鍾意佢哋編排啲枱櫈唔會好「密質質」，加上柔和嘅燈光，感覺幾舒適。而餐廳最入嘅位置，有個廂房，可以坐到8個人，依家疫情關係，就間為幾張枱啦。
而近入門口左邊，就喺開放式廚房，睇到師傅們不停煮麵及製作各種食品。其實，隔離有個房，喺造麵工場，佢哋嘅麵條喺每日新鮮現場製作，亦喺店家嘅賣點之一。
所以，晌餐牌頭幾版，都有特別介紹自家亮點，如所得嘅獎項、堅持自家製，拉麵、湯汁都喺日日新鮮製作，喺日本人做菜嘅匠人精神。故此，定價方面都較為進取。
枱上除咗放上基本嘅醬油、調味料之外，更有獨立包裝好嘅毛巾、一次性圍裙，呢啲咪服務質素囉！喺就喺有啲唔環保，不過，無即場用，袋走第時行山啱晒用。順帶一提，呢度嘅服務幾好，不時為客人添茶，啲綠茶好幽香，而且，仲會跟一跟客人嘅出菜狀況、食物滿意度，了解吓客人嘅意見。
翻一翻餐牌，拉麵固然喺主打，仲有啲特色沾麵、飯品嘅定食、多款一品料理、特色飲品及甜品，可謂照顧到唔同客人嘅需要，尤其一啲家庭客，唔使咁單一淨食拉麵。
自家制吉列和牛芝士丸 $72 見唔少人都讚呢一道和牛芝士丸，所以，好奇下我哋都試一試。一客有3粒，而成品比預期大粒，炸得金黃，一口咬落去，外層脆到不得了，非常甘香，唔油膩，裡面嘅和牛打得好鬆化，帶脂香，配上溶透嘅芝士，味道、口感都非常之正。
多賀野醬油拉麵 $128 以店名命名，當然算喺招牌作啦，所以，老友就試咗佢哋嘅醬油拉麵。老友讚其湯底清香，唔會好似豬骨咁漿口，啱佢口味，拉麵軟滑有韌性，叉燒肥瘦適中，合佢心水，而溏心蛋大讚一流，話定價貴少少都值。
粟國塩味拉麵 $128 其實，我自己對拉麵嘅湯底無特別偏好，濃又得，清又得，微辣都OK，喺大辣嘅頂唔到啫。因為以往試過唔少濃重嘅豬骨湯拉麵，啱剛呢度就唔賣呢種，揀咗較溫和嘅塩味拉麵又試吓喺點。
一碗拉麵的靈魂之一，就喺啲湯，上文都講到，湯汁日日新鮮製，而且，以雞、豚、鰹魚等優質食材精心熬製，飲一啖，果然鮮甜不膩，湯色清澈唔會泛油。
拉麵另一主角就喺叉燒，唔算好厚，但肥瘦適中，咬落肉質好鬆化，又富油香，卻喺唔算好膩，做得有水準。
溏心蛋就完全喺無得輸嘅出品，單喺睇樣就知高質素之作，蛋黃特別紅，呈半熟狀態，入口黏綿富蛋黃香氣，堅好食。而蛋白部份爽口，且有陣陣醬油香氣。
配料就仲有紫菜、筍乾、大蔥花、蒜蓉，啲筍乾好香，又爽脆，蔥花、蒜蓉跟麵條撈勻食，別有一番味道。
靜岡綠茶可樂 $38 老友喺綠茶控，所以，揀咗一支綠茶可樂，不過，點睇都有別我哋想像中嘅可樂。飲過之後，佢話有陣陣綠茶香，又覺得似喺有少少可樂味咁，唔肯定，但感覺幾得意。
完熟水蜜桃汽水 $38 食拉麵我都鍾意配汽水，平常就都喺可樂、雪碧，但見有啲特別嘢就試特別嘢啦。本來就想試洋梨汁，可惜暫定供應，水蜜桃汽水就成為我心水，上一兩個星期先飲過呢一款汽水。貪其富蜜桃香味，陣果香都幾清甜。
見店家有甜品供應，啲款式又幾吸引，定價都OK，而我哋今日嘅戰鬥力又唔錯，最終都一於點多兩客甜品嚟作結。
抹茶紅豆千層蛋糕 $38 我都估老友喺點呢款甜品，話晒喺綠茶抹，加上千層蛋糕食手工都抵啦。睇到一層層，唔單餅皮加咗抹茶元素，就連忌廉都喺，中間就加一層紅豆蓉。小弟都試咗一口，抹茶味好強勁，幽香，配上清甜嘅紅豆，好夾又好食。
富士蘋果生芝士蛋糕 $38 小弟就喜歡芝士蛋糕多啲，加上配富士蘋果，都較少見嘅組合。底層喺薄薄一層海綿蛋糕，上層就喺芝士蛋糕，淡淡嘅芝士香，幽香得嚟唔太搶，質感柔滑，而底下見到好多蘋果果肉，非常清甜。
今餐真喺大滿足，都好少食拉麵食到咁飽、咁豐富，最緊要樣樣都啱口味，又好食嘛！無論拉麵，抑或小食、甜品，都有水準，可謂面面俱圓！
個人評分
味道：9/10
環境：8/10
服務：9/10
抵食：8/10
平均每人消費：HK$265
味道：9/10
環境：8/10
服務：9/10
抵食：8/10
平均每人消費：HK$265
餐廳資料：
多賀野 Takano Ramen
沙田沙田正街18號新城市廣場一期1樓167號舖
2887 8133
多賀野 Takano Ramen
沙田沙田正街18號新城市廣場一期1樓167號舖
2887 8133
沒有留言:
發佈留言