客家好棧 Hak Ka Hut：嚇家紫薯卷

晌荃灣城市中心依間客家好棧每逢假日都有好多人排隊，門外定必企滿人等嗌咪，皆因無茶芥，又免收加一，不過，自從舊年初取消依兩樣優惠，明顯排隊嘅人少咗好多。好似今次一完咗教會聚會即刻打頭陣先過去攞籌等位，點知5分鐘唔使就已經有枱，仲要唔喺搭枱位添。

意法私房餐廳 La Bon Restaurant & Lounge：無飲良品

近年地鋪租金翻幾番，睇新聞一講到舊鋪續租，加幅以倍計，真喺極之癲。所以，有唔少餐廳搬上樓成為樓上鋪，故此又慢慢形成唔少食廈，就好似今日幫襯嘅La Bon意法私房餐廳，就身處登龍街中間嘅食廈「永光中心」之內，整幢商廈粗略估計都有近廿間食肆，分佈晌唔同樓層，法國菜、意大利菜、美國菜、日本菜、中菜、越南菜都有，可謂選擇多元化。

小桃咖啡室 Cafe Little Tomato：小茄絕對唔喺大茄咁簡單

一套戲有主角，又有配角，亦有啲行行企企嘅「茄呢啡」，有多兩句對白嘅就變咗「大茄」，今晚嚟到小桃咖啡室依個「小茄」度（因為店名英文喺little tomato啊），試過之後就知佢絕對唔喺「大茄」咁簡單。因為一向對樓上Café嘅印象，都喺俾人飲吓嘢，傾吓偈，hea吓，玩吓棋，打吓機，食物普普通通喺正常不過嘅事。之不過「小桃」晌食物嘅要求上，就跟一般樓上Café好唔同，所以今晚同朋友唔單止傾得開心，仲食得稱心。

龍島美食店 Lucullus Gourmet Shop：好友狂嚐谷（二）

因為又有食友所贈嘅爆谷小食，所以就可以有多一篇「好友狂嚐谷（二）」，實在多謝食友心意，一班好妹姊，次次飯局都帶嚟唔少零食新意。依次收到喺龍島所出嘅朱古力零食，好友帶嚟多款唔同味道隨心揀。

Hatsu Japanese Restaurant：平民版懷石料理．富貴版和風定食

月尾將要出門有遠行，所以趁星期六過嚟金鐘搞簽証，順道就晌Hatsu食個晏先至打道回府。事緣晌FB參與一個試食活動，有幸被抽中喜獲試菜機會。

意粉屋 Spaghetti House：意式不良

久唔久就會搵麵包班同學仔Ivan兄一齊食飯，兩個麻甩佬一講到飲飲食食、煮嘢、整麵包就特別啱傾，小弟自搬離開南丫島出咗市區後，麵包都無整好幾年，廚房細吖嘛，但都間唔時落吓廚。今晚，因為有啲信用卡優惠，加上對我哋兩個都就腳，所以就同佢嚟到星光行地庫嘅意粉屋，邊食邊傾咗成晚，交流吓飲食心得，交換吓心水餐廳資訊。

Awfully Chocolate：好友狂嚐谷（一）

之前借題發揮一連寫咗5篇「好友狂嚐曲」，除跟十家分享美食，亦趁機多謝數位老友所送贈嘅曲奇。其實仲有個續篇，唔再繼續用（六）、（七）、（八）……喺因為唔喺食曲奇，而喺另一樣美食，故此，標題亦要改一改，變咗「好友狂嚐谷」。

Secret Ingredient：新手？大顯身手！

聖誕節、情人節唔想太破費出街食？想俾個驚喜煮番餐俾另一半食？入過廚嘅人就知，以普通家常菜式而言，煮一餐飯動輒花一、兩個小時，唔好計逛街市、超市買材料，淨喺洗洗切切已相當費時。而且，煮啲複雜嘅菜式，最難就喺樣樣配料或調味料只買少少。如果你喺入廚高手，煮起上嚟都仲叫得心應手，煮得快啲，相反喺入廚新手，又有何能大顯身手？Secret Ingredient喺一間專售出口食材嘅網購概念店，佢嘅自煮晚膳，會為客人準備好晒一切所需嘅新鮮食材及調味料，外送直達，即使忙碌嘅朋友收工後仍能輕鬆優悠咁享受「快樂煮食」嘅樂趣。新手都一樣可以大顯身手！

