山區裡的走走趯趯: 千の味刺身壽司專門店 Oi-Shi-Sushi：見異思「千」

工作關係，間中要在大陸山區跑呀跑，周圍走走趯趯（音：笛），所去的都是窮鄉僻壤，雖然靚景欠奉，但身處農村時，就自然有種令人感到寧靜、安然的感覺！在城市忙碌地做呀做，都是為了賺得三斗米，不過，慶幸有餘有剩等我都可以出外隨處盪，不單只見識一下不同地方的風土人情，還可以調節一下知足的心靈。小弟的旅遊足跡，可暫時瀏覽以下網址：http://travel.openrice.com/traveller/userdetail.htm?userid=49632

2021年11月24日星期三

千の味刺身壽司專門店 Oi-Shi-Sushi：見異思「千」

過到嚟D2 Place睇啲嘢，而老婆今晚有堂上未有時間煮，索性由小弟買外賣返去食。原本都鎖定咗目標，但就晌嚟之前，出地鐵見到呢間「千の味」刺身、壽司外賣店，見門口易拉架顯示嘅價錢唔喺貴，又有啲特價嘢，所以，唔好怪我見異思遷，改咗晌度買外賣。

雖然小店一間，但都花咗啲心思晌裝修度，就好似入門口咁，裝扮成條櫻花隧道，好有日本風，好有打卡感架。

再行落去，左邊見到落單櫃檯及廚房，自選刺身、壽司及各樣食物，就喺晌度即點即整。

而右邊就喺一啲凍櫃，放咗啲預製好嘅小食、卷物、刺身丼……等等，即攞即買，快靚正之選。更重點喺，去到近閂門時段，為促銷就會折完再折，小弟就梗喺會善用呢種優惠啦。

此外，仲有一組「雜貨架」，兼營好多日本產品，以飲品及零食為主，亦有啲醬料、調味料同食品。而當中有啲飲品喺有跟餐加配或升級優惠。

晌另一邊，即喺樓梯側旁，有個雪櫃，供應多款日本急凍食品，所以，嚟到就算唔喺買刺身、壽司，亦可以買啲急凍食品返去煮。

至於講到即做嘅刺身、壽司、小食、沙律、冷麵，甚至大堆頭嘅盛盒，兩張點菜紙，底面共4頁就顯示晒出嚟，小弟亦唔多講。

仲有啲特價單點飯類，送汽水或烏龍茶，都不妨考慮吓。

雖然上文都講過餐廳都喺主打外賣，但場內有張立食枱，不過，寫到明6:00pm後就不設堂食，大家就留意吓。

最後，就買咗一份壽司拼盤，加兩款特價嘅壽司卷及刺身丼，然後，搭兩支日本直送嘅果味梳打，夾夾埋埋都只喺$223，抵食。

火炙壽司拼盤 $118

先點一份自選嘅，就番老婆口味，佢又唔想食得太生，所以，晌火炙系列中揀咗呢一款拼盤。一客有8件，包括火炙三文魚腩、火炙芝士三文魚x2、火炙黑椒三文魚、火炙芝士帶子、火炙芝士熟蝦、火炙芝士鰻魚、火炙左口魚邊，計落比散叫抵，又可以一次過試到多啲款式。咁多款都唔錯，尤其帶子厚肉又爽口，熟蝦鮮甜兼彈牙，左口魚邊就油潤脂香。