山區裡的走走趯趯: 逸軒 Yat Heen：良辰吉「逸」

2020年11月7日星期六

逸軒 Yat Heen：良辰吉「逸」

曾幾何時，一年會入嚟好幾次石門，因為老婆嗰邊有親人住晌「碧濤花園」，不過，搬出新界之後，都已經好少入嚟呢頭，當時都見到呢區開始有少少發展，今次再訪，已經好多都唔同晒。是日又喺郊遊日，專誠過到嚟「帝逸酒店」內嘅中菜餐「逸軒」食晏，因為，晌官網睇到個套餐好正，橫掂有排都未出得門外遊，而老婆又唔多喜歡「Staycation」，所以，趁出開外面郊遊就食番餐好嘅嚟代替旅行。

周邊都算喺工廈，所以，新簇嘅「帝逸酒店」就顯得更突出。新界區叫做地方大，所以，酒店大堂都較為偌大而空間感強，接待處後的一大幅植物牆，加添綠化後，感覺更好。

「逸軒」就在大堂左旁嘅樓梯拾級而上，餐廳嘅門面都比想像中大及有氣派。門口已設有好多防疫措施及提醒，雖然疫情緩和咗好多，但始終社區都仲有啲隱形患者，為人為己，都要跟番足嘅。

而走進餐廳內，地方都幾大，一字長形，但枱與枱都排得比較開，加上樓底都有一定高度，予人感覺闊落而唔會有擠迫感。再者，裝修雅致，招呼熨貼有禮，不失酒店應有嘅級數。

據小弟所知，餐廳主要喺提供較摩登嘅中菜。上文講嘅套餐，就喺「尚膳套餐」，定價每位$398，需兩位起，而菜式非常豐富，共8道菜，單睇名字亦頗為特色，喺一頓幾特別嘅中菜體驗。而且，凡惠顧呢個套餐，更可以用優惠價$88加配南非8頭鮑魚一隻。此外，仲有一款共6道菜嘅「行政午餐」，賣$368；以及一款供4人享用共8道菜嘅「尊尚套餐」，賣$1,198。但溫馨提示，套餐唔包茗茶，並需要加一服務費。

餐廳嘅正餐牌又厚又大，就唔多方便影，不過，就可以貼埋佢哋張點心紙出嚟，等大家參考吓。類別包括點心、風味小食、粥粉麵飯及甜點，茗茶每位收$32。老實講，去得酒店嘅中菜廳，都唔喺實惠、經濟行先，價值上會喺計埋服務、環境……等各方面。

白色嘅餐具，睇起嚟無甚特別，的確，喺無特別嘅，但正正喺咁，先更易睇到啲餐具抹得乾唔乾淨，有無花，有無崩。我哋點咗鐵觀音，茶壺更以蠟燭熱住，而侍應更不時主動為我哋添茶，呢啲就喺服務喇。

逸軒三錦碟

由於我哋所食嘅套餐菜式都喺逐位上，就算喺中菜，擺盤都好靚，此外，留心嘅話，每道菜嘅盛器都襯番啲菜式，有啲仲好古雅。先打頭陣喺3款前菜：話梅聖女果、金牌黑豚叉燒、海蜇手撕雞，侍應介紹時，仲順帶一提，由左至右去食，味道喺由清到濃。

話梅聖女果

名字好靚，其實即喺車厘茄，但以話梅去泡浸，車厘茄本身都好清甜，嗒落滲出微微話梅嘅酸香，都幾得意，面頭白色一片喺馬蹄，當然，喺點綴大過實際。

金牌黑豚叉燒

兩片叉燒肥肉都唔多，但肉質卻好軟熟，無過「嚡烚烚」，入口仲喺暖暖哋，燒得香口，有蜜餞香，兼有少少燶邊，正喎！

海蜇手撕雞
做成小杯，好精緻，除海蜇、手撕雞肉，仲伴以紫洋蔥、青瓜絲及好似有啲泰式木瓜絲，酸酸辣辣，感覺好有種冬蔭功嘅味道。

白玉海皇燴拉絲雪燕

用西餐常用嘅闊湯碟，就喺想話俾客人知佢哋賣嘅喺摩登中菜。湯面一大撮嘅就喺雪燕，咪誤會喺燕窩嚟，其實可以講喺桃膠嘅朋友，喺植物樹脂嘅一種，營運價值好高。個湯嘅質感煮得好好，稀杰度啱啱好，而且，勁多爽口鮮甜嘅蝦肉。

日式蔥燒汁花竹蝦

花竹蝦同焗蟹蓋喺二揀一嘅菜式，我哋兩個人，自不然一人點一款，兩款就可以試晒。賣相甚西式嘅花竹蝦，非常大隻有睇頭，並伴有車厘茄、珍珠筍、乾蔥頭、椰菜花……等等。蝦肉既爽彈，又鮮甜，淡上濃郁嘅日式蔥燒汁，更突出到蝦鮮味。

香檳汁松葉蟹蓋

講到食蟹，最開心梗喺唔使自己郁手拆蟹，就可以啖啖肉啦，所以，焗蟹蓋自然鍾意。甫上枱，已聞到香噴噴嘅芝士香味，焗得金黃嘅蟹蓋，內裡勁多蟹肉，配以香檳忌廉汁，質感綿密，而松葉蟹即喺松葉蟹，蟹味強，蟹肉鮮，而底下原來仲有好多蟹膏添。

腿汁海參天白花菇配南非鮑魚（+$88）

如果另加鮑魚嘅話，就會連同呢記海參花菇一同上碟，故此，整道菜都顯得特別矜貴。白花菇既大隻，又厚肉，好有菇香；而南非鮑炆得夠腍，卻好彈牙，切落去嗰種啜刀感已好感覺到。反而，平常接觸海參喺較為軟軟腍腍，但今次件海參卻喺爽彈到不得了，感覺反差大，海參本身無乜味，所以，金華火腿熬嘅汁能提昇整體嘅食味，實在功不可沒。仲有，兩炷生菜都做到玻璃生菜嘅口感，喺酒店級先有咁嘅心機同誠意。