世一冰室 Sai Yat Cafe：又一股新「世」力

從明愛醫院走出大街，第一眼就會見到呢間茶記「世一冰室」，一來正正角落位，二來周邊大多數鋪頭都閂晒門，燈火通明嘅外觀就更加顯眼。我哋都喺求個方便，入去食完晚飯就返歸，再者，我記得舊年都幫襯過佢，但就喺順寧道店，而呢間似乎喺新店，因為見佢食評唔多。

踏入餐廳，都喺茶記格局，左右兩排卡位，中間喺啲可搬動嘅二、四人枱，而地方企理，夠光猛，樓底亦比較高。

講到食物，茶記勁就勁在乜都有，晚市嚟講，有常餐、蔥油太陽蛋系列、日式蛋包飯、懷舊滋味系列、西式碟頭、秘製馬來咖喱、皇牌焗飯、小食、港式鐵板餐，以及世一招牌嘅炸雞。

羅宋湯

好搞笑，坐低未點餐，侍應大哥就送上兩碗羅宋湯，佢話例湯嚟，送嘅，羅宋湯本身就啱我哋。個湯味道夠濃，酸香醒胃，裡面又多料喎，真唔錯。

香煎豬扒蛋包飯 $63

蛋包飯可以揀日式燒汁或日式咖喱汁，老婆就話當然喺咖喱汁啦，配蛋包飯特別夾。唔喺講笑，件有骨豬扒好大件，煎得香口，肉質鬆化，雖然唔喺一層蛋皮包住啲飯，但確實炒得好滑，加埋啲咖喱汁，好味。

牛肝菌烤雞扒焗飯 $68

焗飯果然要等候需時，送到嚟真喺熱焫焫，一股熱氣湧上嚟。烤雞扒好香口，雞肉嫩滑，仲有兩大片煙肉，鹹鹹香香，反而覺得牛肝菌汁底嘅菌香隱若少少，但值得一讚喺用上炒飯底，整體味道唔錯。

熱檸水 +$3、奶茶紅豆冰 +$10

老婆例牌熱檸水，基本上啲檸檬酸爽唔澀已收貨；小弟向來晌茶記就慣性要奶茶，見有奶茶紅豆冰，老婆又鍾意食紅豆，一杯嘢滿足晒我哋。奶茶嘅茶底夠香，而一睇就知有非常多紅豆，煮得又綿又清甜，夾奶茶，好飲又好食。

雖然兩個人試嘅嘢唔多，就喺兩個餐，但食物質素唔錯，地方企理，食茶記好就好在又無加一，所以，值得翻兜。

個人評分
味道：8/10
環境：8/10
服務：8/10
抵食：9/10
平均每人消費：HK$72

餐廳資料：
世一冰室 Sai Yat Cafe
地址：香港荔枝角青山道468號One New York地舖
電話：2411 1238