合利（洪記）茶餐廳：「合」味道午餐

又喺周六嘅行山日，今回老婆想挑戰吓，所以，由屯門西鐵出發，經屯門徑、虎地郊遊徑行去「藍地灌溉水塘」，點解講挑戰？因為無經較易行嘅「彩虹欄杆」一段，反而入咗山沿水塘邊行到壩位，真喺堅多梯級上上落落，最後，我哋一行3人都順利完成。剛好出番到藍地大街時值午餐，原本意屬「Thre3 Concept」或「意料之外」，但兩間都好多人晌門等緊位，都唔知要等幾耐，加上望入去地方窄逼，我哋都行到攰，最想喺坐吓、攤抖吓，見「合利」地方大，人唔太多，又喺茶記，仲啱我哋。

無乜裝飾，簡單嘅茶記格局，兩大邊喺卡位，中間就喺啲長枱，不過，見到有啲摺枱收埋一旁，整體望上去啲枱亦唔喺拍到滿滿，大概因疫情關係，拍得鬆動啲，啲客又安心啲。

牆上貼滿菜式紙，喺茶記特色，另一懷舊特色就喺將菜牌攝入枱面嘅玻璃度，老實講，反晒光好難影，幸好有啲外賣紙拎，貼出嚟就一清二楚，有咩揀，咩價位。

此外，見佢哋仲有啲比較具特色嘅特價客飯，又成為我哋嘅選擇目標。老婆擔心一個飯餐食唔晒，所以，我同佢就一個飯餐搭一客三文治就應該啱啱好，疫情之下就避免「些牙」食，故此，朋友就當然自己嗌自己食啦。

例湯

特價客飯包例湯及餐飲，店員先嚟一大碗例湯俾我哋，一般而言，一啲舊派茶記嘅例湯來來去去都喺豬骨煲乜乜，今回煲木瓜，味道幾清潤，亦唔會泛晒油，算喺製作有誠意。

沙薑雞飯 $54

友人選了沙薑雞，睇睇啲雞嘅質素，茶記即喺茶記，飯又多，雞又多，老友話啲雞幾嫩滑，皮薄脂肪少，食落唔似冰鮮雞，加上配沙薑，撈飯更喺一流，呢個價，包湯包餐飲，抵食。

蠔仔肉碎泡飯 $54

幾款客飯，我哋揀咗泡飯，因為濕濕地易入口。整整一大碗，果然份量十足，而且，有好多蠔仔，啲蠔仔都幾肥美、厚肉，入口有蠔味，個湯嗒落似喺魚湯，有朕朕鮮甜味。

蛋牛治 $22

泡飯同老婆一人一半，我就再加多份三文治，唔使多講，睇相都見到交足貨，炒蛋、鹹牛肉塞到滿滿，拎起嚟都幾墜手，而且，啲蛋仲有少少滑蛋嘅效果，配合鹹牛肉，小弟個人認為喺茶記中除餐蛋治之外，另一款絕妙配搭。

凍奶茶（餐飲 +$2）

友人飲凍檸茶真喺無咩嘢好講，而小弟所揀嘅凍奶茶絕對喺呢度嘅名物，當然，我都喺睇到牆上一則推介先咁講，大大隻字寫住「明報副刊及嶺大研究飲食文學及文化」特別推介，加上本身一向都鍾意飲奶茶，又點可以唔試吖。

當行完山，出咗一身汗，飲凍嘢雖然唔多健康，但真喺會好爽。杯凍奶茶飲落真喺幾得，茶底確喺頗芳香馥郁，落奶嘅比例又恰好，奶茶滑過喉嚨都仍有種餘韻嘅感覺，連老婆都讚！

「藍地灌溉水塘」有港版「青池」美譽，而且，我哋揀咗入山嘅一段，一路由上游行到水霸位，沿路有唔少位置可以影到石澗，當然同大家分享一下當日行山嘅風景啦！ 

雖然，無試到原先想試嘅心水餐廳，但嚟到「合利」，坐的安心，食嘅，飲嘅，都稱心，就算食完，都唔擔心被人催埋單。

個人評分
味道：9/10
環境：6/10
服務：6/10
抵食：8/10
平均每人消費：HK$40

餐廳資料：
合利（洪記）茶餐廳
屯門藍地大街38號
2461 7160