雪山冰廳：長話要短「雪」，快閃下午茶！

雖然話自己晌深水埗區混得較多，但真喺唔知除「嘉頓」隔離，青山道尾長沙灣呢邊仲有一間「雪山冰廳」。今日就喺趁放早，過嚟「實惠」買啲家居品，原本無打算下午茶，見對面就有間「雪山」，同老婆睇兩睇，下午茶餐有炸脾配紅豆冰，佢話想食好耐，二話不說，就放縱一次啦。

跟另一家店嘅環境差唔多，有少少懷舊元素，薄荷綠嘅牆身磚，地板就花階磚，一側牆身有啲仿木窗，一側牆身就喺大金魚嘅彩繪，非常搶眼。 

一如大多數嘅茶記，調味料、餐具早已放齊晌枱面，唔使多口問侍應，方便客人，又唔使令員工加重多啲功夫。 阿姐好醒目，嚟兩杯熱水，俾客人洗洗刀叉，話晒佢啲刀叉無遮無掩，熱吓佢消消毒都安心啲啲。 

下午茶餐有咩嘢食？一版A4紙睇晒，選擇幾多，有輕食嘅，有飽肚嘅，而定價都幾大眾化。入嚟前，已喺門口睇定晒食乜，所以，一坐低就即落單。 

避風塘生炸脾 + 紅豆冰 $38 

唔止炸脾，仲加埋「避風塘」元素，其實，好耐之前晌「嘉頓店」都食過一次，今次，就等老婆試吓。隻雞脾非常之大，好墜手，上枱時都感受到嗰股「熱氣」。老婆話入口外皮好香脆，加埋啲炸蒜，香香辣辣勁惹味，而雞肉比預期好，無話「嚡烚烚」，亦唔會食到好油。我都試咗幾啖肉，確喺OK喎。

紅豆冰大杯又足料，淨喺睇表面你就見落咗唔少紅豆，啲紅煲到又綿、又清甜，果然真材實料，入口冰涼嘅奶水，配炸脾啱晒啦。 

德州辣肉醬熱狗皇 ＋ 熱奶茶 $32

晌茶記食下午茶，多數喺嗌菠蘿油，其次就沙嗲牛包，但今次轉轉口味，試試熱狗，但呢隻唔喺「普通狗」，而喺加入大量辣肉醬嘅熱狗，睇樣都好吸引。麵包用上巨型潛艇包，仲烘過嚟，有啲脆邊，包心卻好軟熟，而肉醬勁惹味，少少辣而已，雞肉腸亦唔似平價貨，又無死鹹嘅問題，總之，整件熱狗超好美，絕對頂得一餐飯。

佢哋出名嘅喺樽仔奶茶，而去茶記，小弟首選都喺奶茶。老師傅沖嘅奶茶，確喺有一手，茶底芳香，茶奶比例啱啱好，唔會太多奶影響茶味。 

今次雖然喺快閃嘅下午茶，但都試到兩款好嘢，夾埋之前嘅幫襯，「雪山」嘅出品都算喺有質素，兼且夠穩定。

個人評分
味道：8/10
環境：7/10
服務：7/10
抵食：8/10
平均每人消費：HK$35

餐廳資料：
雪山冰廳
長沙灣青山道413號東景大廈地下4-5號舖
5226 3468