90s Lazy：窩夫「懶」知識

同一個鋪位，對上一次嚟大概都3年前嘅事，店家叫「Master Kama」，印象都幾唔錯，原來已經結業咗，感覺有啲可惜。今晚興舊同學短聚食個晚飯，嚟到先知就喺呢個鋪位，轉咗手新店名叫「90s Lazy」，店主可能喺班90後，不過，搞得飲食，就應該唔會喺班偷懶嘅90後。

上到餐廳前，樓下嘅門口位有啲防疫提示，作為負責任嘅人，當然做番足啦。此外，提一提，餐廳只收現金及PayMe，帶唔夠錢或無PayMe，就會出現無錢俾嘅尷尬情況。 

踏進餐廳，分左右兩邊，感覺環境幾好，一室以白色為主調，配以淺木色餐枱櫈，甚有日系嘅裝修風。如果坐到近玻璃窗口位，附送街景。 

餐牌都幾大本，而且，食物嘅選擇都幾多，由沙律、小食、意粉、意飯、漢堡、主菜、甜品……以至到和各式飲品，如咖啡、奶昔、沙冰、有機茶、梳打、酒精飲品，都叫做一應俱全。

此外，晚市時段，有晚餐可揀，A-I共9款，定價$92-$268。不過，再細心睇睇，餐湯或沙律需+$20加配，幾款指定熱飲需+$4加配，其餘特色飲品可以半價享用（唔包酒精類飲品）。而晚餐嘅9款主菜其實晌主餐牌都搵到，咁倒不如唔好咁複雜，凡晌主餐牌點主菜類，均可以加錢配湯、沙律、飲品咪仲簡單得多。 

是日餐湯 +$20

初頭諗住會唔會有啲特色嘅湯品，原來喺熟悉嘅羅宋湯，色澤深紅，睇落都幾對辦。舊同學話味道幾濃郁，酸香味十足，不過，明顯有過鹹嘅問題，所以，飲咗幾啖就放棄。

是日沙律 +$20

小弟就揀咗沙律，反而沙律有點點驚喜，雖然沙律都喺一般嘅田園沙律，沙律菜、車厘茄，再淋點油醋，但唔喺得嗰細細兜，驚喜喺份量方面，再者，啲沙律菜夠新鮮嘅話都唔輸得去邊。

E. 蘆筍大蝦黑松露意大利飯 $110

主菜我就揀個意大利飯，因為可以真正睇到師傅做菜嘅功力，睇樣真喺唔錯，啲飯粒微微濕潤，但賣過百嘅一道菜得一隻大蝦就感覺單薄少少，幸而，蝦肉都爽口鮮甜。啲飯除咗食到意大利飯嗰種煙韌感，黑松露嘅香氣亦不俗，仲混有唔少野菌同蘆筍，整體感覺唔錯。

F. 明太子蟹肉忌廉汁意大利粉 $128

疫情關係，我哋盡量各有各食，「些牙」就免喇。其實呢款有蟹肉我都鍾意，不過，明太子就麻麻，而舊同學就因為有明太子所以揀佢，所以啦，食嘢人人口味不同，各花入各眼。佢讚個意粉做得好，意粉咬落柔韌，無過腍嘅問題，啲忌廉汁既香又綿滑，啱啱好包實晒啲意粉，當中嘅蟹肉算唔少，明太子就帶出一份鹹鮮味。

熱柚子蜜 +$4
天氣有點乾燥，所以，舊同學就要杯柚子蜜嚟潤吓，現成貨沖出嚟，都無咩太多評語喇。

鮮奶咖啡 +$20

因為點咗甜點，所以，嗌杯鮮奶咖啡嚟襯。拉手嘅手勢唔算好好，面面仲有好多泡，花紋未夠細緻及唔對稱，不過，唔喺晌咖啡店就唔會太高要求。反正，入口都幾醇香幼滑，都收貨架啦。

法式窩夫配雪糕 $52

窩夫都喺小件形式，配上雲呢嗱雪糕（無其他口味）及忌廉，賣相就普普通通咁啦，而較失望喺啲窩夫唔熱（暖都稱唔上）又唔脆，忌廉都喺現成唧唧貨，質感比較瀉身，雪糕亦似喺普通貨色，感覺整道甜品都喺hea做。

環境及服務都喺好嘅，覺得餐廳都喺有心做，老實講，做咩都好，都要講誠意同熱誠，前者喺講用唔用心，後者喺講夠唔夠堅持。食物方面就仍有進步空間，相信再改善吓，出品嘅性價比應該可以更高。

個人評分
味道：7/10
環境：7/10
服務：8/10
抵食：7/10
平均每人消費：HK$195

餐廳資料：
90s Lazy
旺角山東街50號1-2樓
2341 0288