Amina² Cuisine：有伴同行10載情

以前無記有套電視劇「巾幗梟雄」，主角柴九有句名言：「人生有幾多個十年」，之後成日被人攞嚟引用。講人生，小弟就已經過咗好幾個十年，不過，講人生嘅「另一個階段」，同老婆啱啱渡過咗第一個十年，所以，睇見唔少食友對Amina² Cuisine嘅好評，記憶所及，都未同過佢食法國菜，故此，「錫婚」紀念就以浪漫燭光晚餐嚟慶祝一下。

美心西餅 Maxim's Cake Shop：龍蛇混雜賀牛一

前文提要，話說趁過年前，同班死佬朋友晌星廚管理學校訂咗一圍蛇宴，食得非常盡興，順便祝賀部份大佬牛一，所以，「專燈」晌美心整籠「壽包」嚟賀一賀依幾個月生日嘅老死。

星廚管理學校 Star Chef Management School：即煮即食．死佬蛇宴迎團年

曾經同班「死佬」朋友搞過兩年蛇宴飯局，由於依家比較少酒樓會晌秋冬推出蛇宴，所以，近兩年都無搞咯。繼三聖海鮮夜同大埔私房菜，一班老細一時興起又話想搵番次蛇宴，先後問過深水埗嘅蛇王協同蛇王業，大家覺得有點貴之餘，主因喺菜式太「蛇」，10道菜有8道都喺蛇菜，覺得「負擔」太大。後尾搵到富臨都有做蛇宴，但未計茶芥加一，亦唔包酒水，都已經$3,480，即喺埋單四千起計。最後，有提議「星廚管理學校」嘅蛇宴。

813：隱細小店

無睇錯，亦無打錯，喺隱細，而唔喺隱世。通常講隱世，喺啲不食人間煙火，藏晌深山之處，今次分享嘅食店，只喺隱蔽同細小，經過好幾次和宜合道熟食市場（星期日嘅正午時段），感覺總喺「靜蠅蠅」咁，其實裡面別有洞天，只喺旺晌晚市，而日頭呢？今日所見就只有兩家小店有開，一家賣齋菜嘅滿願福聚，另一家就叫813，點解叫813，佢個餐牌有講個由來。

Lab Made Café：再分糕下

上次聖誕期間嚟過一次Lab Made Café，知道佢哋唔單淨賣分子雪糕，更有飲品及甜點，可以嚟迤吓食吓下午茶。不過，嗰次都喺試啲新款雪糕同飲吓嘢，未有品嚐過佢嘅蛋糕，今次則過開嚟，就同老婆一齊晌度食過下午茶。

東海堂 Arome Bakery：好友狂嚐曲（三十）

一班好姊妹真有小弟心，送完Fine Foods嘅「蝴蝶酥雜綿口味禮盒裝」，又送嚟小弟一盒東海堂嘅「和風曲奇禮盒」，所以，之前一篇「好友狂嚐曲」曲奇食評寫咗蝴蝶酥禮盒，依一篇就再輪到寫返篇曲奇。

Kim's Spoon：粗蔘大意

不時都有參加吓U Magazine嘅網上抽獎，但一向都甚少有中獎緣，卒之機會來臨，雖然只喺小小一份韓式海鮮蔘雞湯，唔喺話好值錢，只值一百幾十，不過，總算叫做中吓獎，有運行吓。故此，是晚就「專燈」過嚟荃灣新開無耐嘅Kim’s Spoon「領獎」。

帝苑餅店 Fine Foods：好友狂嚐曲（廿九）

依個「好友狂嚐曲」系列一向都喺寫曲奇嘅食評，今次唔知算唔算破例，寫嘅喺蝴蝶酥。嚴格嚟講，佢都應該唔屬於曲奇，只喺由酥皮演變而成嘅一款經典甜點，但家下好多曲奇餅專買店都會兼做蝴蝶酥，慢慢，佢都好似變成曲奇嘅近親咁。最近，先後兩次收到一大一細嘅蝴蝶酥，咁啱同樣都喺出自帝苑餅店Fine Foods。

Su Casa Chilean Oyster Bar：蠔不講理

有啲人食嘢要講心情（心理），有啲人食嘢就要講狀態（身理），但對住新鮮即開生蠔，好多人就會毫不講理，一餐飯十隻八隻都只喺小事一樁。近年，一間又一間嘅蠔吧加入戰團，就算唔喺主打蠔吧嘅餐廳，一樣加設生蠔供應，有人睇為競爭大咗，其實，亦喺將生蠔推得更普及。今晚，跟朋友嚟到私竇格局嘅樓上店Su Casa，一方面細味鮮蠔，另一方面品嚐多款歐陸菜。

得哥先生 Mr Taco Truck：價廉墨美

講起墨西哥，你會諗起乜？仙人掌?墨西哥闊邊帽？墨西哥包（當然依個有啲抽水）？小弟滿腦都喺一大埋86墨西哥世界杯嘅事情，馬勒當拿嘅上帝之手，巴西對法國嘅世紀之戰，仲有唔少典堂球星，如柏天尼、蘇古迪斯。墨西哥菜嘛，印象中未有一次喺真正嘅接觸，今晚，就走訪中環嘅「得哥先生」（Mr Taco Truck），一嚐正宗墨西哥菜。

