Eric's Kitchen：龍脊後嘅海景窩夫

雖然行山唔少，但真喺較少行港島區，因為對我呢個「九龍人」嚟講交通駁嚟駁去，繼早前行西環嘅龍虎山，今回朋友吹雞行南區嘅龍脊，未行過，又有啲挑戰，當然舉手去行吓啦。好快行完龍脊，再駁埋落大浪灣，一路落梯級，同樣好快行完，所以，最好搵個地方坐吓，嘆個下午茶，結果就揀咗對住海灘嘅「Eric's Kitchen」，純粹貪有景。

呢度好多人幫襯，因為全部露天位都對住個大海灘，雖然天氣有啲陰，但始終都喺開揚，景觀舒服。而嚟嘅人絕大多數都喺外國人，唯一唔好嘅喺要接受有人吸煙，我哋隔離枱嘅外國男就正正喺煙民，此外，其實枱與枱之間都有啲貼。

由於食正個靚位，佢哋嘅定價就肯定貴足全個大浪灣，所以，想食得抵啲嘅人，佢揀入面啲嘅士多，好似啲小食，平成半有多。咁佢哋都定位喺間餐廳，所以，食物嘅選擇都算全面，有漢堡、薄餅、熱狗、三文治、全日早餐、沙律、炸魚薯條、小食、窩夫……等等，飲品方面有汽水、啤酒、梳打、沙冰、港式飲品……等等，以沙灘嘅小店而言，真喺選擇多多。

玉泉西柚梳打 $10、手工啤 $40

小弟平常都少飲汽水，平平哋要咗罐西柚梳打，印象中出面好似較少見呢款西柚梳化，而其中一個老友就應吓景，要咗一樽手工啤「龍脊」，佢話有陣陣荔枝味，感覺幾唔錯，易入口，亦有啲個性。

炸咖喱角 $50

一客有6件，而後尾經過入面嘅士多，同樣有炸春卷、炸咖喱角，但就賣$30左右，所以，多本地客幫襯。明顯大部份價錢都喺食個景，而伴啲泰式酸辣醬，比起就咁唧啲茄汁，算喺多幾分誠意，當然，咖喱角嘅味道就無話有咩特別。唯一要讚，就只可以講喺用上啲較環保嘅刀叉，當然，用番啲可以洗洗就再用嘅不銹鋼刀叉就更好啦。

窩夫 $65

餐牌就只寫住配以時令水果、鮮忌廉，實質就喺香蕉同現成貨嘅唧唧忌廉。老實講，晌度食窩夫你就唔好有咩期望，真喺純過吓口癮而已，基本上，叫OK啦，啲窩夫都鬆軟，但就唔熱嘅，暖也講唔上。但我哋共同有個疑問，呢一隻形嘅窩夫，應該一底有4件，咁剩低嗰件晌邊？俾下個客？咁就更加唔喺新鮮做，而且，香蕉都喺得半隻量左右，咁剩番半隻又留嚟俾下手？賣到$65，都唔志在俾埋半隻個客吧！

由於今次嘅龍脊之旅都較有特色，天氣亦唔錯，當然都借個版位分享少少行山相片，整段路程對小弟而言都唔難，算輕鬆。不過，講真，人就真喺好多，尤其上山梯級段，不時都塞人，利申：近乎全程戴住口罩行，其實，都習慣晒！

個人睇法，如果行完山，肚餓想食吓嘢，就建議晌入面啲士多食，當然，只喺試咗咖喱角同窩夫，意見唔講得全面；而如果純粹飲吓嘢，啤一啤，過嚟搵個海景位hea吓，咁晌「Eric's Kitchen」就無妨。

個人評分
味道：6/10
環境：7/10
服務：6/10
抵食：6/10
平均每人消費：HK$50

餐廳資料：
Eric's Kitchen
石澳大浪灣沙灘快餐亭