太興 Tai Hing：「興」鬆下午茶

入到嚟粉嶺搵食，不外乎因為同啲老友行完山，今次小弟帶隊再挑戰大刀屻，不過，就由「嘉道理農場」嗰邊上山，粉嶺「蝴蝶山徑」呢邊落山，貪其一到粉嶺就可以食番個下午茶補補體力。大家都行到攰，咁就當然揀最就腳嘅「名都商場」搵食啦，上次試過「德興茶餐廳」，感覺一般，所以，就試試「太興」，諗住大牌子少少，可能會好啲啩。

疫情緩和，防疫放寬，啲市民自然出晒嚟啦，所以，成個商場擠滿人，連帶店內都坐滿客，我哋都要等大概10min先有位坐。啲枱比較細張，枱與枱之間亦有啲逼，不過，環境算企理乾淨，反正都喺食個茶餐啫，唔會坐得幾耐。啱啱好安排咗最入、最角落張卡位，咁我哋可以自成一角！

餐具、餐紙、調味料全部都喺放晒晌枱側嘅抽櫃中，呢種已喺茶記嘅常規設定。

下午茶餐都有好多選擇，但眾所周知，「太興」主打喺燒味，所以，下午茶餐中有較多喺燒味款式，仲有啲喺三文治、多士、湯粉麵類，取價就比出面一般茶記貴少少。

頂級午餐肉滑蛋公仔麵 $44

其實，比起外國貨，小弟覺得「長城牌」嘅「白豬仔」喺最好食，當然睇相就唔知呢碗啲午餐肉有幾頂級，就算食落都未必知咩牌子，但老友就話唔錯，煎得香口，而滑蛋就算浸咗湯，都仲喺嫩滑，公仔麵都OK啦，無煮腍都收貨喇！

脆香雞中翼拼迷你西多士 $40
我心諗，雞中翼得嗰兩隻，西多士就俾夠成份啦，反正都只不過多一片麵包，功夫又唔會多咗去邊，依家就感覺有少少寒酸。老友講到，雞中翼確喺炸得香脆不膩，而西多士就無話咩好特別，都喺花生醬餡，配牛油同糖膠咁啦。

羅宋湯通粉配脆香雞中翼 $40
另一位老友都喺鍾意食雞中翼，但就配羅宋湯通粉，因為濕濕哋，又唔會話兩樣炸嘢咁熱氣。我都喺揀羅宋湯通粉，等陣再分享，而雞中翼上一份茶餐已講咗，故此，呢一份茶餐就無咩好補充。

羅宋湯通粉配四色卷 $40
小弟嘅選擇喺試吓啲未試過嘅嘢，所以，揀咗羅宋湯通粉配咗咩嘢四色卷。先分享碗羅宋湯通粉，個羅宋湯做得唔差，簡單講喺好港式嘅味道，即喺濃郁酸香，有好多雜菜在內，仲有少少牛肉粒，最緊要通粉無過腍，算幾好食；而四色卷類似啲魚肉春卷，但裡面仲捲有紫菜、蟹柳之類，食味算唔錯，但有少少油啫。

張枱真喺淺窄，一下子堆晒啲嘢嚟，都唔記得咗影杯奶茶，佢哋嘅冰鎮奶茶幾出名，但我就想飲杯熱奶茶，茶奶比例OK，但茶底又無預期中咁芳香馥郁，不過，亦算水準中上。席間大家講咗好多行山嘢，下次目標想喺行「雞公嶺」喎，又睇睇幾時成事先！

個人評分
味道：7/10
環境：6/10
服務：7/10
抵食：7/10
平均每人消費：HK$40

餐廳資料：
太興 Tai Hing
地址：粉嶺粉嶺車站路18號粉嶺名都商場2樓6號舖
電話：2174 6266