金緣居台式料理 Goldie Cafe：分「金」同味

親友知我都鍾意食台灣菜，佢就介紹我去佢屋企附近新開嘅「金緣居台式料理」，佢話啲套餐好抵食，性價比高，所以，趁周五晚同老婆嚟輕輕鬆鬆食番餐。補充一點，餐廳嘅地址寫「昌華街」，但餐廳嘅入口實際晌「青山道」，一來親友有溫馨提示，二來小弟對呢區都熟，所以，唔難搵。

走進餐廳，一字長形左右兩排餐枱，兩邊仿磚牆，掛上少少油畫，睇落就跟台灣無乜關係，而最突出喺天花周圍都吊咗好多植物，此外，最緊要都喺地方整潔。

先介紹吓餐廳嘅散點餐牌，有非常多選擇，分類包括咗前菜、店式小食、滷水、湯、拌麵、湯麵、湯飯、水餃、飯品及甜品，仲列齊邊啲喺人氣，邊啲喺推介，最好喺唔收加一嘛！

不過，講到抵食，非全日套餐莫屬，包1前菜、2小食、主食、甜品同基本飲品，當然可以升級為特飲，又可以追加一啲菜式，易於分甘同味。順便都貼埋早餐、下午茶同兒童餐俾大家作參考，睇起嚟同樣划算。

基本上，餐廳採用二維碼落單，但不得不讚讚佢個落單系統，除咗分類清晰之外，菜式比餐牌顯示嘅多，而大部份食物都有再細分嘅選項，好似我揀嘅三寶麵，可轉淮山麵、米粉，湯底亦可以轉，特飲可揀冰量、甜度外，仲可以額外加唔同配料，一如晌出面賣台式茶飲店咁，非常有彈性。

清燉牛肉湯米+滷蛋+雞米花+炸花枝丸 $72

呢個喺老婆所選嘅組合，由湯麵轉咗湯米，選番清湯，湯頭雖然清，但唔覺寡。滷蛋雖香，但未有溏心效果；雞米花似喺鹽酥雞，外脆內軟；而花枝丸等我下面再講。雖然菜名叫牛肉，其實喺牛腱位，厚切大大件，好鬆化嫩滑，確喺唔錯。

招牌三寶粗麵+小黃瓜+台式香腸+炸花枝丸 $88

小黃瓜睇起嚟普通，食落就知喺醃漬過，脆爽酸香，好有開胃之效；香腸皮脆鹹香，肉質挺實，亦唔覺好肥，仲伴有生蒜頭；花枝丸炸得香口，有墨魚鮮味。

三寶即喺牛腩、牛肚、牛筋，先飲啖湯，濃香而不濁，而牛腩好鬆化，牛肚爽口，牛筋軟腍有咬口，樣樣都滷得入味；麵條就揀咗粗麵，柔韌耐浸，極具咬口，食到尾都無話腍晒。

仙草芋圓
雖然只得一小碟，純粹過過口癮，但質素唔錯，剛好三色芋圓（地瓜、香芋、紫薯）每樣一粒，咬口有韌勁，而仙草非常滑溜，淋埋花奶，啱晒我。

古早冬瓜茶加紅豆 +$10

老婆想清潤少少就選上冬瓜茶，而佢本身好鍾意紅豆，就加配一份紅豆。撈一撈，真喺堅有冬瓜，味道確喺清潤消暑，揀咗少甜，甜度啱啱好，合晒佢口味，紅豆亦好清甜。

黑糖珍珠奶茶 +$9

去茶記就近乎必然點奶茶，食台灣嘢又喺近乎點珍珠奶茶，有黑糖就百份百揀黑糖口味。奶茶做出基本水準，因為加咗黑糖，入口就更為醇厚清甜，珍珠口感亦夠晒煙韌，揀咗少冰、少甜，就確喺少冰，飲到尾茶味都唔會太過淡。

招呼確喺幾到位、貼心，而侍應好有禮，目測所見，幫襯都喺街坊多。試過兩份套餐，果然正如親友講性價比真高，值得回訪，支持小店。

個人評分
味道：8/10
環境：7/10
服務：9/10
抵食：9/10
平均每人消費：HK$95

餐廳資料：
金緣居台式料理 Goldie Cafe
地址：長沙灣昌華街23號富華廣場地下16號舖
電話：4624 7721