任飲任食一向都有好多捧場客，好似今晚咁，閒日嘅星期二，早早就坐滿人。餐廳環境唔錯，如一般點心專門店，地方四正，整潔光猛，最緊要唔會太逼。服務值得一提，幾位樓面阿姐做嘢快手，又有禮，坐滿客時又會校大番啲冷氣，你拎咗啤酒，佢哋又會醒目送上啤酒杯，更會主動添湯。
門口大大個易拉架標明晒收費，2小時任飲任食雞煲火鍋點心，8:30pm前收$188，8:30pm後就收$158，另外，$10醬油費，加一服務費，喺咁多。
任食火鍋有啲咩揀呢？一張點菜紙睇晒，5款湯底供選擇，而火鍋配料就唔多講，各種肉類、丸類、海鮮、蔬菜……等等，40多款，夠晒啦。份量會以填嘅人頭數去出菜，不過，都喺有多無少，成晚亦無咩漏單。
而點心部份，亦有成12款，店員話全部都即叫即蒸。落單就好似平常飲茶咁，基本試上喺斷籠計，好似蝦餃，咪一籠3隻咁囉。
任飲又點？所有飲品放晒晌近門口嘅凍櫃中，有汽水、果汁及啤酒，款就唔及一啲日式放題嘅咁多，但啱飲就OK。好似一開初，就試咗啲西柚菠蘿汁、熱情果香橙汁，味道OK喎，酸酸甜甜，襯火鍋都幾多，汽水就更加唔少得啦。
東哥蝦餃皇 湯底嚟到都要等滾起先有得食，所以，先點幾款點心試試。叫得蝦餃皇，都應該有番一定水準。確實摺紋清晰，皮薄餡靚，裡面鮮蝦大大粒，爽口鮮甜。
蟹籽燒賣皇 燒賣亦做得唔錯，大大粒爆滿餡，而且，唔會得啲豬肉，仲有鮮蝦肉，更喺無乜肥肉晌裡面，加少少蟹籽作點綴，好食。
鮮人參灌湯餃 巨型嘅灌湯餃，放上少少素翅，賣相真喺幾有睇頭。人參湯唔錯，餃內填滿好多料，不過，外皮有啲粉腍，感覺麻麻哋啫。
跟住都喺時候食火鍋，外面有醬料區，不過，醬料嘅款式就唔多，都喺基本嘢，蒜蓉、辣椒、蔥花、芫荽、豉油，可惜無小弟喜歡嘅沙嗲。
懷舊醉雞煲 雖然辣雞煲惹味好食，但都喺肥膩，老友都想食清少許，所以，揀呢一款。雖然話醉雞，但其實個湯底似藥膳，味道又幾香。而醉雞件喺分開碟上，咁就可以慢慢分開煮，唔怕煮老晒。
啲雞件又真喺幾好食，初初聞落就有陣陣酒香，但煮過後啲酒氣散咗，然而，啲雞肉好嫩滑，沾少少蒜蔥豉油，雞鮮味更突出。轉眼，成碟雞就被我哋處置晒，哈哈！
因為都開始好多客，所以，我哋就一次過先點一大輪食物，唔夠先再加。睇見咁多嘢食，未食都興奮。
美國頂級肩胛牛肉 幾款牛肉之中，肩胛牛肉同牛板腱喺最鍾意嘅，先講肩胛牛肉，油份明顯唔會好多，由於薄切，輕輕灼一灼轉色就食得，入口脂香無咁重，主要食其肉香，肉質嫩滑細緻，富肉香。
美國頂級牛板腱
西班牙豚肉成日話肥豬肉，但啲豚腩肉一啲都唔肥，仲切得薄到透光，雖然喺豬肉，因超薄而無需要灼太耐，啲豚肉估唔到又喺好嫩滑，最緊要又唔會太肥嘛。
