Espresso Alchemy：用心良「虎」

又喺老婆返學嘅日子，不過，呢一季就返完，佢可以抖抖，而小弟一支公晚飯亦暫時告一段落，所以，今晚唔好待薄自己，食番餐好嘅先，仲嘆杯靚咖啡。所以，過咗嚟海港城嘅「Espresso Alchemy」，一來食過佢啲出品，穩打穩紮，二來幾欣賞佢哋啲鮮奶咖啡，三來就喺食完方便我落柯士甸搭西鐵返屋企，仲可以晌上面拍埋卡搭港鐵慳兩蚊。

餐廳嘅環境可以講跟商場空間連成一體，下單嘅櫃位喺較「入鋪」嘅一邊，簡潔明亮。如大多數嘅咖啡店，都會兼營售賣不少咖啡嘅相關產品，故櫃枱旁就擺放咗唔少濾杯、濾紙、咖啡豆……等等物品作零售。 

而呢一邊側旁就安放咗一大張共享餐枱，當然，依家晌限聚下，就唔能夠一大棚人坐埋一齊，但疫情過去後，就方便三、五知已嘆吓咖啡聚一聚，又或幾個同學嚟傾吓功課。

至於另一個用餐區，就座落於鋪面對出嘅商場空間，地方都幾大，拱門形嘅窗框，加上波波燈，裝修上帶點歐陸風，予人感覺幾閒適。 

因為都唔喺第一次光顧「Espresso Alchemy」，所以，飲品及食物都大概知道有啲乜。佢哋嘅主力就梗喺賣咖啡啦，種類十分之多，此外，仲有多款特色飲品、手工啤、朱古力、茶品……等等。 

食物方面，選擇上亦不少，印象中，對比以前好似多咗，包括有沙律、三文治、多士、全日早餐、漢堡、意大利三文治、意大利麵、意大利飯及甜點。 

選購食物採半自助形式，晌收銀處落單後，收到號碼牌，就由店員將食物送上，亦不收加一服務費。 

基本上，店員都會為你送上餐具，不過，額外嘅餐具、清水、紙巾、調味料……等等，可以晌自由櫃枱隨意取用，當然，唔好濫用，唔好浪費啦。 

鮮奶咖啡 $38

佢哋嘅鮮奶咖啡口味唔賣花巧，就只有基本嘅鮮奶咖啡，無話焦糖呀、玫瑰呀唔同口味，咁我亦唔使多心諗揀邊款。然而，製作甚有水準，雖然拉花只喺拉個心形，但睇得見花紋好細緻，而且，對稱精準，表面亦見平滑，無話起泡泡。小呷一啖，完全晌無攪過情況下，已飲得出嗰份均勻感，喺撞奶泡手勢夠好，而咖啡醇厚帶微微果仁香，有外表，有內涵。

虎蝦車厘茄意大利飯 $128

以前都曾經食過佢哋嘅意大利麵，對佢哋嘅出品頗有信心，所以，今次就試其意大利飯，其實，意大利飯好易食得出一家店做菜水準去到邊，因為易學難精。

個意大利飯賣相平實，但單喺外觀已覺得飯粒做得夠濕潤，入口果然有水準，米心口感煙韌，卻唔會有種「生米」嘅感覺，而且，滲入濃郁帶甜嘅茄香味，當中嘅甜味正正喺車厘茄嘅特別之處；虎蝦已去晒殼，食用方便，兼且又大隻，又厚肉，質感爽而好有鮮蝦味，真喺好得喎！

環境及食物都無咩挑剔位，店員都好有禮，對今餐晚飯都好稱心滿意，當然，如果晚市有啲主食配咖啡嘅組合優惠，慳番十蚊八蚊都好吖，哈哈！

個人評分
味道：9/10
環境：8/10
服務：8/10
抵食：8/10
平均每人消費：HK$166

餐廳資料：
Espresso Alchemy
尖沙咀廣東道3-27號海港城港威商場地下G104號舖