餐廳以酒吧為設定，所以，無論環境，抑或氣氛，都比較講求型格同格調，幽暗嘅燈光，輕柔嘅音樂營造出輕鬆嘅氣氛。近細巷一邊門面，採開放式設計，主要喺啲高腳枱櫈，俾人飲吓嘢，而裡面就主要為用餐區，一派西餐廳佈置。
場內最吸晴嘅位置喺懸掛咗一張大藤椅，背後更有一張巨型人像彩繪，幾有藝術感。
由於燈光比較暗，所以，餐牌就唔喺影得太清楚。以主餐牌而言，食物選擇都幾多，由前菜、湯品、沙律、薄餅、飯品、意大利麵、主菜類到甜品都一應俱全；而飲品，啤酒、紅白餐酒、烈酒、雞尾酒、果汁、汽水、啡茶都一一有提供。我哋就簡單啲，唔多諗，揀咗個二人晚餐，包咗前菜、意粉、烤雞及甜品，定價$348，都幾划算。
Big Bang $88晚餐就唔包飲品，所以，揀咗兩杯無酒精雞尾酒試試。一眼就相中呢一杯「Big Bang」，因為3樣成份都喺小弟嘅有心水：芒果、熱情果及菠蘿。更有趣喺用上一隻雀仔嘅酒杯，非常得意，入口冰涼，有多重果香，酸酸甜甜嘅感覺，幾醒神。
Jackie Brown $88 友人無特別偏好，都只喺隨心揀，結果就要咗依一杯以野莓、青檸、橙汁溝成嘅「Jackie Brown」，面面加咗一大片橙乾，非常之靚。佢話入口初段會較酸，喺野莓跟青檸嘅協同效應，隨之飲落去，就有一種平衡感，酸爽清香。
野生藜麥沙律（晚餐）先由沙律登場，餐牌都寫到明有洋蔥、青瓜、彩椒、希臘芝士、檸檬汁，當然，大量藜麥就有眼你見，再加少少火箭菜墊底，喺一道極之健康嘅沙律。每種食材都好新鮮，希臘芝士嘅鹹香，又吊吊味，變得味道唔單調，雖然簡單，但整體感覺唔錯。
香蒜橄欖油意粉（晚餐） 呢一款喺好經典嘅意大利麵之一，外表睇落可能平平無奇，但做得好好食。一來麵條煮得好有咬口，極有煙韌感，二來充滿蒜香，卻唔會太霸道，加上落足橄欖油，油潤好味。
地中海烤雞（晚餐） 烤雞烤得金香，有少少燶位，並伴有新鮮嘅沙律菜及香脆嘅薯條，佐以自家製嘅蜜糖芥末醬。隻雞果然有水準，外皮非常香脆，肉質嫩滑富肉汁，唔會「乾崢崢」，而且，醃得入味，食落有點香料嘅香味。
西班牙油炸鬼伴朱古力雪糕（晚餐） 甜點可以揀心太軟或西班牙油條，後者未必咁常有機會食，所以，就揀油條。油條炸得十分香脆，入口卻完全無油膩感，熱焫焫配上朱古力漿及夾埋個雪糕嚟食，喺好好嘅結尾。
都講過好多次，依家啲酒吧餐廳做菜好有一手，今晚到訪嘅「OPA」亦然。所以，嚟飲吓嘢又好，食餐飯都好，加上環境輕鬆，招呼到位，店員亦好有禮，定會有個愉快嘅晚上。
個人評分
味道：8/10
環境：8/10
服務：8/10
抵食：8/10
平均每人消費：HK$290
味道：8/10
環境：8/10
服務：8/10
抵食：8/10
平均每人消費：HK$290
餐廳資料：
Opa Mediterranean Bar and Bistro
尖沙咀漆咸道南33-35號友聯大廈地舖1-2號舖
2369 7944
Opa Mediterranean Bar and Bistro
尖沙咀漆咸道南33-35號友聯大廈地舖1-2號舖
2369 7944
沒有留言:
發佈留言