川粵菜館：我的星期六美孚早餐 ~「粵」做越旺

正所謂一雞死、一雞鳴，呢個鋪位前身喺「家傳滬曉」，咁嘅市道，諗住執咗唔知幾時開翻間新，但隔無耐圍板裝修，最近就開番間賣川菜同粵菜嘅「川粵菜館」，間中晌附近嘅餐廳食嘢，經典見佢早市同晚市都幾多人，有時仲要等位添，真有越做越旺之意。

整體格局四四正正，一排排圓枱，以紅色為主色調，感覺其實有啲老土，枱亦排得密，但勝在樓底高，增加咗少少空間感，唔會感到太侷促。

新場新環境，連啲餐具都喺好新簇，而且，外觀都幾靚。仲有，啲蒸籠都好新淨，所以，整體感覺都好整潔企理。

講講價錢方面，一張點心價目表列晒唔同時段，由小點、中點……到精點嘅價錢，以及茶芥，都清清楚楚，一目了然，最正喺全日都無加一。

除咗正常嘅點心紙之外，仲有一張早市優惠點心紙，當中嘅醒晨孖寶就最抵喇。

蜜汁叉燒腸 $28

飲茶唔嗌腸粉感覺總喺差咗啲，雖然啲腸粉皮睇落就未至於話薄到透光，但拉得都算嫩滑，亦有米香，而裡面嘅叉燒就落得無手緊，件件都塞滿瘦叉，啱我口味。

醒晨孖寶 $40

四十蚊有兩碟點心，真喺無理由唔嗌，所以，嗌咗綿花雞同菜苗餃。先講講籠香菇綿花雞，可以講超級大碟，有齊雞件、魚肚、冬菇同芋頭，交足晒貨，而且，啲雞好滑，魚肚爽口，冬菇有菇香，芋頭夠晒粉，好食。

另一籠鮮蝦菜苗餃真喺好得，啲餃皮好晶瑩，咬落外皮煙韌唔黏牙，鮮蝦跟菜苗嘅比例都啱啱好，而蝦肉鮮爽彈牙，菜苗刴得幼細又鮮嫩，做到皮薄餡靚。

因為都喺當個早餐，所以3籠就夠晒，加上份量足。而點心定價相宜，尤其早市優惠，又無加一，怪不得經過好幾次都見咁爆場啦，晚市都要等位，真喺越做越旺。

個人評分
味道：9/10
環境：8/10
服務：8/10
抵食：9/10
平均每人消費：HK$42

餐廳資料：
川粵菜館
地址：美孚寶輪街1號曼坊地下G06-G07號舖
電話：2626 9338