寶島茶居 Formosa Tea Shop：搵食有「寶」證

上次同班老友踩單車由大埔出發，橫跨北區踩到去元朗，頭尾連食晏踩咗成6、7個鐘，算喺艱苦線。今日就唔同嘞，同番上次幾個單車友，仲預埋老婆嚟，所以，揀咗條輕鬆路線，由大埔出車，沿吐露港，再經馬鞍山海濱長廊入到烏溪沙，條路好好踩，因為無乜上落斜，大部份路段夠闊。而友人好細心，今次專登晏啲出車，踩到去科學園食午餐，而佢嘅心水喺「寶島茶居」。

雖然「寶島茶居」有自己嘅位，裝修到成個小花棚咁，但成個場仲有其他食肆，所以，都算喺個美食廣場，啲位就隨意坐。而且，啲單車亦可以擺入嚟，不過，我哋有準備，帶晒鎖，就鎖晌外面，費時推出推入。 

雖然叫「寶島」，主打台灣菜，但其實都有唔少其他嘢，一系列比較港式嘅套餐，以及台式滷飯、台式湯拉麵。 

此外，收銀前仲有兩塊黑板仔，有啲本月精選、招牌菜式。 

啲餐只奉送足料靚湯，想飲嘢就要另外加錢，珍珠奶茶、即磨咖啡都喺同樣加$7，就梗喺飲前者啦，心態覺得抵啲嗎？店長仲好醒目，問使唔使少糖少冰，當然有得揀就少糖少冰啦。 

如一般快餐店咁，自行到側邊嘅櫃枱取，如額外多要餐具、紙巾……等等，亦自行搞掂。 

煙鴨胸烏冬 $44

老婆想食啲濕吓口嘅嘢，所以，揀咗一客烏冬麵，樣貌就平平無奇，但佢話質素又幾OK喎。首先，個湯頭唔錯差，都幾鮮香，唔會淡而無味；而烏冬質感好滑溜，啲煙鴨少肥兼幾有煙燻香。

招牌海南雞飯 $55

我就見佢寫住「招牌」，就投其信心一票，但有別星洲嘅海南雞飯，配嘅喺黃薑飯，非雞油飯，而佐料有蔥油同辣醬，就無黑醬油。不過，啲雞真喺嫩滑有雞味，皮下脂肪少，雞皮又好爽，而黃薑飯亦唔錯，煮得飯粒分別，充滿黃薑香味；足料靚湯就喺白菜湯，簡單，但清甜。

珍珠奶茶 +$7

自詡為寶島茶居，台式嘢飲應該夠穩陣啩。確實，又真喺揀啱咗，睇樣又喺無咩特別，但飲落，茶底唔會死甜，亦有別港式奶茶嗰種茶味，比較幽香，而珍珠亦煙韌有咬口。

飽餐抖抖之後，又再出發，經過沙田雙子橋，晌橋位望番城門河都幾唔錯；最後到烏溪沙石灘（原來再入啲先喺烏溪沙沙灘），企晌小碼頭，唔止風涼水冷，仲奉送270°大海景！頭頭尾尾包埋食晏、影相時間，大概5個鐘，輕輕鬆鬆好寫意。 

在此，多謝老友做領隊，帶我哋踩車兼搵食，渡過愉快嘅一天。其實，真喺有諗過晌寶島嗰邊跟啲單車團踩番轉，就算唔環島，都想晌台東踩幾日。

個人評分
味道：7/10
環境：7/10
服務：7/10
抵食：8/10
平均每人消費：HK$53

餐廳資料：
寶島茶居 Formosa Tea Shop
沙田白石角香港科學園第一期科技大道西5號企業廣場地下1-2號舖
2810 6808