SP Flower & Tea Room：小清新下午茶

早陣子，同老婆試咗一家主打花茶嘅餐廳「SP Flower and Tea Room」（現已轉名為「SP Senses」），隨心食咗個晚鳥下午茶，因為食完無耐，傍晚時份話咁快就轉咗天黑。

餐廳嘅裝修都幾骨子，一室白色系，簡潔明亮，牆上掛上少少裝飾作點綴，周圍又擺放好多植物，感覺幾舒適悠然。

除咗用餐部份，另僻一角，作自家品牌嘅花茶作零售，睇落啲款式都幾特別，用嚟送禮都幾好架。

餐牌就得一個，兩頁紙睇晒，一邊喺套餐形式，包餐湯、前菜、主菜及甜品，分三道菜或四道菜價錢；另一邊就喺散點菜式，有日式丼飯，有意大利麵，更有窩夫或班戟供選擇，此外，有加配變成套餐嘅優惠。

自選窩夫（香草挪威煙三文魚）$152

基本上，窩夫已包咗蕃茄素菜沙律、烤意大利青瓜及蜜糖，主要喺揀想配咩配料，整體賣相都幾靚仔。窩夫新鮮做，所以，都幾脆口，仲因為加有半溶嘅芝士，沾上蜜糖，就變得份外好食，三文魚亦唔錯，鹹香油潤，又可以食番啲青瓜、沙律平衡吓。

除上述嘅主餐牌嘅食物之外，呢間餐廳嘅另一亮點就喺佢哋嘅小蛋糕，蛋糕餐牌雖然顯示共有10款小蛋糕，用料配搭均非常特別，然而，一切以當日餅櫃所展出為準。就當日所見，都仍然有成7款選擇，仲不時有啲期間限定。

抹茶柑桔小蛋糕 $48

外觀唔單止有層次感，更利用好多鮮花作點綴，就連面頭嘅忌廉都灑上少少抹茶粉，絕對極具打卡感。其實件小蛋糕都幾多功夫，左中右幾層喺抹茶海綿蛋糕，再夾有抹茶慕絲及正中間一層柑桔果蓉，入口抹茶嘅味道幽香而帶有少少甘苦餘韻，柑桔果蓉則酸香細膩，兩者嘅配搭又幾有驚喜。

南瓜合桃朱古力煎茶小蛋糕 $58

呢一款喺期間限定，甜品餐牌喺無嘅，定價亦貴少少。同樣，做成南瓜外形，再加上朱古力條及食用鮮花作裝飾，賣相絕對喺贏晒。主體主要喺南瓜慕絲，做得柔滑香甜，南瓜味亦甚突出，最底層則配上合桃朱古力蛋糕嘅布朗尼，反而近頂有少少煎茶慕絲，不過，因為所佔嘅份量唔多，故此，味道就較為隱約。

水果冷泡茶

鮮紅色嘅冷泡茶，茶味唔算好濃，但充滿果香，酸酸甜甜，入口清新又清爽，配甜點，效果唔錯喎！

三幾知已約埋晌度嘆吓花茶，食吓啲法式小蛋糕確喺幾寫意，所以，目測客人都喺以女生為主，男生嘅話，都喺陪女朋友，陪老婆咁啦！

個人評分
味道：8/10
環境：8/10
服務：8/10
抵食：7/10
平均每人消費：HK$140

餐廳資料：
SP Flower & Tea Room
尖沙咀麼地道66號尖沙咀中心地下G64-66號舖
2789 3339