講開以做古法、手工中菜聞名嘅「生記」，原來灣仔總店已有45年歷史，堪稱老字號，就算疫情呢兩年，都依然屹立不到，可見其實力。今次擴展到去會展商場之內，格調升級咗，場內樓底特別高，又有落地大玻璃，環境非常清雅，嚟嘅客人亦比較斯文，所以，整體感覺清幽，有別一般中菜酒家。
講到明是次喺清酒跟中菜嘅聯乘，所以，今晚將會品嚐嘅清酒都擺晒出嚟，4款清酒都各有特色：薰、爽、醇、熟，最貼心喺有張簡介去描述清酒及呢4種個性，以及一啲清酒嘅小知識，等我呢種門外漢學吓嘢，長吓知識。
琥珀合桃 一邊睇資料，一邊試試餐廳自家製嘅琥珀合桃，果然做得有水準，甜蜜香脆。
「生記」出名嘅手工菜如蝦子柚皮、鷓鴣羹、菊花豆腐就未有機會一試，但是夜嘅菜單亦喺富心思嘅傾力之作，當中有4道菜式刻意配上4款不同嘅清酒嚟品嚐，當然，餘下嘅菜式亦可以按個人喜好嚟配搭，喺一次非常有趣嘅體驗。溫馨提示一下，清酒跟菜式嘅配搭有可能會稍作調整，有興趣嘅朋友最好就事先打電話到餐廳問一問清楚。
枱上都放好酒杯，一切都準備就緒。而講到每一款酒，名字都一連串咁，原來喺包含酒廠名稱、酒嘅名稱、酒嘅種類，小弟就低層次，單喺睇個酒樽靚唔靚，哈哈！順帶一提，呢度嘅服務好熨貼，招呼到位。
醉品前菜 + 七賢 絹之味 純米大吟釀 先由冷盤登場，包括醉鮑魚、海中蝦、鴨舌，均用上花雕醃過夜，所以，甚具酒香，卻一啲都唔嗆喉。再者，鴨舌口感清爽，海蝦彈牙鮮甜，鮑魚柔韌有咬口。配上呢一款帶果香，而味道圓潤清甜嘅薰酒，確喺有種吊起冷盤海鮮嘅鮮甜味。
特色燒味雙拼 + 天吹 山酛 純米大吟釀 雄町 杜鵑花酵母 雙拼包括黑毛豬叉燒拼燒鱔，雖然喺粵菜咋，擺盤都好靚，襯住杯清酒，賣相一流。先試嚿叉燒，唔止燒得甘香，啲燶位就特別正，肉質極之鬆化，燒鱔又如何？同樣做得出色，甘脆富油香。因為兩樣都喺味濃之物，就配上味醇嘅醇酒，話雖如此，但入口喺出奇地爽口，甚有解膩之效。
金紫荊生記特色孖寶 + 千代壽 虎睡 純米大吟釀 叫得特色，就當然又喺招牌嘢啦，香煎手刴蓮藕餅拼鍋貼大明蝦，據我所知，都喺順德菜。藕餅做得好的骰，入口外層煎得香脆，食落充滿蓮藕味；而大明蝦炸得甘香不膩，蝦膠打得彈牙。配香口嘢，用上香氣清新嘅爽酒就真喺幾夾，兩者有種融和互補嘅平衡感。
香煎海鹽馬友件 + 達磨正宗三年 嚟到主菜部份，先有煎馬友登場，據店長介紹，馬友經過海鹽醃咗一晚，再風乾，所以，煎出嚟外皮脆到不得了，鹹香味已滲進入魚肉內，但卻又不失魚鮮味，佐以蔥油，另食味更富層次。而配以熟成三年嘅熟酒，色澤就明顯比較深，雖然風味較強，味道較厚重，但就幾襯托出馬友嘅鹽香。
玻璃貴妃脆皮雞 呢一道喺店家嘅招牌菜之一，功夫亦都好多，首先選用唔太重嘅清遠雞，再用以瑤柱、蝦米、金華火腿所熬嘅上湯慢火浸熟，再風乾，有落單時就酥炸，可以講喺將貴妃雞同炸子雞嘅特點結合而成。食落外皮真喺好香脆，雞肉非常嫩滑，皮下脂肪又少喎，襯隻爽酒個人感覺最唔錯。
香辣和牛粒 用上和牛，已經喺有一定嘅保證，和牛粒煎得香口，咬落既有油香，又富肉汁，肉質好嫩滑，而味道帶點辣勁，卻唔會嗆喉，非常之惹味好食。由於屬味濃，小弟班門弄斧就試以熟酒相配，感覺又真喺幾唔同，友人話辛辣味跟酒香有種搏力嘅互動，果然喺識飲之人，層次比小弟高。
梅菜王蒸菜心 經過3記濃味或香口嘅主菜，來一道蒸菜心，既清清味蕾，又平衡一下食咗咁多肉。雖然簡單，但啲梅菜好清香，又無死鹹嘅問題，感覺好舒服。
香蔥砂鍋飽魚焗飯 接近尾聲，就自然喺上主食嘅時候，話就話焗飯，當然有別西式，都喺先炒後焗，而飯粒炒得分明、爽身，飯內仲混有唔少鮑魚粒粒，的確好味。
甜品（太極馬拉糕、手工芝麻卷、喳咋）中式、西式都好，以甜品作結，總喺一個完全收場，甜品更喺三星報喜。馬拉糕做成太極之形，雖然花巧，但絕對喺心機嘢，分別喺原味、芝麻味，食落糕身非常鬆軟而不黏牙；芝麻卷更喺口碑之作，依家都好少酒樓會做，功夫多嘛，灑上少少金箔，自然更貴氣，最難得喺卷身軟滑，芝麻香自然，又夠濃郁；至於喳咋亦唔錯，內裡非常多料，有椰香味。
小弟非嗜酒之人，原以為清酒就梗喺配吓日本嘢最好啦，估唔到配中菜一樣掂喎，就算我呢等門外漢，都覺得咗配襯都幾特別。事後上番官網睇，原來呢個活動有成60間中菜館、40間和式料理店參與，設計出逾300款清酒x海鮮菜式，可謂勢勢浩大！
個人評分
味道：9/10
環境：9/10
服務：8/10
抵食：8/10
平均每人消費：HK$750
味道：9/10
環境：9/10
服務：8/10
抵食：8/10
平均每人消費：HK$750
餐廳資料：
金紫荊生記粤菜廳 Golden Bauhinia Sang Kee
灣仔博覽道1號香港會議展覽中心博覽商場
2582 7729
金紫荊生記粤菜廳 Golden Bauhinia Sang Kee
灣仔博覽道1號香港會議展覽中心博覽商場
2582 7729
沒有留言:
發佈留言