將美食化為禮物小心意,與人分享。依份心意,當真無價。所收嘅禮物,就喺一整個嘅尤海姆年輪蛋糕,收到時都幾驚喜架,因為年輪蛋糕都比較特別。之前從食友嘅食評及雜誌,都概略知其由來、創辦、發展等背景,有時一件成功嘅產品背後真喺隱藏著好多感人或辛酸故事。
2013年3月30日星期六
六國酒店大堂酒廊 Lobby Lounge:雨點喺小盆栽嘅甘露,下午茶喺生活嘅滋潤!
星期六其中一個最佳節目,莫過於早上去行吓山,親親大自然,晏晝就食個悠長下午茶餐,好好嘆吓,本應都一切安排好晒,正所謂萬事俱備,只欠東風,可惜依日唔只俾東風我,仲有橫風同橫雨,行山就泡湯,不過下午茶就照舊。因為跟一班食友獲邀嚟六國嘅大堂酒廊,試一試佢啲新出品,叫得新出品,自然帶有一份期待。
2013年3月29日星期五
鳳城皇宴 Fung Shing Banquet Hall:婚前試菜
「婚前」唔關我事,小弟成家立室多年,是日喺幫舅仔搵婚宴場地日啫,成個晏晝晌尖沙咀周圍打轉,之後晌海景嘉福酒店嘅Cafe on M嘆緊「高茶」,就順便總結一吓今日幫舅仔晌尖沙咀搵婚宴場地嘅概況,當中啱日子、環境OK嘅有兩間可考慮,其中一間喺鳳城酒家,所以,就索性晌度食埋晚飯先走,當喺試菜。眾所周知,鳳城酒家以北角及太子兩間為「正店」,其他嘅都喺一班伙計自立門戶夾份大搞所開嘅,而太子嗰間小弟就幫襯多啲,今晚晌「依間」又唔知會喺點!
海景咖啡廊 Cafe on M:高茶變包山?三層變一碟?
早前陪舅仔出尖沙咀睇結婚擺酒場地唔成事,依日再繼續,老婆同姨仔都一齊出動埋齊齊幫佢,成隊人浩浩蕩蕩去唔同酒家踩場,真喺近乎成個尖沙咀行勻,大家都有啲腳攰,一於搵個地方歇一歇兼食個下午茶。啱啱身處尖東百週年噴水池附近,姨仔就話不如去海景嘉福酒店「高茶」啦,佢話未試過,仲話佢請,我依個姨仔一向個性豪爽,既然開到聲明益大家,都無人會反對啦,哈哈!
2013年3月28日星期四
霸王山莊 Kings' Lodg:睇場請食飯
舅仔搞結婚,想出尖沙咀睇吓場,開聲叫埋小弟幫吓眼,做姊夫嘅梗喺要撐啦,所以是晚就聯同埋未來弟婦(有啲話正式應該叫「舅嫂」,中式稱謂有時都幾複雜,好彩依家都直接叫名多),三人行嚟咗霸王山莊,唔喺晌度睇場,嚟醫肚啫!
2013年3月24日星期日
2013年3月20日星期三
2013年3月19日星期二
Fiat Caffe:慢食.快樂美意
提及意大利,講波我就識,曾幾何時喺國際米蘭粉絲,不過已經喺講緊馬圖斯、布林美、奇連士文德國三劍俠嘅年代。講車?幾個專有名詞乜乜渦輪增壓系統,物物擾流器…都喺睇日本動漫「頭文字D」度聽過吓,實際對車嘅認知就真喺小學雞都不如喇!但嚟到意大利快意房車個陳列室,竟然可以唔講車,講食一樣得,因為由太古引入嘅快意,跟飲食嚟個互相串連,搵咗同系集團酒店嘅餐飲顧問David Laris當指導,設計菜式,開咗晌香港首間Fiat Caffe。
2013年3月17日星期日
馥軒 Empery Bakery:良心何價?麵粉貴過麵包!
