平日晚上嚟「永光中心」都怕怕哋，因為人流太多，排隊等升降機都有排，但假日嘅晏晝嚟感覺就好唔一樣。推門進入第一眼所見就喺吧枱，亦喺食「廚師發辦」嘅最佳位置，因為可以睇到師傅切魚生、揑壽司，以及跟佢哋嘅互動。
而吧位嘅對面有兩組4人「卡位」，裝修好雅致，而且，特別闊落，好適合3、4人嘅組群，比起坐吧枱更方便傾偈。
此外，想私隱度高啲，另一邊有兩個和風個室，都喺放有4、6人嘅大枱，剛好放寬咗可以6人一枱，6人枱就大派用場，不過，個人嚟講，盡可能忍忍唔好約大棚人聚餐啦，減少傳播風險嘛！當然，待疫情消退後，夠人多，包個房嚟聚一聚，不知幾開心。
晌呢啲中高檔餐廳，除咗環境，餐具及服務都喺值得留意嘅一環。一碟、一杯都好古雅，甚至筷子托，都小巧別緻。而服務方面，都好熨貼，侍應既有禮，又不時為我哋添茶及收拾餐具。師傅上菜嘅速度，亦喺恰到好處，令人用餐感到悠閒唔急速。
講番午市有咩選擇，如上文提及，嚟到都喺試其「廚師發辦」，定價$680，包括先付3種盛、刺身5種盛、和食、天婦羅、壽司3貫、汁物及果物，非常豐富吓。
先付3種盛 先分享吓個「廚師發辦」套餐，首先喺前菜，以小木托盤一次過送上3款前菜，而賣相喺一貫日本菜嘅精緻，單喺睇都令人賞心悅目啦。
日本珍珠蠔 唔止器皿靚，擺咁少少食用花瓣，立時都靚好多。有別一般食生蠔嘅食法，加咗少少柚子酸汁嚟調味，卻無蓋過蠔本身嘅蠔味，亦能嗒到海水嘅鹹鮮味，口感又帶點爽脆，喺好有質素嘅生蠔。
胡麻秋葵 秋葵中間嘅黏黏潺潺感未必人人鍾意，但我同老婆又幾啱，淋上大量胡麻醬及灑下木魚碎，食味大不同。
水雲海蜇 中間晶瑩透白嘅喺海蜇，但有別我哋食燒味時嗰啲海蜇，口感卻喺同樣爽脆；而周邊墨綠色嘅喺水雲，其實喺啲藻類，滑滑溜溜咁，好有營養價值。
右口魚薄切 跟住落嚟喺刺身5種盛，先登場喺右口魚薄切，左口魚就食得多少少，右口魚印象中就好少接觸。右口魚刺身切得厚薄均一，足證師傅刀功好，外觀薄透清澈，魚味比較清淡，沾少少酸汁，好有提昇鮮味嘅作用。
粒螺 師傅介紹第二款刺身喺粒螺，當然真身就唔知喺點，但睇樣就幾新鮮。螺肉切好後，再刨上少少柚子皮。螺肉非常爽口，卻又帶點韌勁，喺跟食魚刺身嘅另一種體驗，再者，柔柔滲出柚子香味，可謂神來之筆。
牡丹蝦 好嬌巧嘅賣相，確喺非常吸引，師傅介紹時，仲提到蝦面放咗毛蟹肉及鳥魚子，唔止顏值高，更感矜貴咗。一啖入口，肉質黏黏哋卻又帶有爽身嘅口感，而味道複雜紛陳，極具層次。
深海池魚 處理上唔喺單單就咁切成刺生送上，而喺稍稍炙燒一下，目的喺逼出魚油，因為呢款魚種魚油比較豐盈。炙燒後，唔單令刺身睇起嚟更光澤，入口更富油香，而肉質嫩得嚟帶點點爽口感。
鰤魚 鰤魚可以少聽啲，但油甘相信大家實聽過，因為大多數迴轉壽司都有供應，其實，鰤魚就等同油甘嘅大人，咪以為大條咗就會肉質嚡，其實佢算喺頂級食材，而且，好講時令。師傅將其兩食，一片簡單做刺身，另一片則做成火炙，同樣都喺口感鮮滑細膩，火炙過嘅油脂更豐腴。
黑松露和牛卷 完咗5款刺身，就來一客和食暖暖番個胃。外觀好似平平無奇，但和牛厚薄剛好，咬落軟腍極具油香，而中間捲住好多蔬菜絲，如紫洋蔥，翡翠苗之類，再加點炸蒜片，並淋上黑松露醬，令到入口時多一份清爽感，以及味道更多層次。
