印象中，黃金海岸酒店嚟嘅次數一隻手掌數得晒，因為位置相對我嚟講都喺有隔涉，之前嚟過兩次都喺食自助餐，所以，今次到訪「海岸扒房」實屬第一次。由於餐廳位處大堂後方，所以，依然有高樓底，環境闊落開揚，枱與枱之間嘅空間感極大，又有偌大嘅落地玻璃窗對住出面嘅園林景，景觀相當唔錯。
簡單嘅餐桌佈置，而枱上又放置咗鮮花作點綴，感覺立時唔同晒。由於疫情關係，雖然喺跟團，但盡量都安排相熟嘅坐埋一枱，否則，就二人一枱減低交叉感染風險。
話就話喺團餐，但一啲都唔失禮，都喺正統嘅三道菜午餐，不過，跟餐廳是日三道菜午市套餐嘅內容唔同，但即管影埋出嚟俾大家參考。而我哋所享用嘅套餐，可以講都喺大同小異，湯品或沙律一樣任擇其一，主菜就四選一，加上甜品，並奉送咖啡或茶。
麵包籃 應該叫麵包盒，以小木盒載住3款麵包，都喺比較硬身嘅歐陸或麵包，雖然，唔喺人人都鍾意呢類包，但就啱晒我，煙韌有麵粉香，搽牛油，或者伴湯都好。
松露忌廉湯 餐湯、沙律只可以二揀一，不過，我哋兩個人就可以一人嗌一樣，試晒兩款。酒店級即喺酒店級，個忌廉湯打得細緻綿滑，菌香極之突出，而且，夠熱辣，老婆勁欣賞。
海鮮芒果沙律 好意外喺個份量，道沙律大大碟又有不少海鮮食材，甚有睇頭。啲芒果切成薄片墊底，十分香甜，而海鮮有大蝦、三文魚、魷魚、青口配上火箭菜及櫻桃蘿蔔，又豐富，又好食。
煎挪威三文魚配配莧菜、甘筍茸、烚薯及香草忌廉汁 主菜方面，老婆揀咗挪威三文魚，賣相好精緻，甘筍茸做成好似個汁底咁，啲三文魚沾上甘筍茸或香草忌廉汁都得，同樣好夾，就算喺啲烚薯，唔止裁過嚟，更調咗味，唔會「淡茂茂」；而件三文煎得一流，外脆內嫩，魚肉柔滑得很，仲充滿油香，卻不覺得好膩。
焗菠菜磨菇意式粉卷配芝士忌廉汁 小弟就揀咗款少食到嘅意式粉卷，一上枱，已感受到嗰份滾燙，熱力逼人，芝士嘅香味四溢。意式粉卷有啲似千層麵，不過，喺捲起咗、薄身咗嘅千層麵，口感有咬口，裡面填滿菠菜及蘑菇，加上掛滿溶透嘅芝士，食味一流。
熱咖啡、熱檸茶 主菜過後，就送上餐飲，不外乎一般嘅茶啡。可能由於團餐關係，加快個服務流程，所以，喺唔喺都擺碟檸檬片，之後先問你飲啲咩。由於仲有甜品，所以，一於襯番杯咖啡，而咖啡感覺就普通啲，好似平常食自助餐時嗰啲質素。
藍莓芝士餅配士多啤梨雪糕 最後上枱嘅甜品一啲都無「求其」，賣相都無「馬虎」。芝士餅嘅質感好夠挺，但不失軟滑，面頭嘅鮮藍莓醬做得酸甜細緻，士多啤梨雪糕亦唔哋普通貨，入口有奶香，仲有微微果肉。唯挑剔餅喺消化餅底略嫌厚咗少少。
一頓既豐富，又美味嘅午餐，為是次嘅本地小旅遊劃上完美句號。若非老婆稍後仲有行程，可以選擇晌度離隊，再晌黃金海岸周邊行吓，話晒平常真喺好少會入嚟。
個人評分
味道：9/10
環境：8/10
服務：8/10
抵食：8/10
平均每人消費：HK$262（參考價）
味道：9/10
環境：8/10
服務：8/10
抵食：8/10
平均每人消費：HK$262（參考價）
餐廳資料：
海岸扒房 Gold Coast Prime Rib
屯門青山公路1號香港黃金海岸酒店大堂
2452 8636
海岸扒房 Gold Coast Prime Rib
屯門青山公路1號香港黃金海岸酒店大堂
2452 8636
沒有留言:
發佈留言