囍越 What The Pho：悠閒歲「越」

前文就講到是日因為嚟個大西北遊，一張西鐵全日通走勻幾個點，中午晌荃灣嘅「ASAP」食晏，然後西鐵轉輕鐵入到良景，再上「港版大峽谷」嘅良田坳，最後，返到南昌站嘅「V Walk」食晚飯，就結束今日西鐵線大西北之行。點解嚟「V Walk」，一來張全日通包到去南昌站，二來「V Walk」真喺未嚟過，咪當行吓囉。因為行咗成日，老婆想食啲濕濕哋嘅嘢，所以，就揀咗食越南湯粉麵嘅「囍越」。

從門面望入去，都估計到間餐廳想走高檔少少嘅路線，一室柔和嘅燈光，天花、牆身都睇到花過心思，尤其其中一幅牆畫，所畫嘅雖然唔多似一啲地標性建築，但多少都有種越南風情。 

枱面上已放有出名嘅「是拉差」甜辣椒醬及魚露，兩者都喺經常晌啲越南餐廳見到嘅調味料。 

張點菜紙攤關好大張，都唔知影唔影得晒，影唔影得清楚。如果以分類嚟計，就有沙律、米紙卷、湯品、小食、蔬菜、咖喱、越式湯粉或飯類、甜品及飲品，選擇都唔少。我哋都簡單啲，一人一個湯粉加杯熱飲。 

生熟牛肉牛丸湯檬 $78

大大碗越式湯檬，可謂份量十足，啲生牛肉放晌湯面，仲見到其粉嫩嘅肉色，唔會暗暗啞啞，感覺都幾對辦。先飲啖牛骨湯湯，算幾香濃不膩；再試試啲牛肉，質感嫩滑，又有肉香，牛丸亦幾爽口，檬粉即喺好似我哋食開嘅米粉，並伴有九層塔、洋蔥，雖無甚驚喜，但都合格有餘。

豬耳扎肉手撕雞湯金邊粉 $78

老婆就要咗呢一款我哋都誤以為有豬耳、扎肉嘅金邊粉，其實，啲扎肉喺混入豬耳元素而已，所以，食落啲扎肉多添一份爽口感，而手撕雞肉比預期嫩滑；金邊粉等同窄身啲嘅河粉，口感頗滑溜，湯底喺清雞湯嚟，香而不濁。

除咗點菜紙所顯示嘅飲品之外，由於天氣轉冷，佢哋仲有另一張好有暖意嘅生薑蜜熱飲系列，配搭都幾有特色，杯杯都喺賣$34，唯可惜無話跟粉麵有啲優惠價。 

桂圓生薑蜜 $34

小弟較鍾意桂園，所以要咗杯桂圓生薑蜜，桂圓唔喺罐頭貨，不過，落嘅份量少咗啲，所以，桂圓味較薄；相反，真喺用咗生薑條嚟做，仲落唔少，所以，薑味就更加冚晒桂圓味。

冰糖雪梨生薑蜜 $34

天氣除咗凍咗，仲有就喺乾燥咗，所以，老婆嗌嘅冰糖雪梨生薑蜜，入口其實真喺幾潤，但你會見唔到有雪梨，大抵喺煲咗啲雪梨水嚟做，但個人覺得再後加啲雪梨落去會更傳神。

整體而言，環境喺幾舒服嘅，食物嘅質素亦都唔錯，但唔會有咩突出嘅賣點，而我哋只喺要咗兩碗湯粉麵、兩杯熱飲，落樓二百四，性價比可以講喺唔高，單以食啲湯粉麵類嘅食物而言，感覺絕喺偏高咗。

個人評分
味道：7/10
環境：7/10
服務：7/10
抵食：7/10
平均每人消費：HK$120

餐廳資料：
囍越 What The Pho
深水埗深旺道28號V Walk 2樓107號舖
2367 2178