華星冰室 Capital Café：提「星」滋味

又喺行山日，老友知我喜歡挑戰吓，。又最好行啲未行過嘅，所以，今次由友人帶路，由粉嶺出發，經「蝴蝶山徑」起步，先嚟個前菜上到480M高嘅北大刀屻，接着走到是日主菜566M高嘅大刀屻，終點就喺嘉道理農場。晌呢個位，有巴士駁去大埔或元朗，元朗就大家都方便散水，所以，落到元朗就食個下午茶補補體力，最就腳就喺落咗巴士附近間「華星冰室」，一於揀呢度攤抖吓。

呢間「華星」屬細鋪，內裡地方本身就唔好大，加上依家疫情，間起啲硬紙板，感覺就更逼狹，但都無辦法。

餐牌就一大疊，不過，下午茶時段嚟到，主要就喺下午茶餐及全日套餐中作選擇。小弟原先都諗住食菠蘿油，不過，見佢有一款炒蛋菠蘿包，都喺一樣價錢，所以，就改改要呢個餐，提升菠蘿包嘅滋味。

啲硬紙板唔止喺做間隔，仲喺用嚟宣傳吓餐廳嘅食品，如佢哋嘅包點唔落防腐，不含豬油，其實呢啲晌時下嘅飲食界都喺基本。

炒蛋菠蘿包 $25

首先個菠蘿包都有番咁上下大個，「菠蘿皮」亦好工整，而且，極之脆口，一口就碎到一枱都喺皮碎，然而，包身亦好軟熟，雖然喺來貨嘅，都喺有質素。炒蛋就睇得見塞滿好多，兼且都炒得滑，充滿蛋香，第一次食咁嘅組合，真喺唔錯喎。

熱奶茶

佢哋嘅紙板有介紹，用唔同粗幼嘅錫蘭紅茶嚟做，小弟就無深究咁樣做喺咪有根據，但總之出嚟杯奶茶色澤對辦，入口真喺醇厚細滑，茶底芳香。

友人話大刀屻依家兩邊着滿草，十幾廿年前喺光禿禿，山頂位既尖又窄，遠睇確有大刀之態，依家仲保留以前嘅鐵鏈「扶手」，都想像到以前喺幾險要。如果唔點影相、打卡，行開山嘅朋友3個半鐘內可以行得晒，否則，都幾辛苦，因為上落梯級勁多，不過，我哋啲賤命，鍾意攞苦嚟辛，哈哈。

行完山，出身汗，又嘆到份性價比咁高嘅下午茶，喺滿滿足足嘅一天。

個人評分
味道：8/10
環境：6/10
服務：7/10
抵食：9/10
平均每人消費：HK$25

餐廳資料：
華星冰室 Capital Café
元朗阜財街36-38號光華中心地下A號舖
2569 8899