餐廳走嘅喺日式居酒屋路線，不過，午市就當然喺以定食為主。大致上，午餐分兩大類，第一類「廚師推介午餐」，主菜3揀1，都喺一啲飯品，定價$98-$118，另加$18轉為定食套餐，多咗沙律、前菜、吸物同指定餐飲。
而另一類午餐「淼屋精選午餐」，就以配對形式，主菜7揀1，小食就7揀2，可配白飯或讚岐湯烏冬，仲包埋沙律、前菜、吸物同指定餐飲，價錢就視乎所揀主菜，定價為$138-$188。我哋各人點一款，但主菜、小食都喺共享。
燒西班牙黑毛豬梅肉爽（配烏冬） $168 老友點選咗梅肉爽，純粹因為打正旗號用西班牙黑毛豬，故此，睇高一線。主菜連埋啲小食、沙律……等等，成份定食捧到嚟都幾大堆頭，份量十足，而且，睇起嚟質素亦不賴。
燒椎茸、燒茄子小食方面，呢份定食就揀燒椎茸、燒茄子，原來前者就喺燒冬菇，但都幾厚肉，燒得香，又無話燒乾水，咬落去都仲喺好夠汁。
西班牙黑毛豬梅肉爽我都試一試佢啲梅肉爽，其實即喺梅頭，煎出唔少焦香位，而睇落有少少半肥瘦，故入口有油香，又唔會太肥，而且，啲肉質好軟腍，又有肉香。
稻庭烏冬烏冬喺稻庭烏冬，喺賣點嚟，配上簡單嘅醬油湯底，而烏冬食落有麵粉香，質感柔韌，亦耐浸，唔會腍晒身，而且，口感頗為滑溜。
燒慢煮美國安格斯牛小排 $188 小弟就較喜歡食牛，所以，揀咗牛小排，而兩款小食就睇中日式炸豆腐、車厘茄鴨胸串燒，配上白飯，同樣，配搭埋其他嘢，一樣喺大大份咁捧到嚟。咁等小弟逐樣逐樣慢慢分享啦。
薯仔沙律 有別慣常嘅和風沙律，呢一道明顯較西式，薯仔壓成蓉做成一球球薯仔沙律，墊啲沙律菜，加粒車厘茄做裝飾，感覺欠特色，味道不過不失啫。
前菜就算喺日本菜，前菜大多數都會喺啲開胃菜，不過，今次定食個前菜喺汁煮蘿蔔，件蘿蔔入口嫩滑無渣，兼且煮得好入味。
吸物我相信大部港人，都會有個印象，就喺定食跟湯都會喺麵豉湯，不過，呢度嘅定食就採用「吸物」，即喺清湯，飲落個湯真喺好清，亦相對少「湯渣」，俾客人清爽一下口腔。平常提供麵豉湯喺叫「汁物」，所以，叫味噌汁，因為較濃郁，會喺結尾時飲。
日式炸豆腐、車厘茄鴨胸串燒炸豆腐裁到細細粒，做到一口一件，方便入口，而外脆內嫩，又有豆香，淋上少少醬油，都幾惹味；而車厘茄燒過蕃茄味更濃郁，鴨胸則軟腍有種獨有嘅鴨胸煙燻香。
安格斯牛小排經過慢煮，再煎香，所以，牛小排嘅色澤非常之靚，外層帶有焦脆嘅口感，而裡面就好軟腍，既有肉香，又富肉汁，沾上少少芥辣，就更加惹味，牛小排本身嘅質素確喺唔錯。
鴛鴦檸蜜天氣凍，飲杯熱檸蜜就份外暖和，又滋潤，初時無為意，都以為喺普普通通嘅檸蜜，篤完啲檸檬，再飲幾口時，就發現喺用上青檸同檸檬，多咗另一層酸香感。
個人評分
味道：8/10
環境：7/10
服務：8/10
抵食：8/10
平均每人消費：HK$195
味道：8/10
環境：7/10
服務：8/10
抵食：8/10
平均每人消費：HK$195
餐廳資料：
淼屋 Myouya Izakaya
上環蘇杭街57號Akvo酒店1樓
3188 8005
淼屋 Myouya Izakaya
上環蘇杭街57號Akvo酒店1樓
3188 8005
沒有留言:
發佈留言