山區裡的走走趯趯: Hunky Dory：秋日暖陽下午茶

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2021年11月20日星期六

Hunky Dory：秋日暖陽下午茶

呢排天氣非常之好，涼涼哋，濕度低，中午曬得嚟唔熱，一喺行山，一喺出車，老友約我踩番轉，由太和沿吐露港公路剷到去大圍，再兜另一邊由大涌橋路上返到去，輕鬆踩。尾程，專登晌科學園食個早鳥下午茶，抖抖之餘，更享受吓秋日暖陽。故此，是日就嚟咗科學園三期呢邊嘅「Hunky Dory」，貪佢屬平台層，有片大草地。

餐廳環境非常寫意，採半開放式設計，對出有幾張高腳枱櫈，可惜已有客，未能盡享「戶外」風情。不過，我哋被安排最外一排圓枱，感覺亦非常正，加上陽光普照，感覺明媚。

至於餐廳嘅其餘環境，裝修都好有格調，可見都花咗啲心思，就算睇唔到戶外景，坐落都蠻舒服。如果夜晚到訪，相信都頗有氣氛。

呢度喺以數碼方式落單，掃一掃二維碼，再自行揀食物、飲品。

而入口處都有貼出餐牌，不過，字就細粒啲，都唔方便慢慢睇，純粹貼出嚟俾啲客睇睇餐廳有啲咩菜式供應。

愛爾蘭健力士牛肉批 $138

多年前去澳洲，到訪一啲小鎮，食過一個得獎嘅牛肉批，都幾難忘。本來嚟到都喺諗住「迤」吓，但見到呢一個牛肉批，又真喺想試試。跟澳洲食嗰種乾身嘅唔同，呢一款喺燉牛肉，再加上一層酥皮焗香去。面層嘅酥皮好香脆，而裡面唔只有牛肉，仲有啲鮮蘑菇同新薯，牛肉非常入味，口感鬆化，且帶有一陣陣嘅啤酒香，感覺幾得意。

特濃咖啡芝士蛋糕 $48

一向都幾鍾意食芝士蛋糕，襯杯鮮奶咖啡更喺一種享受。件芝士蛋糕賣相唔錯，唧上忌廉花、朱古力漿，再加啲雜莓做點綴。打橫一睇，消化餅做嘅餅底，近底薄薄一層咖啡軟漿，再上喺咖啡芝士，而講到味道，真喺做得有水準，咖啡味頗為香濃，嗒落再滲出芝士嘅鹹香味，口感挺實，卻帶微微濕潤，所以，入口唔會「乾崢崢」。

自家製蘋果批 $58

唔怪得喺招牌作，真喺賣相都已經好搶眼，大大個嘅蘋果批，除了一大球雲呢拿雪糕之外，仲淋上好多焦糖漿，完全合晒小弟口味。雖然喺配普通嘅雲呢拿雪糕，但個雪糕絕對唔普通，睇得見雪糕嘅一點點細微黑點，就個喺以雲呢拿籽做，味道天然；而批殼好脆口，富牛油香，蘋果肉好清甜，更滲有微微肉桂香，而且，啲果肉都喺刨成薄片，都喺一番心機嚟。暖暖嘅蘋果批，襯以冰涼嘅雪糕，實在美妙。