皇后餅店 Queen's Cake：好友狂嚐曲（廿八）

之前一篇曲奇都講過，因為朋友經常送贈曲奇，令小弟認識咗唔少曲奇嘅品牌或小店。對皇后飯店嘅印象，都主要喺賣豉油西餐，出名之作有羅宋湯、俄羅斯牛肉……等等，若非朋友送咗一小罌「雜錦曲奇」作為聖誕禮物，孤陋寡聞嘅小弟，又真喺唔知佢都有出曲奇喎。

蛋卷皇后 Eggroll Queen：守后多時

除咗收到老婆個Luna Cake作為生日禮物之外，有個相熟食友都贈小弟一盒「蛋卷皇后」嘅家鄉鮮雞蛋卷，讓小弟又認識多一個專賣蛋卷嘅品牌小店。

Luna Cake：月亮芝味

同屋企人晌荃灣嘅「至尊重慶雞煲」食完飯，估唔到老婆仲預備咗個生日蛋糕，喺Luna（意大利文「月亮」之意）嘅出品「開心果芝士蛋糕」。返到屋企，一齊嘆一嘆依個飯後甜品！之前未曾接觸過依個品牌，只知佢所有原材料嚟自北海道，跟足北海道富良野做法，標榜當地風格嘅芝士蛋糕。好老實，小弟未去過北海道，真喺唔知咩叫富良野風格，只喺用番個人對芝士蛋糕嘅品評感覺。

至尊重慶雞煲 Supreme Restaurant：雞煲．放題

一個月內嚟咗荃灣嘅大鴻輝中心三次搵食，除咗同老婆屋企人上咗12/F嘅常滿提早食團年飯唔方便寫之外，之前一餐喺晌8/F嘅「至尊重慶雞煲」家人為小弟搞嘅慶生飯，另一餐則晌18/F嘅「BBQ Military」嘅聚餐，後兩者都可以跟大家分享吓，先講講 「至尊重慶雞煲」吧！

Outback Steakhouse：Back to the Feature．蜜糖小麥包

老婆晌教會有個相熟嘅年輕人J君，成長過程遇到唔少家庭問題，一直都會關心吓佢嘅成長，不過非親非故，可做嘅始終有限，所以，有機會就請佢食吓飯兼同佢講吓人生道理。小弟自認做人比較迤，凡事隨遇而安，所以無乜人生大道理，道理嘅嘢留番俾老婆講，我就負責付鈔請食飯，故食飯地點都由埋小弟負責，揀上Outback除咗質素穩定，其次知道J君鍾意鋸扒，Outback啲嘢應該好啱佢食。

重慶麻辣燙：燙手新貴？

晌美孚區，以米線為主打（其他餐廳、茶記兼賣嘅唔算數）以前就只得「景村雲南米線」，舊年尾晌隔幾個鋪位就多開咗一間「重慶麻辣燙」，有點擺明單挑嘅局面，因為開晌同街又咁近打對台賣番米線，而且，原鋪位唔喺做開食肆，印象中喺啲診所鋪，夾硬打造為食店。開檔初期，都見幾多人幫襯，為免排隊又要逼，所以，等貪新鮮嘅熱潮降吓溫先去幫襯。

大街餐廳 Main Street Corner Cafe：有口街碑

唔經唔覺，原來香港迪士尼樂園晌2005年9月12日開幕至今，已經將近10歲。小弟唔喺迪士尼粉絲，同老婆入嚟玩，純粹輕鬆吓，我哋都好耐無入嚟，今次都只不過喺第二次啫。園內分開好多主題區，而每區都設有食肆或小食車，咁多間餐廳中，以晌「美國大街小鎮」主題區嘅大街餐廳口碑最好，正所謂有口皆碑，所以，食晏地點就揀依處，今次作為生日飯，點都要坐低慢慢嘆番餐，好好享受吓，亦希望同佢食好少少咁啦。

許留山 Hui Lau Shan Healthy Dessert：公朱同好（十五）

一向收到啲朱古力小禮物，都會公諸同好，不過，依份就有少少例外，因為喺榴槤朱古力，唔喺個個人都啱，出品仲竟然喺嚟自老牌本地甜品鋪許留山，而唔喺咩朱古力專門店，所以，今次無分俾其他人試，只留番我哋倆公婆食！

HeSheEat Cafe：糕WentGone

友人都算喺甜品迷，一直話好想試HeSheEat，所以，專燈搵咗小弟茶聚吓之餘，想向我討教一下食甜品之道。哎呀，討教就實在言重，叫比一般人多機會食得多啲甜品，又好有興趣整吓咁，當喺大家彼此切磋吓啦！

麵包秀 Bread Show：後起之秀？

間唔中都收到一啲相熟食友嘅零食、曲奇、朱古力……等等小禮物，收麵包都喺第一次，食友話試過好好味，所以都醒一條俾我試試，認真多謝晒。雖然，平日都食唔少麵包，不過，一向都好少為麵包寫食評，不過，今次因為收到喺食友心意，所以，都認認真真寫番篇。

泰閣 Koon Thai Cuisine：到會泰滋味

早前跟導師餞行一大班朋友晌油麻地嘅「泰閣」食番餐，隨手拎咗佢啲到會單張，其實舊年晌灣仔嘅曼谷泰菜食飯時，已知佢哋有搞到會。正正同教會朋友搞個元旦大食會，唔想嚟嚟去去都喺快餐店嘅到會或食薄餅，加上上次晌「泰閣」嘅經驗，知道佢哋做泰菜嘅質素唔差，所以，一於搞搞新意「泰菜到會」。