翠河餐廳 Green River Restaurant：我的星期六美孚早餐 ~ 穩膽之選

星期一至五及星期日，基本上我倆公婆都會晌屋企食早餐，而星期六喺最輕鬆，朝早最無乜嘢搞嘅日子，所以，就會出街晌美孚周圍搵吓食、輕鬆吓，之後可能行吓公園，或行一轉短山。今次嘅選擇，諗吓諗吓都好耐無幫襯過「翠河」，所以，就嚟到嘆吓早餐。

晌美孚區有好多間快餐店、茶餐廳，以早餐嚟講，「翠河」屬於我哋值得翻兜嘅心水之一，但早餐以外，水準就好飄忽。除咗食過多次都保持到水準之外，內在環境好，樓底高，光猛闊落，亦喺我哋嘅考慮點之一，尤其晌依家疫情仲反反覆覆嘅情況。不過，今朝出面位多人，焗坐最入面啲卡位！

早餐一個餐牌底面兩頁睇晒，A-H共8款選擇，定價$24-$35，最搞嘢，供應去到12:00pm，慳番啲12:00pm前嚟落單當午餐都無問題。

早餐A 傳統早餐 $33

相信個名都喺求其改，呢個組合點會稱得上傳統，唔好理，總之我哋啱食就得啦。其實佢啲早餐都幾豐富，基本上一大碗仿鮑魚火腿通粉都夠晒飽，仲包埋北海道牛乳炒滑蛋及香脆金磚（即喺蒜蓉多士）。

先講啲炒滑蛋，炒得堅滑，又夠晒蛋香味，而多士蒜香味突出，又鬆脆。 

通粉無煮過腍喺基本，但有唔少快餐店或茶記為方便，煮定一大鍋又唔過冷河或降溫，啲餘溫咪整腍晒啲通粉囉。仿鮑魚絲及火腿絲都落得好足，雞湯底亦唔失禮喎，算得上香濃，所以，三十零蚊真喺抵食到痹。 

早餐D 意大利蕃茄薯仔濃湯 $33

另一個餐我哋就揀蕃茄薯仔濃湯螺絲粉，因為呢個真喺老婆嘅「飛弗」，之前好幾次嚟都喺揀呢款，至多喺配唔同嘅配料，而今次就番我就揀午餐肉。同樣，個餐配埋北海道牛乳炒滑蛋及香脆金磚。

唔喺誇張架，佢哋嘅蕃茄薯仔湯底確喺勁濃郁，蕃茄味酸香鮮活，又多薯仔粒，加上螺絲粉份量同樣十足，故此，淨喺食完碗粉已飽到九乘。 

熱奶茶、熱好立克

老婆今次唔飲檸水喇，改飲好立克，唔好以為嗌好立克就無嘢好講，有時一杯好立克就飲得出誠意，第一沖得夠濃麥芽味，所以，完全唔使落糖，第二師傅沖嘅時候水夠熱，又有攪過，否則飲到尾好多時會一大嚿好立克結埋沉底。另外，熱奶茶都一貫地有水準，茶底醇香，絲滑細膩。

兩份早餐都抵食、食物又唔錯，所以，無怪乎喺我哋晌美孚食早餐膽之一。天氣非常之清爽，所以，早餐後行轉短山就最好不過。

個人評分
味道：8/10
環境：7/10
服務：7/10
抵食：8/10
平均每人消費：HK$33

餐廳資料：
翠河餐廳 Green River Restaurant
美孚美孚新村4期百老匯街69-119號地下101A舖
2370 2908