環境方面，上次嘅食評都講唔少，所以，今次就唔多提，可以講嘅喺設計有個性，不愧喺沿自品牌服裝及配飾店手筆，當中大大個店名標記嘅「攝影棚」，喺模仿模特兒出場前嘅後台臨時白色背景紙拍攝區，更喺店中主打打卡位置。另外，「13點」嘅時鐘，亦喺另一打卡場景。
「素‧英式下午茶」由2:00pm-6:00pm供應，包多款鹹點、手工甜品及小食，兩杯飲品，二人份量賣$688 + 10%，但溫馨提示，呢一款素英式下午茶需24小時前預訂。此外，從餐牌所見，佢哋仲提供另外兩款素食：以「OmniPork新豬肉」所做嘅素肉醬意粉及引入「Moving Mountains 植物熱狗腸」 嘅低卡素食英式早餐，回應番近年素食興起嘅趨勢，令選擇更多元化。個人覺得，就算唔喺素食者，都不妨試一下。
素‧英式下午茶 $688 雖然話預訂咗，部份食物如水果撻亦喺預先做好，但其製作都需時，需耐心少少等候。卒之，三層架嘅英式下午茶龍重登場，至於有無先後嘅品嚐次序，有啲人就覺得先鹹後甜喺最好，有啲人就鍾意間住間住一鹹一甜，其實，開心就OK啦，小弟為方便自己記錄，就由上而下逐層食，再者，最上層有沙律，食先都喺正路嘛。
手工蕃薯脆片 先試試啲手工脆片，其實簡單嚟講就喺將蕃薯刨成薄片再炸香，入口非常香脆，蕃薯味都突出架，如果配杯啤酒就仲爽呀！
最高嘅第一層有柚子藜麥沙律及時令水果撻，同老婆一人一杯柚子藜麥沙律，而時令水果撻其有四款口味：藍莓、蘋果、士多啤梨及無花果，費事分嚟分去，我哋各揀兩款水果撻嚟品嚐。大家不妨留意下，有唔少鹹點或甜點都食上用鮮花作裝飾，賣相更添美意。
柚子藜麥沙律 藜麥唔使多介紹，因為喺近年成日被人講嘅新興超級食物，營養價值豐富，配上清香爆汁嘅柚子肉，簡單得嚟好清新，好醒胃，店員更說明柚子喺有機貨，更健康。啱啱食完啲手工蕃薯脆片，以呢個沙律作為清清味蕾就最好不過。雖面面放咗好多超細乾辣椒絲，但辣度極微，不過，襯番晶瑩嘅柚子肉就好突出喇。
蘋果撻、士多啤梨撻 首先，啲撻殼做到又薄又鬆脆，已成功咗一半，而各款水果撻裡面都會配上唔同口味嘅吉士，蘋果撻配上焦糖味吉士，而士多啤梨撻就配番士多啤梨味吉士，味道各有千秋，但就同樣好滑溜細緻。生果方面夠新鮮，就已經無得輸喇。順帶一提，老婆所試嘅無花果撻用上忌廉芝士作餡，濃郁有個性，頗有驚喜。
中間第二層就有迷你未來牛肉漢堡、青瓜粒素菜脆餅、夢幻紫薯撻，每樣都安排咗二人份，樣樣都試到唔使揀。但有一個謎思，夢幻紫薯撻晌餐牌中列為鹹點，但帶濃郁嘅紫薯味，小弟點都覺得佢喺一件甜點嚟。
迷你未來牛肉漢堡 未來牛肉漢堡唔喺第一次食，不過，之前就食正常版，但呢種「未來牛肉」（Beyond Beef）真喺幾神奇，明明喺以植物做，但口感跟味道就真喺似足食漢堡牛肉咁，多汁又嫩滑；麵身加入竹炭元素，最得意仲有連芝士都喺純素，細細個，一口就處理掉。
青瓜粒素菜脆餅 大大朶食用紅花，令其賣相十分搶眼，底下青綠色嘅其實喺加咗蔬菜汁所做嘅超迷你班戟，口感綿綿；而上面放咗大量乳酪醬調和嘅青瓜粒，口感清爽得很。
夢幻紫薯撻 除了小紅花，仲插咗一小朶玫瑰花，加上紫薯嘅色澤，既夢幻，又好少女風。外層嘅撻殼脆得無比，紫薯蓉打得綿滑，味道甚粉甜，唔怕食食用花嘅朋友，更可以連埋玫瑰花一齊放入口（緊記搣走支花梗先），玫瑰花嘅香氣跟紫薯味都幾夾架。
嚟到最底下嘅第三層，喺蘆筍酥皮撻、磨菇酥皮撻同英式提子鬆餅配奶油忌廉及藍莓果醬，由於奶油忌廉及藍莓果醬都喺原樽奉上，但英式提子鬆餅則只有兩個，肯定會有食剩，所以，店員都話非常歡迎客人帶走食剩嘅忌廉同果醬嘅，否則真喺好嘥吓。
磨菇酥皮撻 老婆就試蘆筍酥皮撻，佢話啲蘆筍仔好鮮嫩，而小弟則試磨菇酥皮撻，酥皮層搓得口感十分酥脆，而且甚富牛油香；面頭嘅磨菇好有菌香，酥皮撻內填滿香濃嘅忌廉汁，整體好食喎。
英式提子鬆餅配奶油忌廉及藍莓果醬 最後，就試埋件英式提子鬆餅，藍莓果醬就唔多介紹，相信大家平常搽麵包時都食唔少，而奶油忌廉有啲似忌廉芝士，質感挺身啲，味道有份濃郁嘅牛奶香，厚厚咁塗在鬆餅之上，食口好有滿足感。
飲品方面，可以揀咖啡、熱茶、凍水果茶或梳打，所以，可以選嘅飲品款式都幾多；如果想試吓佢哋嘅花果茶系列都得，只需要加$10就可以。
黑糖薑拿鐵 餐牌標示呢一款喺新口味嘅咖啡，所以，吸引小弟試試。外觀有着招牌嘅星球圖案，入口咖啡味頗為香醇，但黑糖嗰陣陣天然甜香唔算好強，反而，嗒落陣薑味幾突出吓。
洋甘菊柑橘茶 洋甘菊就飲得多，加多柑橘嘅元素，老婆話有啲期待。眾所周知，洋甘菊嘅茶味唔會好重，屬幽香嘅一類，故此，飲落柑橘味就較為出啲，整體嘅感覺喺幾舒暢嘅。
總括而言，食得出用料不賴，加上以素為主題，滿足到老婆嘅「素」求，再者，環境幽靜又舒服，招呼又幾好，啲杯碟都好靚，讓我倆有個愉快又輕鬆嘅時光。
個人評分
味道：9/10
環境：8/10
服務：8/10
抵食：7/10
平均每人消費：HK$380
味道：9/10
環境：8/10
服務：8/10
抵食：7/10
平均每人消費：HK$380
餐廳資料：
Vivienne Westwood Cafe
銅鑼灣百德新街27-47號Fashion Walk 1樓F-8號舖
2799 5011
Vivienne Westwood Cafe
銅鑼灣百德新街27-47號Fashion Walk 1樓F-8號舖
2799 5011
沒有留言:
發佈留言