牛牧 Ngau Muk：耳「牧」一新

向來都覺得做飲食唔容易，尤其晌香港，香港人食嘢又咀刁，又鍾意貪新鮮，又要多元化、多嘢揀，當然，又想要平啦。所以，好少餐廳單靠賣幾樣嘢，或一成不變就做得落去。最近，晌旺角試咗間餐廳，啲菜式都幾搞嘢，睇得出菜式設計上都花咗幾多心思，佢嘅名字叫「牛牧」。

餐廳嘅方唔大，一字長形，但裝修都幾骨子，一室淺色木系，地方光猛整潔。

餐具、糖包都放晒枱側，自由取用。

其實，晌門面都寫住喺賣港式美食，但有別一般茶記。查實都喺賣多國菜，不過，就發揮咗好多香港嘅創意精神。好似茶記嘅沙嗲牛麵，都玩好多花臣，而特飲中，更將黑牛、白牛做多好多變奏「牛」特飲，此外，漢堡、牛角包、多士亦大玩創意。

沙嗲犇麵 $58

老友話沙嗲牛麵食唔少，但一次過試到3款牛（犇：音「奔」）嘅沙嗲牛麵就絕對喺第一次，包括有本地鮮牛肉、本地肥牛、牛仔肉，再配上店家嘅招牌沙嗲，牛肉嘅份量真喺幾十足，頗有亮點。味道如何？老友話個沙嗲唔錯，炒得幾香、幾惹味，而且，俾得疏爽；牛肉就以本地鮮牛最腍滑，肥牛就有陣陣油脂香，牛仔肉就味道濃郁啲。老友忘記轉一丁，然而，公仔麵都OK。

美人梳打 $24

點個「犇麵」，再嗌飲品，有加配優惠，所以，老友點咗杯梳打，有減$10折扣。咩喺「美人梳打」？就喺葡萄汁、石榴汁、梳打水溝埋，再加球荔枝雪糕，老友就喺貪佢飲落酸酸甜甜，配公仔麵就再爽，襯沙嗲亦喺幾有化學反應，唔錯！唔錯！

黑松露牛油果蟹肉多士 $58

本來就想試牛角包，剛好賣晒，聽店員講佢哋啲牛角包都幾銷得，唔緊要，多士我都OK。嘩！嚟到嘅成品又真喺幾亮眼，尤其嗰抹黑松露，疏爽得緊要。裡面就以蛋沙律夾有蟹肉做餡，揀呢款多士都喺因為有蟹肉，唔使自己拆蟹咁麻煩，加埋生菜、牛油果，食起嚟頗清爽，味道又富層次。

紅牛 $32

佢哋凡點主食，都有跟餐優惠，不過，就唔知點解點牛角包 / 多士系列就無。都唔理，見佢咁多款特飲「牛」，都想試番一款。「紅牛」就當然唔喺嗰隻能量飲品啦，喺紅豆冰加抹茶雪糕，先食啲抹茶雪糕，抹茶味幾清幽，剩番半球就等佢溶落啲奶水度，變為抹茶牛奶，飲落都唔錯，清甜嘅紅豆就梗喺邊飲邊食啦，紅豆配抹茶一向都喺黃金組合嚟。

試咗幾款嘢食，都好足料，而且，用料不賴，部份菜式真喺幾有諗頭，有種耳目一新嘅感覺，而且，店員都好好招呼，非常有禮貌。不過，呢區競爭都好大，單喺附近一截「女人街」都有十多間餐廳，希望市面經濟回復，做番大個餅，大家都好生意。

個人評分
味道：8/10
環境：7/10
服務：9/10
抵食：8/10
平均每人消費：HK$85

餐廳資料：
牛牧 Ngau Muk
旺角通菜街2A-2P號鴻光大廈地下K1-K3號舖
6509 0639