西關老祖 Sai Kwan Lo Jo：最後「西」選

踩完單車都好晏，老婆亦多嘢做，所以，簡單啲索性買啲嘢返去食，當晚餐。過到嚟「葵廣」買日用品，故此，順利成章可以幫襯吓呢度啲小店。晌一、二樓打個轉，真喺有幾多選擇，最後篩選出試試「西關老祖」，因為有老婆超鍾意嘅炒年糕。

其實，初初經過鋪面，齋睇店名，真喺唔知佢買乜，不過，鋪面貼有好多食物相，再睇睇餐牌，又有幾多特色嘢，事後跟店員交流，啊！原來喺主打老廣州嘅西關嘢，款式仲非常之多，真喺唔可以睇小啲小店，最正喺有啲十幾廿蚊就有交易。

鋪面有部外自助落單機，如果熟嘅，客人可以自行搞掂，否則，亦可以撳撳櫃枱嘅鐘仔，麻煩店員幫忙。

大概等10分鐘左右，就整好晒，拎返屋企兩公婆慢慢嘆。雖然只喺外賣嚟，但店員都好有禮貌，多謝前，多謝後，又將啲食物放整齊晌個袋中。

爆炒XO醬蘿蔔糕（自家製） $38

呢個真喺幾正，蘿蔔糕切成方粒，的的骰骰，大細剛好一口一件，煎香再加XO醬炒勻，非常香辣惹味，而自家製蘿蔔糕本身亦做得好，食得到有蘿蔔嘅清甜味，唔會得堆粉，口感挺實。

炸 • 黑毛豬肉粽（自家製）配可樂 $45

粽就當然食唔少，不過，炸粽就幾敢肯定喺第一次，因為完全唔喺好知有呢樣嘢。炸粽可以配辣油或沙糖，選後者因為小弟都唔嗜辣。炸粽增加咗香口感，但唔會好油膩，咬落軟糯，啲黑毛豬肉唔肥膩，老婆食落都話OK！

極黑 • 黯然銷魂飯配可樂 $56
好似「楊枝甘露」咁，「黯然銷魂飯」真喺香港人先知喺咩嚟，亦喺一種集體回憶。呢度嘅叉燒用上西班牙黑毛豬，亦唔會用啲色素去醃，雞蛋喺日本蛋，可見誠意十足。叉燒入口好鬆化，唔肥，卻又唔會好嚡，而雞蛋煎到蛋黃仲喺好流心，撈飯就特別正。

幾樣都飽肚嘢，真喺好豐富嘅一餐，而且，味道亦唔錯，又有特色！

個人評分
味道：8/10
環境：7/10
服務：8/10
抵食：8/10
平均每人消費：HK$70

餐廳資料：
西關老祖 Sai Kwan Lo Jo
葵芳葵富路7號葵涌廣場2樓2003號舖