太香麵家 Tai Heung Noodle：抵食新「太」度

今日返完聚會，而老婆嘅周日興趣斑剛啱放假無堂上，所以，就同佢行轉短山，由石籬沿金山路行到去九龍水塘，再轉入金山樹木研習徑落九龍接收水塘，駁小徑經長坑村返美孚，做到運動之餘，連車錢都慳番。午餐，就簡簡單單食粉麵，晌葵涌有間小店「太香麵家」，睇落好似幾OK，就入去試吓。

地方一眼睇晒，始終哋小店嚟，可做嘅防疫有限，不過，我哋一支箭咁標入最埋嘅位，因為成個場得呢個位有塊巨型大膠板隔住，而店員都走番過嚟幫我哋量體溫，反映某程度佢哋對防疫嘅事都上心，總好過有啲店鋪真喺唔理，門口部量體溫機喺做樣而已。 

一張餐牌睇勻晒有咩食，招牌菜式、菜飯、粉麵、小食、飲品，喺咁多，定價好相宜，飲品加配又喺優惠價。 

滷水雞腎米粉 $25

初時仲諗住老婆會揀花雕醉雞或白魚蛋，點知最後揀咗雞腎，可能平時少食到啦。賣25蚊，份量就好足喇，但佢話啲雞腎滷得唔夠入味，而且，好似有啲臊臊哋，小弟要求低，就唔喺好覺啫，不過，唔夠入味都喺事實。

秘製大豬扒菜飯 $40

有幾款菜式都喺店家「大母指」推薦，小弟少少偏好炸豬扒，並揀配菜飯。唔止菜飯大大碗，豬扒亦非常之多，最好嘅喺啲豬扒「碎上」，方便夾嚟食，而且，炸得甘香不膩，肉質鬆化，菜飯亦做得帶點鹹香，呢個飯性價比高。

熱奶茶 +$3

都打晒底，晌度飲奶茶應該唔及晌茶記，純粹過吓口癮而已。事實上，話好唔好，話差唔差，至少茶、奶比例都OK，只喺茶底唔叫好濃香啫。

上文都講過飯後同老婆行短山，就分享少少相，沿途嘅金山路就無乜好影，只喺郊野公園內嘅一條車路，但去到九龍水塘啲景觀就幾靚，尤其其S形水壩，界開上面嘅九龍水塘，下面嘅九龍副水塘，可惜喺今天天氣一般般。 

九龍水塘

九龍副水塘

為今餐飯總結吓，單以個豬扒菜飯，可以俾個笑評佢，但計埋個雞腎米同奶茶，就拖番低咗。不過，以咁經濟嘅價錢，都唔可以要求太多啦，大可作為填肚之選。

個人評分
味道：7/10
環境：5/10
服務：7/10
抵食：9/10
平均每人消費：HK$34

餐廳資料：
太香麵家 Tai Heung Noodle
葵涌大隴街153號怡勝花園地下3號舖
6028 0615