澳洲和牛粒 睇見喺和牛粒，自然有啲期望，不過，睇外觀顯然有啲過肥，怕啲油脂逼晒出嚟，所以，我哋喺等到最尾先食佢。整體而言，和牛粒真喺唔多OK，因為偏肥。
特選頂級肥牛 啲肥牛唔錯，雖然，望上去真喺油脂偏多，但灼熟之後，啲肉同油脂縮一縮，感覺又唔喺咁犀利，入口軟滑而充滿油香。
包心蝦籽丸、松葉蟹柳丸類我哋只喺試當中嘅一款：包心蝦籽丸，依類包心丸應該喺來貨，雖然喺咁，個質素都唔差，內裡有唔少蝦籽。而蟹柳雖然叫松葉，當然唔會諗佢喺由日本松葉蟹所做啦，同樣喺來貨，亦都唔差，至少唔會喺一嚿嚿粉嘅貨色！
跟住，分享吓一啲海鮮類同內臟類，點咗5款，師傅好有心，排列整齊好一大碟過送上枱，望上去確喺好睇好多。
鮮脆鯇片啲脆鯇片切「雙飛」，切得賣相好靚仔，而魚片色水有光澤，輕灼變白就食得，入口好有魚鮮味，而且，亦比無預期中更強嘅爽脆感，沾點豉油提鮮，非常好食。
鮮脆魚腩 原本諗住啲魚腩位會多魚脂，不過，睇起嚟又唔喺，入口，其實跟食啲脆鯇片差唔多。
廣島蠔啲蠔睇落幾新鮮，外表富光澤，估唔到啲蠔烚完仲咁大隻，唔會縮到得番個銀仔大細，而且，蠔味都幾濃，質素比預期中好。
鵝腸不約而同，我哋都話好耐無食過鵝腸。啲鵝腸洗得夠晒乾淨，食落唔會有一陣陣羶臊味，而口感好爽脆。
鮮栢葉 有時飲茶都會食到，打鞭爐又喺好似好耐未食過，啲栢葉好新鮮，入口一樣喺「嗦嗦聲」咁爽口。
響鈴都喺跟番普遍食法，簡單湯灼，輕輕一拖，響鈴吸咗少少湯汁，面層軟軟腍腍，內層仍有少少香香脆脆。
油麥菜 我哋無特別點太多菜，只喺點咗一客油麥菜，再清晒墊碟嘅生菜而已，純粹心態上食咁多肉，就叫做食番少少菜嚟平衡一下。
沙律蝦春卷、流沙擂沙球 臨尾就以點心甜品作結，但點解仲會點一客沙律蝦春卷，因為老友貪口爽，話未試過。個春卷新鮮炸，非常香脆，裡面釀咗啲沙律蝦，令春卷食起喛更清爽，真喺幾唔錯；而流沙擂沙球亦值得推仲，喺煎堆仔加擂沙湯圓嘅混合體，外層脆口並充滿芝麻香，入口黑芝麻流沙，正！
千層紅棗糕雖然，層次就唔喺話好分明，不過，入口煙糯，卻唔黏牙，紅棗味突出，作為飯後甜點亦非常合適，此外，呢類糕點小分本身都鍾意食。
今餐真喺食得滿滿，單喺食點心都食咗唔少，而火鍋配料亦試咗好多，好在老友都好擦得，先至可以試到咁多嘢，全部清晒，一啲都無嘥。
個人評分
味道：8/10
環境：8/10
服務：9/10
抵食：9/10
平均每人消費：HK$185
味道：8/10
環境：8/10
服務：9/10
抵食：9/10
平均每人消費：HK$185
餐廳資料：
東哥點心籠仔蒸飯專門店 Dong Gor Dim Sum
旺角荔枝角道33號百匯軒2號舖
2886 1029
東哥點心籠仔蒸飯專門店 Dong Gor Dim Sum
旺角荔枝角道33號百匯軒2號舖
2886 1029
沒有留言:
發佈留言