大快活 Fairwood：阿活晚餐

雖然日頭踩完單車，但今次由大埔至烏溪沙線都喺鬆於輕輕路線，所以，踩完都唔覺點攰。而夜晚有小組聚會要開，故此，接住落，食埋晚飯時間就啱啱好。為方便起見，食飯嘅地方就搵最就腳聚會地方附近嘅「大快活」。

呢間大快活屈晌個小型商場裡面，位置可以講幾「偏僻」，好少區外客，幫襯絕大多數都喺街坊、附近活動嘅團體。所以，一般而言，大部份時間都喺客人唔多。

有咩食都唔講咁多，本地幾間連鎖快餐店，經常賣廣告，菜式大致有咩大家都好熟吓。一人火鍋、煲仔飯、燒味飯、焗豬、咖喱……都喺嗰啲啦。 

香蔥豬扒飯 $43.5

揀呢款豬扒飯都喺貪佢平平哋，夠穩打穩紮，又包埋嘢飲。果然，夠平實，一碗白飯份量，兩大件煎豬扒，再淋上蔥油汁，不過，伴菜就次次都喺炒平價嘅椰菜。豬扒都煎得香口嘅，肉質亦鬆化，總之，你唔太多要求，佢哋嘅出品都叫OK。身邊唔少人話阿活啲奶茶滑，不過，飲咗咁多次，小弟就唔覺喇，但茶味就不俗，幾香濃。

順有一提，晚市有提供送餐服務，當然，以快餐店而言，已經喺好好，但更細心嘅喺，另外醒多杯熱水過水，唔喺用嚟飲，而喺浸餐具，呢份貼心客人會睇在眼裡。 

雖然，對大快活嘅出品印象麻麻，但時不時都偶有佳作咁啦，今次嘅豬扒飯，OK喎。

個人評分

味道：7/10
環境：7/10
服務：8/10
抵食：8/10
平均每人消費：HK$44

餐廳資料：
大快活 Fairwood
葵涌青山道412-416號葵星中心LG樓21-25及27-31號舖
2856 4458