「麵粉貴過麵包」,相信大家都知,基本上依個道理喺唔多可能。一個麵包嘅零售價,除麵粉成本,仲要計埋燈油火蠟、人工鋪租,咁先有錢賺,盤生意先有得繼續做。依家成日聽到哩句嘢,都喺講香港啲地價,發展商買入嘅地積呎價(麵粉價),仲貴過啲同區二手樓嘅巿場呎價(麵包價)。但如果我話你知,$5兩個有餡包,唔喺迷你裝喎,喺正常大過個拳頭嗰啲喎,唔知你會唔會有種「麵粉(計埋燈油火蠟、人工鋪租)貴過麵包」嘅感覺呢!
2013年3月16日星期六
荔灣小食車仔麵:我的星期六美孚早餐 ~ 地踎小鋪唔多掂
好多人覺得住美孚嘅有錢人多,不過,窮人亦都唔少,所以一啲地踎小鋪一樣有市場,定價但求大眾化,垃垃雜雜乜都賣,新開幾個月嘅「荔灣小食車仔麵」就喺一例。原先依個鋪位,喺個菜檔,賣啲菜都幾平架,轉手之後竟然喺開咗檔賣粉麵、車仔麵、港式早餐、碟頭飯嘅小店。
家常便飯 Home-made Cuisine:我家便飯無咁豪
講開家常便飯,老婆就唔嫌麻煩鍾意晌屋企煮,因為真正做到無味精、少油、少鹽,我哋所做嘅菜式真喺好家常,蒸鯇魚、蕃茄蛋、煎吓紅衫、豆豉蒸排骨、榨菜蒸肉片、煎雞翼、蝦殼碎蒸水蛋、灼吓菜芯、生菜……等等。今日幸運被抽中,出席非一般家常嘅「家常便飯」新店優先試食會,試試佢嘅菜式有幾「家常」?本應試食會可以帶一個朋友去,最可惜喺老婆唔得閒,要小弟單拖一個,所以等我食埋佢嗰份!
2013年3月15日星期五
火鍋本色 Hotpot Instinct:彈丸之地
以往食火鍋都喺同班老死去新星任飲任食,經濟實惠有數圍吖嘛。不過,最近有啲走運,無啦啦一個月內獲邀試咗兩間唔同特色嘅火鍋店,之前晌天后琉璃街嘅一鍋,品嚐過店方誠意打造嘅台日式精緻小火鍋;其後,嚟到北角嘅火鍋本色,品嚐以用料新鮮及高質為本色嘅火鍋料理。
2013年3月10日星期日
2013年3月8日星期五
萬麗咖啡室 Cafe Renaissance:老細出錢我哋出力.四傻喪食
睇標題就知依次喺有大食大,公司年年週年飯,雖然食親都喺好嘢貴嘢,但同事都唔多想去食,皆因一堆老細在旁,豈能食得開懷。今年卒之爭取到撇甩老細嘅良機,同事自行食番餐,可以如此盡興,當然要喪食,為免喜好不一諗食乜咁麻煩,自助餐實為不二之選,最後,鐵定晌灣仔嘅萬麗咖啡室,一行4人,一收工即趕赴現場,一於上演場「四傻喪食」。
2013年3月7日星期四
樂宴 Rakuen:脂味滋味沖繩牛
2013年3月5日星期二
樂宴 Rakuen:快樂的沖繩宴
2013年3月3日星期日
八一蕃巴蜀烤魚店 Yaichi Ban Bashu Grill Shop:激鮮鯇魚湯底
晌荃灣鱟地坊嘅八一蕃,喺巴蜀烤魚專門店,咩叫「巴蜀」?咪即喺四川,「巴蜀」個名晌先秦時期所存在於四川地區嘅兩個國家:巴國同蜀國,小弟中史極水皮,點會識依啲歷史嘢吖,都喺晌網上搵搵同大家分享吓。四川其中一道名菜「水煮魚」,小弟晌重慶山區工作時都領教過,辣嘢唔多啱小弟,所以八一蕃開咁耐就過門不入。老婆跟啲好姊妹晌度食過米線,話好正,有辣有唔辣,所以趁個星期日返佢嗰邊教會時就嚟食晏。
訂閱:
文章 (Atom)