七代目食堂 Aniki Don：搵食好「燒」息

自表姨女搬咗入西貢鄉郊住，喺不時先出嚟市區，所以，都好耐無同佢食飯。咁啱傾開偈，呢晚小弟無飯開，佢又出咗嚟市區，故相約食餐便飯。地點就番佢，因為佢出開嚟就會返佢阿媽屋企瞓，揀長沙灣，佢就建議呢一間居酒屋「七代目食堂」，小店，有啲質素。其實，我都方便，兩個站就返到美孚。

佢話依家去唔到旅行，嚟呢度，都好有感架。的確，餐廳嘅裝潢，由外面到裡面，由牆身到天花，都極富和風。一室以木系為主調，兩邊牆上嘅白鶴，掛上滿滿嘅旗海，都充滿日本風情。

餐廳兩邊有多張4人枱，而入啲近尾，仲有L型嘅吧位，設置咗鐵板燒枱。 如果入門前你有留意，佢鋪面都掛咗大大個鐵板燒嘅招牌。

翻開餐牌，真喺有幾多選擇，由沙律、小食、刺身、壽司、鐵板燒、丼飯到烏冬，仲有多款二人餐、四人餐。我哋就想試試啲鐵板燒定食，有12款，定價$148-$268，按唔同餐配上沙律、炒野菜、水果、麵豉湯或白飯之類。

A2. 日本豚肉薄燒、帆立貝（二本）$198

呢個鐵板燒定食組合會配埋沙律、炒野菜、水果、麵豉湯、白飯。先上場喺俾咗啲沙律同生果，前者只喺生菜加粟米粒，淋上柚子醋，不過，粟米粒食得出唔喺罐頭嘢，仲好清甜；件蜜瓜則非常爽甜，喺唔喺日本貨就唔知，無刻意問。

麵豉湯

喺簡單版本嘅麵豉湯，即喺有啲昆布同豆腐，無話再有其他嘢，麵豉味都幾濃郁。

帆立貝

雖然就咁話個餐有兩粒帆立貝，無特別提點整，但睇到師傅製作，又加清酒，又加牛油，成品嘅賣相幾唔錯，帆立貝入口口感幾彈牙，有微微焦脆香，此外，更加唔好錯過殼上嘅湯汁，帶微微酒香，好飲。

日本豚肉薄燒

薄薄嘅豚肉包住炒香咗嘅蔥花同洋蔥粒，簡單煎香即成，一客有6件之多，隨着白飯送上，剛好用嚟餸飯。啲豚肉幾嫩滑，充滿蔥香，所以，唔會覺得膩。沾點醬汁，入口就更惹味。

鐵板炒野菜

隨後仲上埋炒野菜，剛剛好配飯食，一般嚟講，鐵板燒嘅炒野菜不外乎椰菜，加啲甘筍絲。啲椰菜炒得幾爽脆，味道鮮甜，亦有啲「鑊氣」感。

A9. 日本一口和牛、鐵板野菜炒麵 $178

而另一款鐵板燒定食因為配炒麵，所以，就無跟白飯，單單只配有沙律、水果、麵豉湯。

日本一口和牛

亮點喺用上和牛，不過，個人略嫌份量有啲少啫，但啲和牛裁得大細啱啱好，一口一件，質感軟腍，富肉味得嚟，仲充滿油香，伴以炸蒜片，金黃香脆。

鐵板野菜炒麵

上文都講過啲鐵板炒野菜，依家就加多咗炒麵，份量又大碟啲，而且，野菜面面糝咗好多紫菜粉，增添唔少風味。椰菜炒得爽脆，麵條炒得爽身香滑，惹味就惹味喇，如果少番啲油感覺就更健康啲。

小店通常招呼都特別好，加上今晚唔算多客，所以，服務都好熨貼。我哋兩個食吓、傾吓，都真喺耐無見，家族活動又未恢復，所以，閒話家常都傾咗好耐。

個人評分
味道：7/10
環境：8/10
服務：8/10
抵食：7/10
平均每人消費：HK$210

餐廳資料：
七代目食堂 Aniki Don
深水埗青山道155-181號天悅廣場地下B2號舖
2512 9001