八喜：喜有此理

記憶中依次已經喺第5次嚟幫襯八喜，不過對上4次都喺去灣仔店，而黃大仙店就首次光顧。諗住都喺集團式經營，分店間嘅水準應該差唔多，試過之後，似乎黃大仙店就差啲啲，好似幾款例叫嘅點心：灌湯小籠包、八喜招牌春卷、台南胡椒餅、肉燥蒸芋粿，除咗個小籠包仍然喺高水準之作外，其餘3款感覺水準下滑咗啲，例如個蒸芋粿，味道保持到，依然惹味，但質感有啲散。所以，又再次證明，分店不同，好唔好食，還看大廚手勢此真理。

因為之前都寫過咁多次八喜嘅食評，所以今次唔打算寫得太詳細喇，只想重點咁寫幾樣嘢。先講服務，落單時已吩咐先上點心，其他嘅等叫才上，唔使個次序咁亂，好多時啲食肆都做得好一般，不過八喜依方面做得幾好，井然有序。另外招呼都好妥貼，雖然喺星期日晚，既無分時段，又無時限，但依間分店又幾多人幫襯，高峰時段真喺坐到爆喎。 


環境幾雅緻，但坐滿時候就幾逼！