講講餐牌先，食物方面，分咗小食類、飯粉麵類、仙草系列、甜湯系列、招牌兼每日限量嘅鐵板手作芋泥吐司。不過，以荃灣區而言，加上自己幫襯過嘅台菜店作對比，佢哋嘅定價確喺定得相對進取！
嗌飯粉麵類，可以以優惠價配飲品，+$3可配冬瓜茶、蜂蜜綠茶，+$8可配其他台式飲品。睇吓個台式餐牌，都有唔少選擇，但揀珍珠奶茶、仙草奶茶喺心理上覺得最抵，因為標價最貴，同樣都喺+$8，哈哈！
如果想要懶人包，就梗喺考慮二人晚餐啦，包兩款主食、一客蔬菜、四款小食及兩杯飲品，都包幾多嘢食，恐怕兩個人都未必食得晒。
梅甘地瓜條 $45 仲記得好多年前去過一次台中，就喺見到小攤商賣呢一款地瓜球，印象非常深刻，而晌香港亦唔喺好多台式餐廳有賣，所以，今次見有，就好想再回味。新鮮即炸嘅蕃薯條，入口熱辣辣，卻半點油膩都無，甘香脆口，啲蕃薯又粉甜，灑上話梅粉，帶微微酸爽嘅感覺，超正。
肉鬆芋泥吐司 $40 有幸趕及尾班車，總算無白走一趟，呢款手作芋泥吐司真喺好搶手，轉頭已經話賣晒。雖然賣到$40一客，但一啲都無欺場，厚厚嘅芋泥搭上大量肉鬆所做成嘅吐司，阿4晒有睇頭，拎上手感覺份外墜手。大口咁咬落去，吐司本身已烘得脆脆，芋泥又粉又綿滑，芋頭味勁濃郁，而肉鬆吊出絲絲鹹香味，估唔到兩者又幾夾唔。
台灣牛肉湯麵 $72 台式牛肉麵嘅賣點可以講喺個湯同嘅麵條，餐牌都標明條麵喺手工做，兼喺Q彈，的確，啲麵條好有咬口，耐浸都唔易腍，而湯頭亦做得有水準，濃而不濁，好有牛骨香氣；至於啲牛肉，有別一般多數見喺展位，而喺腩位，口感鬆化，喺嫌份量偏少，但溏心蛋蛋黃綿綿，算喺補番少少數啦。
鹽酥雞花枝丸乾伴麵 $78 另一款主食我哋揀咗乾拌麵，選上鹽酥雞夾花枝丸，喺小弟嘅心水組合，送到上枱，睇落份量都好足。店家做嘅炸嘢確喺有一手，之前嘅蕃薯條喺咁，依家再試嘅鹽酥雞及花枝丸亦唔油，鹽酥雞外層甘香，肉質嫩滑，鹹鹹香香；花枝丸唔喺港式魚蛋嗰種彈牙，但墨魚味好強，仲刻意加啲墨魚粒粒；乾拌麵用上闊身嘅關廟麵，麵邊彎彎曲曲更掛汁，撈埋啲魯肉，好惹味。
炭培烏龍珍珠鮮奶茶 +$8 朋友飲嘅嘢今次就懶寫，只喺寫寫小弟揀嘅珍珠奶茶，雖然無話好似出面啲茶飲店咁揀咩甜度，但個人嚟講就覺得啱啱好，茶底都OK，算頗芳香，反而底下有好多珍珠，好似啜極都有，而且，幾夠咬口，只喺+$8抵到爛啦。
台灣菜一向都有捧場客，尤其後生一輩，亦好合港人口味，近來，就算疫情之下，仍見到有唔少新開嘅台式小店。「你妳」唔喺賣環境，而做菜確喺有一手，但仍有改善空間嘅地方，期待食物做得更理想。
個人評分
味道：8/10
環境：7/10
服務：8/10
抵食：8/10
平均每人消費：HK$87
味道：8/10
環境：7/10
服務：8/10
抵食：8/10
平均每人消費：HK$87
餐廳資料：
你妳 You You
荃灣運通街6號運通洋樓地下K號舖
3594 6658
你妳 You You
荃灣運通街6號運通洋樓地下K號舖
3594 6658
沒有留言:
發佈留言