湯加 Soup Plus：「Soup」皮晚餐

承接上篇「南山軒」嘅食評，提到今日同老友晌新界踩單車，由大埔、粉嶺、上水一直踩到去元朗，再原路回程返大埔還車，過足晒單車癒呀！晚上，因為老婆有事出咗紅磡一帶，所以，就約佢晌「都會商場」食飯，方便一陣搭番西鐵走。今次就由老婆推介我食呢間「湯加」，佢話啲魚湯米線好正。

其實，呢個商場入夜後好靜，所以，餐廳內嘅客人唔多，其實仲啱我哋，尤其不時仲有啲無源頭個案，眼見有啲餐廳完全無防疫意識嘅我哋都會避一避。講番餐廳環境，裝修平實，卻闊落光猛，基本嘅防疫都做到足。 

好似茶記咗，餐具、碗仔、糖包……等，放晒晌枱邊抽櫃，排列得井井有條，可見啲服務態度真喺唔輸蝕，而且，招呼嘅阿姐好好禮貌，放低啲食物都會加句慢慢享用。 

雖然目標喺魚湯米線，但仲有好多嘢食，例如：湯飯、小菜套餐、常餐……等等，又有啲小食加配優惠喎。因為老婆食過，都知道啲米線好大碗，所以，今次我哋嗌一碗米線，加配兩份小食，咁就已經夠晒，唔喺想「縮皮」叫少啲架。 

泰式雞鎚 +$9

一客有兩件雞鎚，最有誠意喺以小鑊盛咗，唔會「求求其其」搵隻碟。雞鎚啖啖肉，而且，質感都幾嫩喎，講明泰式，確喺有唔少香料香味，收你$9，完全收貨啦。

腐皮墨魚卷 +$9

同樣一客有兩件，感覺就有少少油咁啦，而裡面填有唔少墨魚滑，唔叫得好多，但都食到嗰陣陣彈牙感，亦有墨魚嘅鮮味，都OK架。

百秒海鱸魚米線 $69

我哋嘅米線喺原鍋咁上，而米線則用碗仔另上，所以，整體份量真喺非常之多，夠兩個人食。唔好睇以為有兩條鱸魚，但其實師傅好刀功，好似片「雙飛」咁，將條魚鎅開一半，但啲魚肉堅嫩滑，有魚鮮味，魚湯底亦好鮮甜，蘿蔔清甜，食落無渣，至於啲米線，入口滑溜有米香，老婆果然無介紹錯。

黑糖涼粉奶茶 +$15

叫粉麵可加配餐飲，熱飲+$7、凍飲+$10、特飲+$15，小弟一向都好黑糖，所以，就試試呢一杯帶台風嘅奶茶，要少甜、少冰。睇色澤，杯奶茶都幾對辦，入口都唔錯，茶底比預期香；睇外觀喺落咗黑糖再倒奶茶，所以，製造唔到啲「虎紋」效果，但味道還是不錯。但涼粉比較爽身，唔似仙草咁「滑嘟嘟」，個人感覺，夾奶茶好似差少少咁。

雖然話好又一餐，唔好又一餐，但最緊要喺食到啱自己心水嘅。貴有貴食，平有平食，唔一定貴嘅就好，平嘅就差，今晚簡簡單單，一碗米線，兩個小食，我哋都覺得開心吖。

個人評分
味道：8/10
環境：7/10
服務：8/10
抵食：8/10
平均每人消費：HK$50

餐廳資料：
湯加 Soup Plus
紅磡都會道6-10號置富都會商場7樓747-748號舖
2668 6655