簡說一下Secret Ingredient啦，登入店家網址，網購流程簡單易明，雖然暫時所送區域有限，但已包括港島大部份地方及尖沙咀區，亦可安排晌地鐵交收，對晌商業區工作嘅人嚟講，已非常方便。而菜式選項方面，分別有餐湯、沙律、主菜、甜品及啤酒、餐酒，要完成一份大餐絕對齊全，此外，每兩個星期就會轉款一次，保持一定新鮮感。滿$400免費送貨之餘（否則另收$25送貨費），只要當日指定時間前落單，仲可以同日送貨添。

巴東印尼餐廳 Padang Indonesia Restaurant：斑蘭黑糯米蛋糕

食友嘅心意，有時都喺種挑戰，點解？因為認識一位食友，佢又真喺好厲害，不拘何國菜系，更不拘何種食物，古靈精怪乜都會試，試過好嘅又會送俾大家試試，今回收到喺銅鑼灣巴東印尼餐廳嘅斑蘭黑糯米蛋糕，放心，食依件糕點又唔使咩膽量嚟挑戰！

Secrettaste：好想說的秘密

有時候，心裡隱藏咗啲秘密，好想跟人分享，但唔可以講出口，實在喺件幾痛苦嘅事。不過，今次要分享嘅「秘密」，就絕對唔使就住就住，早前，掹住食友車邊，一同嚟到「Secrettaste」試菜，喺一間身處銅鑼灣舊唐樓內嘅私房菜，主打唔同歐陸菜式，原來仲喺晌5月啱啱開業無耐。叫得「秘密」，佢個「竇」又真喺好秘密，首先，地下街號門牌只有507，再跳就511，咁509呢？好彩小弟都有朋友住緊唐樓，知道好多舊唐樓都喺一梯兩伙，每邊用一個街號，當然如果樓下加番個門牌509-511就更好啦；此外，上到3字樓（四樓），真喺唔話佢神神秘秘都唔得，完全無招牌、無標記，跟住宅無分別，幸好無嚟錯！

地下入口（左），「住宅」門面（右）。

Palace Café：好友狂嚐曲（五）

一連試咗幾款曲奇，有咖啡店出品、有麵包店出品、亦有餅店出品，但點講都好，都屬於本土製作。今次嚐到食友嘅曲奇小禮物，則喺「來路貨」，仲要嚟自法蘭西，品牌名字叫La Sablésienne，我估都唔喺太多人識，如果有興趣了解吓佢，不妨登入以下網址：www.sablesienne.com。此產品晌中環嘅Palace Cafe有寄售，除此之外，仲有其他公平貿易嘅產品賣，有興趣可以去逛一逛！

霸王山莊 Kings' Lodge：當年今日再會山莊

一個月一次嘅細胞小組活動又安排咗打波，因為有組員喺奧運柏景灣會所會員，所以我哋晌會所打完波就去奧海城食飯，晌舊年嘅同一個時段又喺咁樣安排，今次連食店都跟番上年一樣，搵番霸王山莊，貪其各人都啱食之餘，味道確實不俗。

新星海鮮酒家 New Star Seafood Restaurant：俏俏新升

又喺幾個月一聚嘅死佬飯局，本來今次有提議大搞，拉隊入屯門三聖邨或清水灣布袋澳食海鮮，但人多難就期，約嚟約去，都無一個日子夾到，而「民意」又想齊晒人先搞，所以，死佬海鮮飯局就拖住先。繼而先搞個小飯局聚一聚，人數不設下限，嚟得幾多就幾多人，結果都有成11人，查實都只差兩位死佬嚟唔到。地點費事諗，反正唔志在食，志在出嚟呻吓依樣、呻吓嗰樣，所以揀番我哋嘅火鍋飯堂「新星」！

