Lady M：「貴」氣千層

話就話疫情嚴峻，但好多香港人真喺馬照跑，舞照跳，否則都唔會有「跳舞群組」，而隊就照排。是日專登出嚟尖沙咀海運大廈，因為老婆嘅姨甥仔生日，幫忙過嚟Lady M攞蛋糕。

唔喺講笑，嚟到已經喺5:20pm，亦禁咗晚市堂食，但仲見有三幾個排緊堂食條隊等入場，當然啦，由於二人限聚，全場亦「爆滿」，俾你排到入座，都食得好趕啦！而另一邊買走嘅就大排長龍，所以，如果唔睇新聞嘅，單喺睇天星碼頭、海運大廈、海港城嘅人流，唔知香港疫情叫嚴峻囉！ 

好在小弟嘅蛋糕喺網上訂咗，唔使再排隊，直接入去收銀處對單掃二維碼就搞掂。晌少少等候時間，就望望有咩款式，眼見餅櫃顯示出嚟就有10款，件裝定價為$68-$75，其實，都幾貴吓！ 

抹茶千層蛋糕 $480（6吋）

現場單件裝賣$75件，但嗰啲蛋糕原個本身喺大啲，我哋所訂嘅原個蛋糕喺6吋大，而祝賀朱古力牌唔使另外加錢。取貨時會加幾粒乾冰晌兩側，店員仲叮囑如未即時食用，一小時內要放番入雪櫃。雖然話6吋大，都唔細個架，面頭糝滿抹茶粉，按官網介紹，喺用上日本嘅高級抹茶粉，但點高級就無講喇，比起其他款式，就會簡約啲。

佢哋啲蛋糕嘅賣點，就喺鋪上多於20層嘅純手工做成超薄法式班戟皮，再每層塗上薄薄嘅忌廉，當切開之時，都睇得好清楚當中嘅層次。唔好以為得餅面灑滿抹茶粉，裡面嘅忌廉亦加咗抹茶粉，故此，入口嘅抹茶味喺幾強、幾突出，而班戟皮確喺好薄，好平均，食落軟綿又有蛋香，食得出當中嘅手工及心機。 

第一次見識Lady M嘅蛋糕，確喺幾高水平，不失過江龍之名。最欣賞喺中間嘅忌廉層，食到柔滑感，卻唔會有好膩嘅感覺。

個人評分
味道：9 /10
環境：7 /10
服務：8 /10
抵食：7 /10
平均每人消費：HK$80

餐廳資料：
Lady M
尖沙咀廣東道3-27號海港城海運大廈2樓OT215K號舖
2873 2356