仁芝初 Art of Dessert：性本「膳」

對上一次出嚟旺角食飯已經喺年初細佬嘅生日飯，一來覺得旺角太多人，二來由於疫情關係，就更加避咗啲人多嘅地區。今次若非出嚟旺角買嘢，恐怕都未有過嚟呢邊嘅機會，完成任務，經過這家糖水鋪「仁芝初」，覺得個名幾得意，加上晌門口睇睇，賣嘅都喺較傳統嘅糖水，定價又算相宜，就食碗糖水先走。 

其實，晌門口已經睇到內籠唔大，都喺十零個位，查實食糖水嘅人流轉數快，加上會有唔少外賣生意，都真喺唔需要太大地方。實際上，主要都喺二人枱為主，最有趣相信喺店主啲英雄模型珍藏，放咗唔少晌牆上，驟眼睇真喺唔似糖水鋪。

小弟就幾鍾意佢哋張餐牌，面頁嘅灰底暗花好有本土味，都喺日常見到嘅物件；而內頁嘅糖水款式，全以手繪出各款糖水，且畫得甚像真、甚有個性。

冰糖燉木瓜 $28

秋風起，有啲涼意，想潤啲，就試咗款燉木瓜，不過，講真吖，賣得$28都唔會真喺燉出嚟。然而，入口糖水嘅感覺都算清潤，又無過甜，而木瓜味道清甜，確喺秋涼嘅佳選。

蛋花馬蹄露 $26

好耐無見過呢款懷舊嘅糖水，所以，買碗返去俾老婆試試，再者，外賣有9折嘛，而外賣非用膠碗，而用上較環保，但成本較貴且嘅紙碗，抵讚。至於個糖水，蛋花打得靚仔，馬蹄又切成細粒，爽口清甜，都好食。

依家賣呢類傳統糖水嘅鋪頭可謂賣少見少喇，年輕一輩亦未必欣賞，但人始終鍾意食嘢，尤其好嘢，所以，我成日講，只要食物做得好，總有翻頭客，生意先長做長有。

個人評分
味道：7/10
環境：6/10
服務：8/10
抵食：8/10
平均每人消費：HK$28

餐廳資料：
仁芝初 Art of Dessert
旺角通菜街2Q-2Z號鴻輝大廈地下6號舖
3111 8709