曼谷泰菜 Bangkok Thai Restaurant：嘆曼版泰菜

雖然小弟唔喺泰菜粉絲，但都幾鍾意食泰菜，因為煮泰菜用唔少香料，就以咖喱為例，黃咖喱、青咖喱、紅咖喱……都不下三幾款，菜式味道多變。今晚有幸掹車邊跟食友同嚟位於灣仔嘅「曼谷泰菜」試菜，席間傾開先知原來總店晌北角，仲有其他分店開設於天后、小西灣、沙田、屯門等地，而依間灣仔分店都喺開咗1個月多啲。此外，有專營批發嘅集團作背後支援，貨源及價格相對佔優，做到所需嘅泰國材料都由泰國空運直送。另外，所有店舖都用上泰藉廚師，不過，北角及天后店嘅侍應就全泰藉，其他分店就一半一半，好似嚟依間灣仔店，就唔怕溝通唔到。

日牛涮涮鍋專門店 Nichigyu Shabu Shabu & Sukiyaki Restaurant：日牛賀牛一

每年同姨仔、舅仔慶祝生日都好有數，因為佢兩個同月生日，只喺相差一個星期，所以，年年請佢哋食飯可以一次過。阿Q啲諗叫做俾少次錢，查實仲傷荷包，因為仲有老婆嗰份，舅仔拍緊拖，無理由唔請埋佢女友架，一個人頂晒，依個就喺做姐夫代價，不過，都俾得甘心樂意，一年都喺俾一次，最緊要大家食得開心！平時搞生日飯都喺由我諗食乜，難得姨仔有心水好介紹，就喺晌荷里活廣場由日本村姑林慧美搞嘅日牛，唔使我諗就最好不過啦。仲有，原來姨仔一早申請埋日牛張會員卡，益我慳番個加一服務費呀。

甜牙牙 Sweet Tooth：週末開心甜蜜密

週末唔使再返工故然開心，週末嘆住下午茶就更開心，週末跟幾位相熟嘅食友嘆住下午茶有傾有講就仲開心，一口氣掃咗10款甜品簡直超開心，依個週末認真開開心心甜甜蜜蜜密集咁嚟呀！事發地點就喺開咗無耐甜牙牙嘅葵芳新都會廣場嘅分店，雖然話新開無耐，依日下午茶時段，一樣人頭湧湧，座無虛席。咁又喺嘅，下午茶餐$23-$33，大大份甜品仲跟杯是日特飲，確實幾吸引到一批後生仔女嘅。

叙苑粉麵茶餐廳：生炒咖喱雞飯

嚟得敘苑都喺因為要去鑽石山火葬場，對上一次就喺同家人掃完墓，食埋晏先走。今次就出席朋友爸爸嘅喪禮，送埋最後一程，先會嚟咗依頭。

求其食餐晏，醒番起上次嚟過敘苑覺得唔錯，所以今次再幫襯。同上次一樣，都喺點每日超值快餐，快靚正抵食吖嘛，唯一唔同，就喺加咗價囉！日日唔同款，每日有6款選擇，款款賣$36，送例湯或啡茶，凍飲加$2，轉紅豆冰至喺加$3，今日嘅心水喺咖喱滑雞飯，因為上次食過佢啲咖喱，又確喺幾唔錯。

金牌小龍 King's Dumpling：風塵僕僕會小龍

啱啱返咗大陸山區做嘢成個星期咁滯，除咗返番入縣城外，晌啲小鎮小鄉例牌無啖好食，其實佢哋啲嘢唔差，只喺小弟唔嗜辣，唔多啱口味啫。一向晌回港當晚，都會食番餐好，正正就跟幾個食友約好依晚，嚟金牌小龍試試菜，幸好，航機無延誤（內陸航機延誤喺幾平常事），準時赴會。金牌小龍晌國內唔同省市都有不少分店，如廣州、深圳、北京、重慶、成都、福建……，而晌香港，銅鑼灣分店結業後，現只剩尖沙咀The ONE及新蒲崗Mikiki兩家分店。小弟之前未嚟過，所以，對其出品甚有興趣，今晚，就讓小弟風塵僕僕趕返嚟會一會依條過江小龍。