南記冰室 Nam Kee Cafe：不過不「室」

一講開「南記」，啲人就想起食米線嘅「南記」，不過，今次幫襯嘅「南記」卻喺家冰室，即喺茶記，其實美孚都有一間，但都已經執咗。同老婆晌屋企食咗個豐富早餐，所以，跳咗餐晏仔，而出外有啲家品想睇睇，路經葵興一帶，就幫襯咗「南記」食個下午茶。

由於餐廳位處工廠區內，雖然，隔條大馬路都有屋村，但嗰邊都有唔少食肆，所以，晌星期六工廠區就變得非常之靜，連帶幫襯嘅人都少，尤其下午茶添。而餐廳嘅防疫都OK，加上人少，啲客揀位都識自我加闊社交距離。 

調味料、餐具都放晒晌枱邊，自由取用，而餐具都有膠盒冚住，自不然比唔冚嘅好，當然，安全起見，就梗喺叫阿姐俾多杯熱水嚟消毒一下啲餐具啦。 

下午茶餐有啲咩揀，其實，全日都喺呢個假日精選餐牌，只喺下午茶時段會收平啲。不過，老實講，因為都喺啲炒粉飯麵，無一啲輕食類，所以，唔會有啲廿零蚊嘅茶餐，大部份都喺四十幾，仲喺無包嘢飲添，所以，比起一般嘅茶記定價貴。 

蒜香雞扒湯河 $40

湯河及雞扒嘅粉量好足，而河粉好滑溜，雞扒煎得香口，又勁有蒜香，湯頭亦無話「淡茂茂」，當然，驚喜就無，質素屬平穩咁啦。

星洲炒米 $47

至於個星米睇落炒得有鑊氣，又幾靚仔，有別一啲下午茶餐會份量少咗，呢碟都屬正量份量。食落，又果然好惹味，有咖喱嘅香氣，亦落得好夠料，但同樣有常見問題，喺油咗啲。

熱奶茶、熱檸水 @+$3

唔知有無發覺，杯檸水用鐵匙，我杯奶茶就用膠羹，用埋鐵匙環保啲就好。講番杯奶茶，茶色感覺有少少淡，茶底算唔上話好濃好濃郁，但飲落都OK。

我記得之前晌美孚店食過都喺俾個OK佢，今次呢？都只喺俾到個OK咁，因為，整體而言，都喺不過不失。

個人評分
味道：6/10
環境：7/10
服務：7/10
抵食：7/10
平均每人消費：HK$47

餐廳資料：
南記冰室 Nam Kee Cafe
葵涌葵昌路72-76號Life@KCC地下03-04號舖
6516 9990