家下好多餐廳做防疫都好「馬虎」，見過唔少餐廳啲隔板「求其」到離譜，又細塊，又單薄，純粹做個樣，無實質作用。而「英輝」以茶記嚟講，算做足100分喇，一入門口有探熱機，成大大支消毒搓手液放晌枱面，卡位嘅椅背撐起一大塊膠膜做分隔。最搞嘢喺中間一字長枱，直情巨型膠膜隔開兩邊，跟朋友隔住膠膜對住坐，理論上，點傾偈都唔會「噴到口水」，哈哈！
如果想坐得開揚少少，可以揀鋪前嘅位，明顯已減少枱嘅數目，增加咗啲距離，不過，間隔有限，唔安心嘅話最好揀番裡面卡位，坐得外面都喺啲單丁客。
如舊式茶記，牆上貼滿形形式式嘅食物，不過，亦有一張過嘅餐牌俾客人慢慢睇，顯示晒所有乜餐物餐，以及一啲碟頭飯，應有盡有。我哋去到時，接近2:00pm，老細好無所謂咁講，午餐、快餐、下午茶餐乜餐都叫得，當然，早餐除外啦。最後揀咗中式下午茶餐，喺啲迷你炒粉麵，但好搞嘢，供應時間喺2:00pm-8:00pm，真有個性。其實午餐都喺，供應時間喺11:00pm-8:00pm，無打錯，真喺去到晚上8點。落好單，啲伙記真喺好醒，刀叉連埋杯熱水送嚟，俾大家洗洗餐具。
迷你乾炒黑椒雞絲意粉 $39 叫得迷你，就梗喺細碟少少，不過，喺即點即炒，夠晒鑊氣。質素方面，確喺炒得唔錯，充滿黑椒香，好惹味，雞絲亦唔少。食到尾，喺有少少油咁啦，喺唔少茶記通病。
熱奶茶 特別鍾情呢啲舊式瓦茶杯，厚身保溫力強啲，而奶茶入口芳香，茶奶比例啱啱好，睇啲茶色都覺得對辦。
照慣性，又分享少少呢次行山嘅相片，算喺有少少難行，尤其部份落山段要小心啲，而景觀方面，一面喺清水灣景，幾舒服，另一面就喺將軍澳。
上次都喺因為入西貢行山而嚟到牛池灣食嘢，發掘咗「寶福」，今次就發掘咗「英輝」，順便可以行埋牛池灣街市睇睇有無平嘢買添。
個人評分
味道：7/10
環境：6/10
服務：8/10
抵食：9/10
平均每人消費：HK$39
味道：7/10
環境：6/10
服務：8/10
抵食：9/10
平均每人消費：HK$39
餐廳資料：
英輝咖啡屋 Ying Fai Coffee House
彩虹牛池灣金池徑29號地下
2329 5036
英輝咖啡屋 Ying Fai Coffee House
彩虹牛池灣金池徑29號地下
2329 5036
沒有留言:
發佈留言