天婦羅 原餐牌中，天婦羅部份喺海老，但依家變咗什錦，有薑花、日本青椒仔、甜薯、冬菇及右口魚，多樣化咗，仲啱我老婆，佢鍾意食素嘛！啲天婦羅做得幾好，脆漿薄，入口唔油膩，沾點抹茶鹽，更添一份惹味口感。
鯖魚壽司 套餐中嘅壽司，安排咗3貫，先喺鯖魚。平時食鯖魚都喺鹽燒做定食，做壽司印象中都算少有。醃漬過鯖魚，加上薄薄嘅昆布，以及軟熟、握得緊致不鬆散嘅赤醋飯，實在滋味。
中拖羅壽司 吞拿魚中，唔鍾意油脂嘅人會揀赤身，極鍾意油脂嘅就揀大拖羅，中拖羅算唔算兩者之間呢？眼前嘅中拖羅，色澤嫩嫩嘅粉紅，油分十足，入口都頗有入口即溶嘅感覺，的確喺柔嫩味鮮。
北海道海膽軍艦 一件比一件壽司味濃，最後一件壽司喺海膽軍艦，軍艦上鋪滿大片色澤光亮嘅海膽，小試一口，入口甘香豐腴，質感綿密細膩，喺有種好新鮮嘅感覺；配上脆口嘅紫菜，軟綿綿嘅飯粒，唔止好食，仲有種餘月韻。
味噌湯 我哋廣東人就喜歡飲湯先，之後先食飯菜，但日本無論食「廚師發辦」，抑或鐵板燒套餐，都喺後段先上汁物。味噌湯雖然無咩帶嚟驚喜，但平實、麵豉味香濃，暖和番啲腸胃。
紅豆年糕 原本喺果物，但改咗為甜品，晌日本食紅豆年糕都喺啲喜慶日子，雖然依家經濟困難，但都要盡量保持內心喜樂。啲紅豆煮得幾綿，年糕咬落又好煙韌，喺簡單滋味嘅甜點。
另一版就喺定食形式，即包咗前菜、沙律、茶碗蒸、味噌湯、甜品，定價為$168-$490，豐儉由人。而主食算喺有7款選擇，但當中3款喺以壽司為主，見到師傅都喺逐揑，逐件上，一樣有食「廚師發辦」嘅感覺。本來一心揀「銀雪魚西京燒」，但剛巧無貨，就改選和牛海膽飯。
前菜、沙律 前菜喺胡麻秋葵，沙律亦喺簡單嘅沙律菜再淋上醋汁，基本上只要材料喺新鮮，出嚟嘅效果亦唔會太差。
和牛海膽飯 $250 伴隨主角「和牛海膽飯」登場嘅仲有茶碗蒸同味噌湯，睇到啲餐具都特別有感，好靚、好雅致，捧上手雖然好重、好墜手，但呢啲咪叫手感囉。
先講個飯，打開碗蓋，有大大瓣海膽，並鋪滿和牛，和牛油潤好食，甚具肉香，而海膽晌上文都介紹過，鮮甜豐腴，牛肉汁滲入飯中，撈埋啲飯跟海膽一齊食，別有一番滋味。
茶碗蒸 蛋漿蒸得滑溜無比，兼且甚有蛋香，而且，蛋下滿滿材料，如銀杏、冬菇……等等，面面又淋上一點湯汁，睇得出師傅做得好有誠意，唔會因為只喺一份蒸蛋就馬馬虎虎。
味噌湯 老婆一向喺愛湯之人，咩湯品都鍾意，再者，呢度嘅味噌湯又確喺做到濃香而不濁味，加入少少昆布、豆腐乾，令簡單嘅味噌湯都可以讓人感覺很好。
紅豆年糕定食嘅甜品同樣都喺紅豆年糕，其實，呢樣嘢對啱晒我老婆嘅胃口，所以，佢食得特別稱心。
質素即喺質素，無論刺身、壽司、天婦羅或定食，都食得出用料不賴，加上師傅嘅手勢好，製作用心，以及貼心、有禮嘅服務，都令到我哋有個愉快嘅午餐時段，老婆都話嚟到食晏確喺英明之選。
個人評分
味道：9/10
環境：8/10
服務：9/10
抵食：8/10
平均每人消費：HK$510
味道：9/10
環境：8/10
服務：9/10
抵食：8/10
平均每人消費：HK$510
餐廳資料：
壽司櫻 Sushi Sakura
銅鑼灣登龍街28號永光中心16樓
2898 3399
壽司櫻 Sushi Sakura
銅鑼灣登龍街28號永光中心16樓
2898 3399
沒有留言:
發佈留言