餐廳嘅環境本身都好舒服，一來地方大，二來餐枱與餐枱之間都保持一段距離，加上依家疫情關係，客人都會被安排坐得疏少少，用起餐嚟就更安心，唔會有咩交叉感染。
今次所做嘅英式下午茶，每日都有供應，平日價每位$208，而星期六、日及公眾假期每位$228，供應時間3:15pm- 5:15pm，記得預早上番酒店官網訂座，有8折優惠架。
而整個下午茶套餐，包括咗5款鹹點、7款甜點，真喺好豐富。而且，三層架嘅下午茶，化身成個小園林，有小花，有蝴蝶，有雀仔，甚有意境。再者，不論鹹點、甜點，都小巧的骰，賣相精緻，更讓人心悸動。
巴馬火腿鵪鶉蛋班尼迪 小弟就喜歡先鹹後甜，所以，就以呢道的骰嘅班尼迪鵪鶉蛋打頭陣。雖然話喺班尼迪，但始終鵪鶉蛋細，要做流心效果唔會太明顯，但配上酥餅底、巴馬火腿，淋上少少荷蘭汁，整體效果好唔錯，味道鹹香，口感富層次。
牛油果鮮蝦咯嗲 老婆超鍾意呢一道鹹點，皆因有打得軟滑嘅牛油果蓉，啲牛油果蓉仲加咗啲調味，所以，有種不單調嘅感覺，而鮮蝦好爽口，兩者配合起嚟有種好清新感，好襯個下午茶主題。
脆炸玫瑰香檳燉蛋白 初頭睇餐牌，真喺想像唔到呢一款鹹點喺咩樣！嚟到，切開，就突然叮一聲，好有種大良炸鮮奶嘅感覺，其實，食落去嘅口感亦好相似，外層好香脆，又一啲都唔油，而中間嘅燉蛋白確喺仍然好滑溜，不過，花香味就比較隱若，但都算得上甚有驚喜。
香草青瓜忌廉芝士麥包 眾多鹹點中，就以此「手指三文治」較為平實，簡簡單單麥包三文治，塗上薄薄嘅忌廉芝士，再夾有一片青瓜，實際上味道都唔錯。
迷你松露牛肉芝士漢堡 雖然稱之為迷你，但中間嘅牛肉都做得好厚身，而且，入口鬆化，充滿肉香，滲出微微黑松露嘅香氣，而漢堡包嘅包身亦鬆軟，大啖咁咬落去，都食得好過癮。
加州香橙忌廉撻一輪鹹點，依定就輪到食甜點，所有甜點都做得好賞心悅目，尤其呢款，撻殼專登做成粉紅免，再放隻蝴蝶做裝飾，好搶眼。香橙蓉嘅微酸，非常清新怡人，配合上撻殼內嘅忌廉，入口有種中和感， 而撻殼亦都好脆口，別以為「蝴蝶」只做裝飾，其實喺威化紙做，可以入口。
焗富士蘋果芝士蛋糕 試完加州香橙，就再試富士蘋果，以美式芝士餅作為主軸，再淋上富士蘋果肉。芝士餅嘅芝士味好濃郁，而且，質感綿，消化餅底又夠薄；餅面嘅富士蘋果肉煮得軟滑，滲出清甜嘅蘋果香味。
紅莓牛奶布甸 雖然，都無刻意講明喺用咩牛乳，但啲牛奶布甸嘅奶味頗重、頗香濃，口感亦好柔滑，而中間夾有一層紅莓味嘅啫喱，兩者配合下感覺好唔錯。
法式燉蛋泡芙 法式燉蛋 + 泡芙，又幾有心思，而且，擺朶小花，令其賣相變得更加可愛，猶如一身嫩滑肌膚嘅小妮子。泡芙做得幾有水準，脆脆嘅外層，裡面卻喺軟綿綿；中層嘅法式燉蛋做得口感細膩軟滑，且甚具蛋香。
宇冶抹茶紅豆卷 敢用宇冶抹茶個牌頭，而唔喺綠茶，就知用料不賴無hea做，唔止個蛋糕嘅色澤好對辦，嗰陣抹茶味都好濃郁、好幽香，口感亦好軟熟，中心嘅鮮忌廉亦都打得軟滑香甜，紅豆亦煮到綿晒，喺嫌紅豆少咗啲啫。
榛子朱古力慕絲 甜點嘅壓軸，就一定喺食呢一款慕絲蛋糕，賣相已額外加分，外層嘅鏡面朱古力做得「閃爧爧」，而且好夠薄，再加上少少裝飾。入口，朱古力味好香濃，帶點點甘苦，而中間嘅慕絲又滑又香，嗰陣榛子朱古力香味好突出，實在非常好食。
經典鬆餅及提子鬆餅配自家柑橘醬及忌廉 食英式下午茶，又點可以無英式鬆餅嘅份，所以，留到最後先食。當中有自家焗製嘅傳統嘅牛油鬆餅及提子鬆餅，當然，自家製嘅柑橘果醬亦喺另一亮點。柑橘果醬果然好清香，嗰份柑橘味好自然，厚厚咁塗晌鬆餅之上，食落好有滿足感；而忌廉屬於帶淡味嘅忌廉芝士一類，質感好挺身，配搭鬆餅又喺好襯。
意式泡沫咖啡、洋甘菊茶 餐飲可以揀即磨咖啡或有機茶，前者喺機沖，都喺晌自助餐常見嗰啲自助咖啡機，所以，別抱太大期望，但豆靚沖出嚟嘅效果都唔差；而老婆揀洋甘菊，採用「川寧」品牌，所以，質素亦有所保證。
整體而言，下午茶時段環境寧靜，招呼熨貼，不時為老婆杯洋甘菊添熱水，而整份下午茶鹹甜都皆出色，種類各有個性，唔會有太重複嘅感覺，可見選材、款式都花過唔少心思，但最意外嘅喺，待我哋用餐近尾聲，店長走過嚟問我哋有無邊款鹹甜點想再試，若意猶未盡，可再次單獨點選，不過，都已經好飽喇，夠晒滿足！
個人評分
味道：9/10
環境：8/10
服務：8/10
抵食：9/10
平均每人消費：HK$205（官網預訂8折優惠）
味道：9/10
環境：8/10
服務：8/10
抵食：9/10
平均每人消費：HK$205（官網預訂8折優惠）
餐廳資料：
柏景餐廳 Café on the PARK
尖沙咀廣東道33號中港城皇家太平洋酒店園景翼2樓
2738 2322
柏景餐廳 Café on the PARK
尖沙咀廣東道33號中港城皇家太平洋酒店園景翼2樓
2738 2322
沒有留言:
發佈留言